سڀئي سُهاڳڻيُون، سڀني ڳچيءَ هارَ پَسَڻَ ڪارڻ پرينءَ جي، سهسين ڪن سينگارَ ڍَولُ تنين جَي ڍَارَ ، هيٺاهيون هلن جي. سر ليلا چنيسر سُهاڳڻيُون = مُڙسن واريون، لفظ سهاڳ جي معني' آهي ورُ، مڙس، گهوٽُ. سهاڳڻيون جمع آهي واحد ٿيندو سهاڳڻ معنى مڙس واري. سهسين = سوين، سورنهن سينگار ڍول =پرين, محبوب، پر هتي مراد آهي چنيسر. ڍارَ = گس، واٽ، پنڌ، دڳ هيٺاهيون = هيٺاهين وٺي، نياز نوڙت، عاجزيءَ، انڪساريءَ سان. * چنيسر جون ليلا کانسواءِ ٻيون به جيڪي راڻيون هيون سي سڀ هيرن جواهرن ۽ موتين جا هار پائينديون هيون. * سڀ راڻيون ويس وڳا پهري ۽ سورنهن سينگار ڪنديون هيون ته جيئن چنيسر کي سڀني کان وڌيڪ مان وڻان. * چنيسر کي ته اها راڻي وڻندي هئي جنهن وٽ نياز نوڙت، عاجزي ۽ انڪساري هوندي هئي. سمجهاڻي *ڀٽائي اسان کي درس ٿو ڏئي ته غُرورُ، تَڪَبُرُ، هَٺُ ۽ وڏائي ڪنهن کي به پسند ناهي هوندي. سڀڪو انسان نياز نوڙت، عاجزي ۽ انڪساريءَ کي پسند ڪري ٿو. سائين مظفر منگي جي فيسبوڪ ٽائيم لائين تان ورتل
