مان اعتراف ٿو ڪريان ته 1983ع ۾ ايم آر ڊي تحريڪ هلڻ وقت هلال پاڪستان مان استعفيٰ ڏيڻ ۽ پرنٽ ميڊيا کان الڳ ٿيڻ منهنجي تمام وڏي غلطي هئي. جيتوڻيڪ پوءِ مان پي ٽي وي تي ڪم ڪيو پر اتي به عبدالڪريم بلوچ، تاجدار عادل ۽ ٻين دوستن جو چوڻ هو ته توکي پرنٽ ميڊيا ڇڏڻ نه گهرجي ها. انهيءَ ۾ ڪو شڪ ناهي ته مون تمام گهڻو وقت هلال ۾ ڪم ڪيو ۽ منهنجو پرنٽ ميڊيا ۾ تجربو به وڏو هو. جيڪڏهن مان مستقل پرنٽ ميڊيا سان سلهاڙيل هجان ها ته شايد پنهنجي تجربي مان سنڌي صحافت جي وڌيڪ بهتر نموني خدمت ڪري سگهان ها. پر هڪ دفعو پرنٽ ميڊيا کان جو الڳ ٿيس ته وري ڳنڍجي نه سگهيس. باوجود ان جي ڪن ادارن ۾ ويس به پر ايڊجسٽ نه ٿي سگهيس. بهرحال منهنجي سڃاڻپ ۽ منهنجو سڀ کان وڏو حوالو پرنٽ ميڊيا جو ئي هو ۽ وقت ثابت ڪيو آهي ته ان کان پاسيرو ٿيڻ ڪنهن ريت به درست فيصلو نه هو.
پنهنجي غلطي جي پاڻ نشاندهي ڪرڻ به جرعت ڀريو عمل آهي پر اها غلطي سڌارڻ انتهائي جرعت ۽ عزت ڀريو عمل آهي!
