ھندو جيم خانو برنس گارڊن سان لڳ ايم آر ڪياني روڊ تي موجود ھندو جيم خانو راجستان جي شاندار محلن جي طرز تعمير جو ڏيک ڏيئي رھيو آھي۔ بناوٽ جي لحاظ کان ھي بين عمارتن کان مختلف نظر اچي ٿي۔ ھندو جيم خاني جي اڏاوت ۾ اوڀر جي طرز تعمير نمايان نظر اچي ٿي۔ ڇو ته ان عمارت ۾ مغل ۽ ھندو ٻنهي قسمن جي طرز تعمير جي جهلڪ نظر اچي ٿي۔ تمام وڏي ۽ ويڪري رقبي تي قائم ٿيل ھي عمارت مشرقي تھذيب جي شاھڪار نمونن سان سرجيل، خوبصورت گنبذ ، محرابي ڏاڪڻيون، ديوارن تي چٽيل دلڪش نقش ۽ تصويرون، ننڍا ننڍا دروازا، ۽ محرابي دريون ھن عمارت جي خوبصورتي کي وڌيڪ دلڪش بڻائي ڇڏين ٿيو۔ ھن خوبصورت عمارت جو آرڪيٽيڪٽ ( ٺاھيندڙ ) انجينئر آغا احمد حُسين ھو، جنهن وڏي محنت ۽ جدوجهد کان پوءِ ھيءَ عمارت مڪمل ڪئي ھئي۔ صحيح طريقي سان سار سنڀال نه لھڻ جي ڪري ان عمارت جي سونھن گهڻي حدتائين متاثر ٿي آھي، ان جا در ، دريون ، سِرون ، ڇت تي موجود گنبذ (قُبي) جي اندروني ۽ ٻاھرين سطح ٽوڙ ڦوڙ جو شڪار ٿي ويئي آھي۔ سنڌ جي ان عظيم ورثي جي حفاظت جي لاءِ موجوده سرڪار توڙي سنڌ جو درد رکندڙ ساڃاھ وندن، اديبن ، دانشورن، صحافين ، شاعرن، شاگردن، عالمن، اڪابرن ۽ وس وارن کي اپيل ٿي ڪجي ته اڳتي اچن ۽ ان ورثي جي مالڪي ڪري ايندڙ نسلن تائين سنڌ جي عظيم ماضيءَ جا يادگار ڏيکاري سگهن۔
سهڻي بلڊنگ .... افسوس اهو آهي جو اهو تاريخي ورثو قبضي هيٺ آهي، ٿيڻ ته ايئن گهرجي جو ايوڪيو ٽرسٽ بجاء سنڌ حڪومت ان کي تاريخي ورثو قرار ڏئي يا هندن کي هي ملڪيت واپس ڪري ....
