گهوڙن هنيون گهڻيون، اُٺن هنئي آنءُ جا نينهُن ڳنهندي نانءُ، سا مون جيئن پوندي مامري. سر حسيني "سسئي " گهوڙن هنيون = مصيبت جون ماريل، سنڌ سدائين سر سبز ۽ خوشحال رهي آهي ۽ اهيا خوشحالي ئي سنڌ جي مصيبتن جو سبب به رهي آهي. ٻاهران ايندڙ فوجي لشڪر هاٿين ۽ گهوڙن ذريعي سنڌ ۾ داخل ٿيندا هئا. مقامي ماڻهون گهوڙا ڏسي هڪ ٻئي کي خبردار ڪندا هئا "گهوڙا ڙي گهوڙا " يعني مصيبت اچي وئي تيار ٿيو. ڀٽائي هي محاورو گهوڙن هنيون گهڻيون استعمال ڪيو آهي. اُٺن هنئي = اٺن جي ماريل، هي به محاورو ڀٽائيءَ استعمال ڪيو آهي ڇو ته اٺ ئي سسئيءَ جي ڏيرن کي کڻي آيا ۽ وري اٺن تي پنهونءَ کي چاڙهي سندس ڀائر کڻي ويا هئا. تنهنڪري اٺ علامت آهن مصيبت جي. ڳنهندي = وٺندي، کڻندي مامري = معاملي، مصيبت، ڏچي * سسئي چئي ٿي مصيبتن جون ماريل ته ڪيتريون ئي آهن پر اٺن جي ماريل رڳو مان ئي آهيان. * جيڪا به پيار ڪندي, عشق ڪندي سا مون جيان ڏچن، ڏوجهرن ۽ مصيبتن ۾ ڦاسندي. سمجهاڻي * ڀٽائي خبردار ٿو ڪري پيار ڪرڻ وارن کي ته عشق ۾ آهن ئي پيڙائون، اذيتون ۽ عذاب تنهنڪري خوف، خطرن ۽ مصيبتن لاءِ اڳواٽ ذهني طور تيار رهو.
