عرس پريو
سينيئر رڪن
خواب تو واري جي خوشبو، اڄ به منهنجي من ۾ آ،
باغ جي هٻڪار هوندي واء جي جهلڪن ۾ آ۔
آس هڪ اڀري ٿي پئي پر پوهه جي سورج جيان،
روشني، سردي وڌي ڪئي قيد ڪوهيڙن ۾ آ۔
زندگيء جي سرخرو ئي ڪجهه ته منهنجي سڪ ۾ آ،
ڪجهه ته تنهنجي ريشمي ميندي رتن هٿڙن ۾ آ۔
چنڊ جو چمڪو، گلن جي مهڪ ، چقمق جي ڪشش،
دلڪشيء جو ڪيڏو سهڻو سلسلو سهڻن ۾ آ۔
گفتگو ماکي به آمصري به آ ڪشمش به آ،
ڪل مٺاڻن جومزو تنهنجي مٺن گفتن ۾ آ۔
تون نه ساقي مان نه ميڪش، بزم ناهي ميڪدو،
شوق جو آ ڪرشمو، ڪيڏو نشو نيڻن ۾ آ۔
عشق کوٽو، حسن ڪوجهو، ٿي چڪو هي حادثو،
چونء پچونء ڳوٺن ۾آهي، هوشرو شهرن ۾ آ۔
جرڪ پنهنجي مرڪ جي استادجي ڳوڙهن ۾ ڏس،
سج جي ڪرڻن جي رونق ماڪ جي قطرن ۾ آ۔
