عورت تحريڪ جي دشمنن جي نانءُ

عورت تحريڪ جي دشمنن جي نانءُ

حسن مجتبيى

اوھين عورتن تي ڪھاڙيون ۽ ڪاتيون
ھٿوڙا ۽ ڏاٽيون کڻي آھيو نڪتا
ساوا ۽ سرخا
اوھين نيرا پيلا
چنيسر ۽ ليلا
اوھين پاڻ ڪونئرو
اوھين مڙس ماڻھو
اوھين ٽوپيون لويون
اوھين واهه ڙي واهه آئون
اوھين واهه ڙي واهه تون
اوھين منڊ مانڊي
اوھين يار پانڊي
اوھين مال ويڪو
اوھين پٽ اھڙا
وڏي واڪ جيڪي
ھٽن تي جي وڪجن
چڪي تي جي بڪجن
اوھين ماءُ جي ڀي نه نٿ کان مڙيا جي
شھيدن جي وڌوا سان ويساھ گھاتيون
اوھين پٽ کاٽو
اوھين چگهه لاٽون
اوھين يار ڪاٽو
اوھين يار واڌو
حسابي ڪتابي
ڪي ڪالم نگاري
شرابي ڪبابي
ڪي ڌاڙيل قلمي
بگھڙ ڪي بکايل
ڪي سڃا ڪي ساوا
ڪي پوءِ ڍاول
ڪي يار مار تن مان
ڪي پرمار، پيارا
ڪي ڪٽڻيون ڪي ڪٽڻ
ڪي اڇا ڪپڙا مگر کيسا خالي
ماڻھن جي ليکي سڄي سنڌ جا والي
ڪي گاريال گستاخ
ڀاڙيا ۽ گيدي
جلادن جا ساٿي
۽ عورت جا دشمن
اوھين گھوٽ آھيو
اوھين ڄڃ وائڙي
وڏي واڇ گيدو
اوھين وات ڪٽلي
اوھين جعفر زٽلي
اوھين پال ڀاڙيا
اوھين ساڙ ساڙيا
ڪي لنڊيون لڪائي
ھلو پيٽ ۾ ٿا
اوھين بيوفائي
اوھين پٺ ۾ خنجر
لٻاڙي لفاظي
اوھين کير کريل
اوھين گينگ آھيو
وڏي رھزنن جي
اوھين رات آھيو ڪا چورن جي اوڻٽيهه
اوھين باک جھڙين ڀلارين جا ويري
اوھين ديس جي ھن دلارين جا ويري
ڀٽائي جي وائين ھن سارين جا ويري
اوھين سون ورنين سريکين جا ويري
اوھين ڪک ڪيري
اوھين ڌوڙ ڌاڻيون
پٽن جن کي نياڻيون
نماڻيون سياڻيون
اوھين مارئين لاءِ عمر کان به بدتر
اوھين سون تي به ڇڏيو سيڻ مٽيو
اوھين ٻاگھين جي ٿا ٻولي لڳايو
اوھين وياءُ وکرو
اوھين چور چاليھه
اوھين سج دشمن
اوھين چنڊ دشمن



روزانه عبرت تان ورتل

 

جواب: عورت تحريڪ جي دشمنن جي نانءُ

تمام بهترين ادا سليمان