ڍَولَي ڍَڪي آهيان، هُيَس اُگهاڙي آنءُ رَکي پَنهنجَو نانءُ، ڪَڪَرُ ڪيانئيم ڪَاڪ جو. سر مومل راڻو ڍَولَي = ڍولڻ، پرين، محبوب، راڻو ۽ مرشد ڪامل، مولا پاڪ جي ذات ڍَڪي آهيان = پنهنجي پردي پناه ۾ ڪيائين، عيب ڍڪيائين اُگهاڙي = گنهگار، عيبدار، مومل ڪاڪ محل ۾ ٺڳي، جادو، حرفت ۽ چالاڪيءَ سان ماڻهن کي ڦريندي هئي. تاش جي پتن سان جوا جي راند ۾ هارائي ماڻهن جو الهه تلهه چٽ ڪندي هئي. پنهنجي حسن ۽ سونهن جي ڄار ۾ ڦاسائي ڪيترن ئي ماڻهن جون زندگيون تباه ۽ برباد ڪري چڪي هئي. رَکي پنهنجو نانءُ = پاڻ سان منسوب ڪري، پاڻ ڏي ڇڪي، پنهنجي نالي ڪري، راڻي مومل سان شادي ڪري کيس پنهنجو ڪيو هو. ڪَڪَرُ = ڪڪر جي معني' جُهڙ آهي پر هتي معني' ٿيندي ڇانوَ، ڇانورو، پاڇو، ٻاجهه، شفقت، رحمدل، انسان دوست. ظاهري معنى : * راڻي منهنجي عيبن تي پردو وجهي ڇڏيو نه ته آئون ته گنهگار هيس، عيبدار هيس. * راڻي مون کي پنهنجي نالي ڪري، پنهنجو بڻائي، مون سان شادي ڪري سڄي ڪاڪ جي لاءِ ڇپر ڇانوَ ڪري ڇڏيو. روحاني معنى : انسان گنهگار ۽ عيبدار آهي سوين عيب آهن ماڻهونءَ ۾ پر جيڪڏهن مولا پاڪ جي ذات ڪامل مرشد ذريعي پنهنجي شفقت ۽ رحمت سان راضي ٿئي ته هڪ گندي ۽ عيبن سان ڀريل انسان کي نيڪ ۽ انسان دوست بڻائي ٿو ڇڏي. پوءِ ماڻهون ٻين لاءِ به ٻاجهه ڀريو رحمدل ۽ ڇپر ڇانوَ ٿيو پئي. سائين مظفر منگي جي فيسبوڪ ٽائيم لائين تان ورتل
ڀٽائي جو پارکو سائين مظفر منگي صاحب سائل مهراڻ قلم کڻي لکڻ ويٺس ته سوچن ۾ پئجي ويس ته ڇا لکان؟ مظفر منگي صاحب جي باري ۾؟ پر اوچتو ياد اچي وئي ته سائين مظفر منگي صاهب جن فيس بوڪ ته هڪ وڏو ڪم سرانجام ڏئي رهيا آهن ان تي ڪجهه لکجي، مان ڪو وڏو اديب، مضمون نگار، ڪالم نگار يا شاعر ته نه آهيان جو وهي ان جي آڙ ۾ بڪ بڪ ڪري پر سائين جن جي ڪم مان آئون ايڏو ته متاثر ٿيس جو کڻي چار اکر لکي ويٺس. سائين مظفر منگي صاحب سان منهنجي روبرو ته ملاقات نه ٿي آهي پر فيس بوڪ ته ڪڏهن ڪچهري ڪريون ٿا جن ۾ سائين پيار، پاٻوهه، پنهجائپ سان گڏ هڪ استاد وارو سبق به سيکاري ٿو جن ۾ شاهه لطيف جي بيتن سمجهاڻي اهڙي نموني ڏئي ٿو جو ڄڻ شاهه صاحب هئينر ئي بيت چيا هجن، ۽ ان سان گڏو گڏ صبح سوير اٿندي ئي (منهنجي سڪ ۾ ناستو پوءِ ٿو ڪري) سائين مظفر منگي صاحب پهرين هڪ شاهه صاحب جي بيت جي سمجهاڻي دوستن ڏانهن صبح جي سلامن شئير ضرور ڪري ٿو. ڪجهه ڏينهن سائين ڪجهه مصروفتن جي ڪري فيس بوڪ تان پري رهيا هئا، پر سائين جو انتظار اهي فيس بوڪ وارا دوست ڪندا رهيا جيڪو شاهه صاحب کي سمجهڻ جي ڪوشش ڪري رهيا آهن،جڏهن سائين مظفر منگي صاحب واپس فيس بوڪ تي آيا سڀني سندس وڏو استقبال ڪيو سائين مظفر منگي صاحب هڪ اهڙو شخص آهي جيڪو نئون اسرندڙ شاعرن جي همٿ افزائي ڪري ٿو پر ان سان گڏو گڏ سهڻيون صلاحون پڻ ڏئي ٿو.
