رفعت مشرف ابڙو رب تعاليٰ هر انسان کي مختلف صلاحيتن ۽ جذبن سان نوازيو آهي، ڪجهہ انسان پنهنجي لاءِ جيئندا آهن، ڪجھه ٻين لاءِ روشني مثل هوندا آهن جيڪي رب جي خلقيل دنيا ۽ ان ۾ رهندڙ هر مخلوق لاءِ امن ۽ ڀلائي جو جذبو رکندا آهن ۽ انھن لاءِ وس آهر ڪوشش پڻ ڪندا آهن. اهڙي ئي هڪ شخصيت، شمس الدين “بلبل“ جِي پڙپوٽِي رفعت مشرف ابڙو به آهي، دنيا جي سمنڊ ۾ ان جو ڪم کڻي هڪ ڦڙي جيترو هجي پر مقصد عظيم آهي. “ بلبل“ خاندان جون سنڌي ٻولي ۽ مسلمانن لاءِ ڪيل خدمتون ڪنھن تعارف جون محتاج ناهن. مشرف الدين ابڙو ۽ رفعت ابڙو جي ڪوششن سان سنڌيالاجي ۾ “ شمس الدين بلبل“ ڪارنر پڻ کوليو ويو. رفعت ابڙو سوشيالوجي ۾ ايم.اي ڪئي آهي، ۽ غريب بي پهچ ماڻهن جي مدد جو جذبو رکي ٿي، سندس سوچ اها آهي ته معياري تعليم هر ٻار جو حق آهي. ملڪ ۾ امير ۽ غريب لاءِ تعليم جو هڪ ئي معيار هجڻ گھرجي ۽ ديني تعليم نصاب جو حصو هجي. هر ٻار کي ان جي ديني تعليم جي معنيٰ سندس ٻولي ۾ سمجھائي وڃي جنهن جو انتظام اسڪول ۾ ئي هجي. رفعت ابڙو پهنجي وَر مشرف الدين ابڙوجي مدد سان هڪ اداري “ شمس الدين بلبل فائونڊيشن“ جو بنياد وڌو جيڪو بي پهچ ماڻهن لاءِ اميد جو ڪرڻو آهي. هتي ٻارن کي ديني تعليم ۽ ٽيوشن ۽ ڪمپيوٽر ڪورسز بلڪل مفت ڪرايا ويندا آهن. نياڻين ۽ عورتن لاءِ تعليم بالغان جو پڻ انتظام آهي، ان کان علاوه غريب عورتن لاءِ گھريلو هنر جي سکيا جو پڻ انتظام آهي جنھن ۾ سلائي، برٿ، ٽڪ، رڌپچاءُ، بيوٽيشن ۽ ڪمپيوٽر ڪورسز شامل آهن جيڪي سڀ في سبيل الله سيکاريا ويندا آهن. شمس الدين بلبل فائونڊيشن ۾ ضرورت مند شاگرد اچي مستفيد ٿين ٿا ۽ پنهنجا ٻيا مسئلا پڻ ٻڌائن ٿا جن جِي ادِي رِفعت وس آهر مدد ڪندي آهي. ان ڪار خير ۾ ادِي رفعت سان گڏ سندس ور مشرف الدين ابڙو ۽ ڪجهہ فيملي ميمبرس ۽ ڄاڻ سُڃاڻ وارن جي مالي سهڪار پڻ آهي. انهن سماجي ڀلائي جي ڪمن ۾هيٺ ڏنل ڪم شامل آهن: نياڻين جو مناسب ڏاج، ڪنهن کي روزگار کولي ڏيڻ ۾ مدد، ڪنهن جو علاج ڪرائڻ، ڪنهن کي گھر ٺھرائڻ ۾ مدد ڏيڻ، بيواه عورتن جي گھر لاءِ راشن ۾ مدد ڏيڻ، معذورن لاءِ آسان روزگار جو بندوبست ۽ يتيم ٻارن جي تعليم جو خرچ ۽ اهڙا ئي ڪجهہ ٻيا ڪم پڻ شامل آهن. رمضان مبارڪ ۾ ضرورت مند ٻارن لاءِ عيد جا ڪپڙا ۽ سندن گھرن لاءِ راشن به مهيا ڪيو ويندو آهي جيڪو مختلف ڳوٺن ۾ ڏنو ويندو آهي. ان کان سواءِ هر جمعي تي عام ماڻهن لاءِ خيرات جوبندوبست ڪيو ويندو آهي. رفعت مشرف ابڙو جي ڪيل ڪمن ۾ ٿر جي هڪ ڳوٺ ۾ پرائمري اسڪول کولڻ ۽ ٻهراڙي ۾ ڪجهه گورنمنٽ اسڪول ايڊاپٽ ڪرڻ شامل آهن جيئن ته اهي اسڪول ننڍن ڳوٺن ۾ آهن جن ۾ گھڻي ڀاڱي غريب شاگرد آهن تن ۾ اسڪول يونيفارم، ڪتاب ۽ ٻيون شيون ڏيڻ به شامل آهن. هينئر رفعت مشرف ابڙو شمس الدين بلبل چيئر قائم ڪرائڻ ۽ شمس الدين بلبل جو سبق نصاب ۾ شامل ڪرائڻ لاءِ، جيڪو اڳ ۾ نصاب جو حصو هيو ۽ ڪجھ ماڻهن جي لاپروائي جي ڪري نصاب مان ڪڍيو ويو آهي ۽ ميهڙ ۾ شمس الدين بلبل جي ڪوششن سان ٺهرايل اسڪول تي سندس باني جو نالو پڻ رکائڻ لاءِ ڪوشش ڪري رهي آهي. ادي جي ڪيل سماجي خدمتن کي نظر ۾ رکندي فرينڊس ڪلب آف پاڪستان کيس 2 دفعه شهيد مُحترمه بينظير ڀٽو ايوارڊ سان نوازي ان جي حوصله افزائي ڪئي. ڀيڻ رفعت لاءِ دُعا آهي ته رب پاڪ کيس صحت عطا فرمائي ۽ سندس خوابن کي حقيقت جو روپ ڏئي جيڪي هو پهنجي ملڪ لاءِ ۽ ضرورت مند ٻارن لاءِ ڏسي ٿي ته هر ٻار جون بنيادي ضرورتون بنا تڪليف جي پوريون ٿين، جن ۾ کاڌو،گھر، لباس، علاج ۽ معياري تعليم شامل آهن . توهان هنن لنڪس تي ڪلڪ ڪري سندس ڪيل ڪجهہ سماجي ڪم ڏسي سگھو ٿا. www.sbf-pk.org https://web.facebook.com/profile.php?id=191490281248428&ref=br_rs ليکڪ: ثروت نعيم ابڙو.
