جَيڪُسِ اُٺَا مِينهَن، مُنهَان پَوءِ مَلِيرَ ۾ ڪَالَهه سَڄَوئِي ڏِينهَن، مُنهِنجَي اَکِڙِيُن اُڪِيرِيَو سُرُ مَارُئي جَيڪُس = شايد، لڳي ٿو، سمجهان ٿي اُٺَا = وسيا، برسيا مُنهَان = مون کان اُڪيريَو = سڪيُون بيت جو پس منظر ~ مارئي چئي ٿي ته سمجهان ٿي، شايد مون کان پوءِ منهنجي ملڪ ملير تي برساتون پيون آهن. ~ ان خوبصورت ۽ دلڪش منظر کي ڏسڻ لاءِ ڪالهه سڄو ڏينهن منهنجون اکيون ڏاڍيون سِڪيون آهن. سمجهاڻي جهڙ ڪڪر ڪارونڀار، گجگوڙون، تيز هوائون، کنوڻين جا چمڪاٽ ۽ برسات جو وسڻ اهي سڀ فطري ۽ ڪائناتي رنگينيون، دلڪشيون ۽ حسناڪيون دل ۽ مَنَ کي فرحت ۽ راحت ڏين ٿيون. اهي برساتون جيڪڏهن ڏڪار سٽيل مارئيءَ جي ملڪ ملير تي وسن ته ٿر جنت جو ڏيک ڏئي ٿو. هر طرف ساوا گاهه، رنگ برنگي ٻوٽا، گل ڦل ۽ چيڪي مٽيءَ جي ڀنل هٻڪار ويتر ماحول کي معطر ڪيو ڇڏي. مارو مال کي ڪاهي خوشيءَ وچان جهومندا ۽ ڳائيندا جڏهن ساون پٽن ڏانهن وڃن ٿا ته مال جي ڳچين ۾ ٻڌل ٽلين جا مڌر سُرَ من کي موهي ڇڏين ٿا. برسات کان پوءِ ساين ڀاڄين، گاهن ۽ انن جا انبار گڏ ٿي وڃن ٿا. ڏکن جو انت اچي ٿو ۽ خوشحالي ۽ آسودگي سندن سڪل چهرن تي مرڪون وکيري ٿي ڇڏي. ڪالهه سڄو ڏينهن مارئيءَ من ئي منَ ۾ اهي سپنا پي ساريا آهن. سو اچو ته دنيا جي عظيم مفڪر، ڏاهي ۽ شاعر شاهه لطيف جي عظمت کي سلام ڪندي هن مارئيءَ جي خوشحاليءَ واري سپني کي ساڀيان ڪرڻ لاءِ پاڻ پتوڙيون. _____ چونڊ، تحقيق ۽ تشريح محترم مظفر منگي صاحب جي ٿورن سان سندس فيسبوڪ وال تان ورتل
