ممتاز علي وگهيو
سينيئر رڪن
متان وساريو ته...۔۔۔شاهه عبداللطيف ڀٽائي
ڀٽائي صاحب جو تڙ ڏاڏو شاهه ڪريم بلڙي وارو جيڪو سورهين صدي عيسوي جو عظيم سنڌي شاعر هو، ان جي ڪچهريءَ مان هن جو هڪ پڙ پوٽو جيئن ئي اتي پٺي ڏئي گهر روانو ٿيندو هو ته شاهه ڪريم هن جي ادب ۾ اٿي بيهندو هو. ايستائين هو اکين کان اوجهل ٿي ويندو هو.
جڏهن شاهه ڪريم اٿي بيهندو هو ته هن جي ڪچهري ۾ ويٺل مريدن سميت سڀئي ماڻهو اٿي بيهندا هئا، هڪ ڏينهن سندس مريدن کانئس پڇيو ته مرشد! اوهان پنهنجي ٻين پڙ پوٽن جي احترام ۾ ته ڪو نه اٿي بيهندا آهيو، هن لاءِ ڇو ٿا اٿي بيهو؟ ته وراڻيائين هن مان هڪ پٽ جو اولاد پيدا ٿيندو، مان ان جي احترام ۾ اٿي بيهندو آهيان!!
شاهه ڪريم جو اهو پڙ پوٽو شاهه حبيب هو ۽ جنهن جي احترام ۾ بلڙيءَ واري شاهه ڪريم جهڙو عظيم سنڌي ڪلاسيڪل شاعر ۽ صوفي بزرگ اٿي بيهندو هو، سو سنڌ ۽ سنڌي ٻولي جو عظيم شاعر شاهه عبداللطيف ڀٽائي هو.
سنڌ جي ان ماضيءَ، حال ۽ مستقبل جو يوم ولادت اڄ ان وقت شروع ٿيندو جڏهن پهرين رجب وارو ڏينهن سج لهڻ مهل پورو ٿيندو ۽ رجب جي ٻي تاريخ جو وار جهڙو سنهڙو چنڊ آسمان جي اڀرندي سطح تي اڀري ايندو ۽ ڪنهن کي نظر ايندو ته ڪنهن کي نظر نه به ايندو.
اسان سنڌي روايتي طور مڙني بزرگن جا رڳو عرس ڪندا آهيون جيڪي سندن وفات جا ڏينهن هوندا آهن، پر انهن شخصيتن جا جنم ڏينهن ورلي ملهائيندا آهيون، اها رسم ايشيا، هند، سنڌ ۽ پنجاب ۾ هڪ جهڙي آهي.
پر ڊاڪٽر ايڇ ٽي سورلي پنهنجي جڳ مشهور ڪتاب ”شاهه لطيف آف ڀٽ“ ۾ ٻين تفصيلن کان علاوه ڀٽائي صاحب تي جيڪو اهم باب لکيو آهي ان جو عنوان آهي Birth of a Classic (هڪ ڪلاسيڪل شاعر جو جنم)
سو متان وساريو ته سنڌ ۽ هند سميت مذهبي جنونيت جي ماريل هن ڌرتي جي گولي کي هن عظيم ڪلاسيڪل سنڌي شاعر جو جنم ڏينهن مبارڪ هجي.
بشڪريه عوامي اواز
