نامياري ليکڪ، صحافي ۽ مزاح جي وڏي نالي علي احمد بروهي جي سوانح حيات جو ڪتاب ”ڄام. ڄاموٽ ۽ ڄامڙا“ اوهان دوستن اڳيان حاضر آهي. هي ڪتاب ان ڪري به اهميت جوڳو آهي جو هن ۾ سنڌ جي هيرن جهڙين شخصيتن جو ذڪر آهي، جنهن ۾ رئيس ڪريم بخش نظاماڻي، محمد ابراهيم جويو، استاد عطا محمد حامي، مولانا دين محمد وفائي، پير حسام الدين راشدي ۽ سائين جي ايم سيد سميت ڪيترن ئي شخصيتن تي سندس لکڻيون،رايا ۽ زندگيء جو حال احوال شامل آهي. هي ڪتاب 1999ع ۾ نيو فيلڊس پبليڪيشن پاران ڇپايو ويوهو. علي احمد بروهي ڪتاب جي مهاڳ ۾ پنهنجي لاءَ لکي ٿو : آءُ کيس سڃاڻان. اڄ ڪلهه کان نه پر ٻال جتيءَ کان، جڏهن کان اڃان کائونس گگ سنگهه وهندي هئي، جا اگهندو به گهڻو ڪري ٻانهن سان هيو يا چولي سان. هاڻ ته پاڻ کي الاجي ڇا ٿو سمجهي؟ هي برابر آهي جيئن چوي ٿو. ڳڙهي ياسين جو بروهي آهي، پر نه ڳڙهي ڪو مڪو مدينو آهي ۽ نه بروهي قوم ڪو آريائي قبيلو، جنهن جي فرد هئڻ ۾ ڪو فخر حاصل ٿئي. قبول ٿو ڪجي ته سندس گهراڻي جا گهڻا ڀاتي پڙهيل ڳڙهيل ۽ لائق ماڻهو آهن، پر هتي ڳالهه آهي هن مارڪي جي، ته هي چڱن پٺيان چٽو الاجي ڪنهن تي ويو؟ جهڙو هيو شڪل جو ڪارو ۽ ڪوجهو، اهڙائي بڇڙا افعال هيس. پاڙي ۾ سڏبو هو باگڙي ۽ گهر ۾ گيدڙي. هتي ڪلڪ ڪري ڪتاب ڊائونلوڊ ڪيو
