سنڌ سلامت فورم تي 10000 تحريرون مڪمل ۽ ميمبرن جي ڊبل سينچري مڪمل ٿيڻ تي ۔۔۔

مون کي اهو لکندي انتهائي خوشي ٿي رهي آهي ته سنڌ سلامت فورم ڇهن مهينن جي مختصر عرصي ۾ سنڌ جي ڪنڊ ڪڙڇ تائين پنهنجي سڃاڻپ ڪرائي آهي اهو ئي سبب آهي جو انهيءَ مختصر عرصي ۾ سنڌ سلامت تي 10000 تحريرون مڪمل ٿي چڪيون آهن ۽ ان کان به وڌيڪ اهو ته فورم تي رجسٽرڊ رڪنن جو تعداد 200 کي پهچي چڪو آهي۔۔۔۔
هن منزل تي پهچندي پهچندي فورم ڪافي مشڪل سفر کان به گذريو۔۔۔۔ ڪافي دوست آيا ۽ وري پنهنجين مجبورين جي ڪري ساٿ ڇڏي به ويا۔۔۔ ڪي دوست ته ناراض ٿي ويا ۽ منٿ ۽ معزرت کي به نظر انداز ڪري ويا وري واپس نه آيا۔۔۔۔ ڪو وقت اهڙو به آيو جو خوبصورت خواب وارو سپنو هٿن مان ٿي ويو۔۔۔ فورم پنهنجو مختصر سفر ڪري بند ٿيڻ تي پهتو ۔۔۔۔۔ پر۔۔۔۔۔۔ اهي توهان جهڙا محبتي ۽ ساٿ نڀائيندڙ ساٿي ئي هئا جن منهنجي همت افزائي ڪئي۔۔۔ ۽ سفر کي جاري رکڻ لاءِ هڙان وڙان مدد جي پيشڪش ڪئي ۔۔۔
هن منزل تي مان ادا علي علي ۽ ادا عامر ضياءِ چارڻ سميت پوري سنڌ سلامت انتظاميه سميت مڙني ميمبر جو شڪريو ادا ڪندس۔۔۔۔ هي يقينن توهان سڀني رڪنن جي محنت جو نتيجو آهي ۔۔۔ جس هجي سنڌ سلامت جي سموري ساٿ کي جن پنهنجي مصروف ۽ ذميدارين سان ڀريل زندگي مان پنهنجي ٻولي خاطر، پنهنجي سنگت خاطر، پنهنجي ساٿ خاطر ۽ پنهنجي پاڻ خاطر فورم تي مسلسل ايندا رهيا ۽ نون توڙي پراڻن ساٿين کي همٿائيندا رهيا۔۔۔۔۔
مون کي يقين آهي ته سنڌ سلامت فورم کي عام ڪرڻ لاءِ توهان دوستن مختلف گروپن تي وڃي ميلز ۽ موبائيل ميسيجز وسيلي پڻ پنهنجي جستجو جاري رکي آهي۔۔۔ اهو ئي سبب آهي جو فورم تي روزانو نوان نوان دوست رجسٽريشن ڪرائي رهيا آهن۔۔۔۔۔
مان انهن سمورن دوستن جو به شڪريو ادا ڪندس جيڪي سنڌ سلامت فورم تي ڪجهه مسئلن اچڻ جي ڪري پنهنجي رجسٽريشن مڪمل ته ڪري نه سگهيا آهن۔۔۔ پر فورم تي مهمان جي صورت ۾ لڳاتار ايندا رهن ٿا ۽ فيڊ بيڪ جي صورت پنهنجا رايا فورم جي انتظاميه تائين پهچائيندا رهن ٿا۔۔۔۔ گڏ انهن سڀني ساٿين کان مان معزرت گهرڻ کان ڪونه ڪيٻائيندس جن کي فورم تي رجسٽريشن مڪمل ڪرائڻ وقت مونجهارن کي منهن ڏيڻو پيو۔۔۔۔
انهن ساٿين جن فيڊ بيڪ ذريعي ميلز موڪليون آهن انهن کي پڻ وقت سر جواب موڪلڻ جي پوري پوري ڪوشش رهي آهي پر هتي انهن کي آگاهي ڏيندو هلان ته جيڪڏهن رجسٽريشن جي عمل کي وڌيڪ سولو بڻايو ويو ته فورم تي سپيمز جي حملي جو خدشو ٿي سگهي ٿو ان ڪري جيڪڏهن ڪنهن دوست کي فورم تي رجسٽريشن ڪرائڻ ۾ ڏکيائي سامهون اچي رهي آهي ته اهي انتظاميه سان هيٺ ڏنل اي ميل تي رابطو ڪن ۔۔۔۔ سنڌ سلامت انتظاميه جي پوري پوري ڪوشش هوندي ته کين درست ۽ تڪڙي رهنمائي ڏني وڃي۔۔۔۔
آخر ۾ مان شاهه صاحب جي هنن لفظن سان سنڌ سلامت فورم جي سموري ساٿ جو شڪريو ادا ڪندس ته۔۔۔

ٿورا نه ٿورا مون تي ماروئڙن جا
ڀلايون ۽ ڀيرا ڳڻي ڳڻيندس ڪيترا​

سنڌ سلامت ساٿ سلامت ۔۔۔۔۔۔۔ sindhsalamatsaathsal
انتظاميه سان رابطي لاءِ اي ميل ايڊريس آهي۔۔۔
salamatsindh@gmail.com