ڦلپوٽو فقير
سينيئر رڪن
ڪراچي ۾ ڌرڻي لاءِ ويندڙ جسقم جي قافلي تي هٿياربندن جي فائرنگ ۾ جسقم ضلعي ٺٽي جو صدر قتل ٿي ويو ۽ 3 ڪارڪن زخمي ٿي پيا، جڏهن ته بشير قريشي جي گارڊز جي جوابي فائرنگ ۾ 3 هٿياربند مارجي ويا ۽ هڪ زخمي ٿي پيو. جسقم چيئرمين بشير خان قريشي چيو آهي ته حملو سندن تحريڪ کي ناڪام ڪرڻ جي سازش آهي. جسقم جو قافلو ملير کان سپر هاءِ وي تي تي ڌرڻي لاءِ وڃي رهيو هو ته صفوران چورنگي وٽ اڳواٽ لڪي ويٺل موٽر سائيڪل هٿياربندن قافلي تي انڌا ڌنڌ فائرنگ ڪري ڏني، جنهن جي نتيجي ۾ جسقم ضلعي ٺٽي جو صدر مشتاق خاصخيلي مارجي ويو ۽ 3 ڄڻا زخمي ٿي پيا، جڏهن ته بشير خان قريشي جي گارڊز جي جوابي فائرنگ ۾ 3 هٿياربند مارجي ويا ۽ هڪ زخمي ٿي پيو. مارجي ويل هٿياربندن وٽان مليل سڃاڻپ ڪارڊن مان سندن سڃاڻپ زاهد مصطفى ۽ ذوالفقار طور ڪئي وئي آهي. جڏهن ته زخمي هٿياربند ٻڌايو ته کين جسقم جي چيئرمين بشير خان قريشي کي قتل ڪرڻ جو ٽاسڪ مليل هو. جسقم چيئرمين بشير خان قريشي ميڊيا سان ڳالهائيندي چيو ته حملو سندن تحريڪ کي ناڪام ڪرڻ جي ڪوشش آهي. هن چيو ته هو حملي باوجود سنڌ جي قومي حقن لاءِ هلندڙ تحريڪ جاري رکندا. ٻئي طرف ٽي پي او گلشن اقبال پوليس، عارب مهر هڪ هٿياربند جي مارجڻ ۽ هڪ جسقم ڪارڪن جي زخمي ٿيڻ جي تصديق ڪئي آهي. جيئي سنڌ قومي محاذ پاران پارٽي ڪارڪن ذوالفقار ملاح جي قتل خلاف سپر هاءِ وي تي ڌرڻي جو اعلان ڪيو ويو هو. جسقم قافلي تي حملي خلاف ڪراچي جي سنڌي وسندين سميت مختلف شهرن ۾ احتجاج جو سلسلو شروع ٿي ويو آهي.
(سنڌ ٽي وي نيوز جي ٿورن سان)
