اَڱَڻَ مَٿَي اوپِرا، جَڏِهن ڏاگها ڏِينهَن ڏِٺاءِ ڪُنجُون جَي قُفِلَنِ جِيُون، تان ڪِنهِن لَلِ لِڪاءِ تَہ سُڀاڻي سَندِياءِ، ٿِيَي سارَوڻِي سَسُئِي ! سُرُ دَيسِي _ سَسُئِي اوپِِرا = ڌاريا، ٻاهران آيل ڏاگها = اُٺَ ڏِٺاءِ = جڏهن ڏٺا هيئي قُفِلَنِ = ڪُلِفَنِ، ڪُرِفَنِ، تالَنِ لَلِ = ريت، رمز، پر، حرفت، اٽڪل، نموني، تجويز، بهاني سَندِياءِ = تنهنجي، سندءِ ساروڻِي = يادگيري، سارَ، سنڀارَ بيت جو پس منظر ~ جڏهن ڏينهن ڏٺي جو اڱڻ تي ڌاريا اٺ ڏٺا هيئي. ~ تڏهن ڪنهن اٽڪل سان ڪلفن جون ڪنجون لڪائي رکين ها. ~ او سسئي ! تہ پرھ ڦٽيءَ ويل توکي ڳوليو وڃي ها. سمجهاڻي ڀٽائي سسئيءَ کي سمجهائيندي چئي ٿو : جڏهن ڏينهن جي روشنيءَ ۾ ٻاهران آيل ڌاريا اٺ ڏٺا هيئي تہ عقل ۽ هوش کان ڪم وٺي. در بند ڪري ڪلفن جون ڪنجون ڪنهن محفوظ جڳھ تي لڪائي رکين ها. صبح ٿيڻ کان اڳ دروازا بند ڏسي توکي ڳولين ها ۽ ڪنجين جي پڇا ڪئي وڃي ها. او سسئي تو غفلت ڪئي، تنهنجو عقل ۽ سمجھ تنهنجي ڪم نہ آيا. توکي ڌارين ماڻهن تي اعتبار نہ ڪرڻ گهرجي ها، نہ تہ هي هيڏو وڏو حادثو ۽ هاڃو پيش نہ اچي ها. ڀٽائي ڪنهن وڏي حادثي ۽ هاڃي کان اڳواٽ تياري ۽ رٿابندي جي صلاح ڏيندي خبردار ڪري ٿو تہ : ڌاري آبادڪاري ڌرتيءَ لاءِ سٺو سنئوڻ ناهي. اڄڪلھ سنڌ ۾ مهمان ٿي آيل ڌارين جا رولاڪ ٽولا، سنڌ جا غدار ۽ سنڌ دشمن حاڪم سنڌ ورهائڻ جي سازشن ۾ رڌل آهن. چونڊ، تحقيق ۽ تشريح محترم مظفر منگي صاحب جي ٿورن سان سندس فيسبوڪ وال تان ورتل ____
