جُتِيُون سَي پائِيندِيُون، جَنِين پَيرَ پِرِين لاتِيُون سَڀِ پَرِين، سَسُئِيءَ سُپَيرِيَنِ کَي سر معذوري ( سسئي ) پِرِين = پيارا پَرِين = ريتون، رسمون - لفظ پَرِ جنهن جي معني' ريت يا رسم آهي ان جو جمع پَرِين سُپَيرِيَنِ = پِرِيُنِ، محبوبن بيت جو پس منظر ~ جن کي پنهنجا پير پيارا آهن، سي ئي جتيون پائينديون. ~ سسئيءَ اڄ سڀ ريتون، رسمون ۽ رواج ٽوڙي ڇڏيا آهن. سمجهاڻي جڏهن اسان ڪنهن احترام لائق، مقدس، پاڪ ۽ پوتر اهڃاڻ ڏانهن پنڌ ڪندا آهيون. تڏهن محبت ۽ عقيدت جي اظهار طور جتي لاهي پيرين اگهاڙين پنڌ ڪندا آهيون. سسئيءَ اڄ دنيا جي ريتن، رسمن ۽ رواجن کي ٽوڙي هڪ نئون ۽ شاندار مثال قائم ڪيو آهي. ڇو تہ هن پنهونءَ ڏانهن پنڌ ڪندي پيرن مان جتي لاهي ڇڏي آهي. سسئيءَ پنهنجي محبوب پنهون سان انتهائي پيار، پاٻوھ ۽ محبت جي اظهار طور جتي لاهي اگهاڙن پيرن سان پنڌ ڪرڻ جو فيصلو ڪيو آهي. ڀٽائيءَ جو هي بيت شاعراڻي نازڪ خياليءَ سان گڏ، محبوب سان محبت جو لازوال اظهار بہ آهي ۽ کيس شاندار ڀيٽا بہ آهي. چونڊ، تحقيق ۽ تشريح محترم مظفر منگي صاحب جي ٿورن سان سندس فيسبوڪ وال تان ورتل ____
