شاهه عبداللطيف ڀٽائيء جو جنم ڏينهن - سنڌ ۽ سنڌين کي مبارڪون عاشَق زهر پِياڪَ، وِهُ ڏسِي وِهُسَنِ گھڻو؛ ڪڙي ۽ قاتلَ جا، هميشہ هيراڪَ؛ لڳين لنؤ، لَطِيفُ چئي، فَنا ڪيا فِراقَ؛ توڻي چِڪَنِنِ چاڪَ، ته به آهَ نه سَلِن عامَ کي سنڌ ۾ اهو ڏٺو ويو آهي ته بزرگن ۽ شاعرن جون عرس جون تقريبات ته وڏي ڌام ڌوم سان ٿينديون آهن ۽ انهن کي سرڪاري طور به ملهايو ويندو آهي پر سنڌ جي ڪن ڏاهن اها ڪوشش ڪئي هئي ته انهن هستين جي جنم ڏينهن تي به ڪي خاص پروگرام ڪرڻ گهرجن۔ وري جي انهن هستين مان عظيم شاعر شاهه عبداللطيف ڀٽائي جو جنم ڏهاڙو هجي ۽ سنڌي قوم ان ڏينهن کي نه ملهائي ۽ پنهنجي محسن کي ان ڏينهن داد نه ڏئي ته ڪو سٺو سنئوڻ ڪونه لڳندو آهي۔ شاهه عبداللطيف ڀٽائي پنهنجي شاعريء ذريعي جيڪو پيغام ۽ فهم اسان تائين پهچايو آهي ان جي هوندي ڪڏهن به سنڌي ٻوليء جي ختم ٿيڻ جو سوال ئي پيدا ڪونه ٿو ٿي۔ اسان وٽ هر تقريب ۾ جيڪڏهن شاهه لطيف جا بيت پيش نه ٿين ته اها محفل ڄڻ ته اڌوري لڳندي آهي۔ ڀٽائي جيڪو ڪنهن بحر کان گهٽ ڪونهي، جنهن جو فلسفو ۽ پيغام ڪنهن عام ماڻهوء جو ناهي۔ ڀٽائي به هڪ بحر بي ڪنار آهي. ان ڪري هن پاڻ لکيو آهي ته: ”سيوا ڪر سامونڊ جي، جت جر وهي ٿو جال سوين وهن سير ۾ ماڻڪ موتي لال جي ماسو ملئه مال ته پوڄارا پُر ٿين“ واقعي ڀٽائي سمنڊ آهي ۽ اسان کي جيڪڏهن هن جي اندر ۾ موجود خزانن مان هڪ ماسو به ملي وڃي ته اسان جي زندگي پر ٿي وڃي. اسان جيڪي سڪڻا آهيون ۽ انهن سامونڊين جي ڪنارن تي اداسيءَ سان انتظار ڪريون ٿا، جن جي ڪيفيت کي بيان ڪرڻ لاءِ ڀٽائيءَ سُر سامونڊي لکيو. هڪ اهڙو سر جنهن جا بيت سرد راتين جي آڪاش تي چمڪندڙ ستارن جهڙا آهن. اهي بيت جن ۾ وڇوڙي جو وڍ آهي. جنهن ۾ هڪ دعا جهڙي بددعا ڏيندي وڻجاري پنهنجي ور لاءِ چوي ٿي ته: ”وسري ويئي شال جو تو سودو سکيو اڃان آئين ڪالهه ٿو وڃڻ وايون ڪرين“ لطيف جو پيغام اسان لاء هدايت سان گڏ جستجو ۽ محنت جو پيغام آهي۔ لطيف سائين ڪنهن حال يا ماضي جو نه پر هر دور جو شاعر آهي۔ ڪَؤنرَ پاڙُون پاتارَ ۾، ڀَؤنر ڀِري آڪاسِ؛ ٻِنين سَندي ڳالِھڙي، رازِقَ آندِي راسِ؛ تَنهِن عِشقَ کي شاباسِ، جَنهِن مُحبَتي ميڙِيا اڄوڪو ڏينهن اسان لاء ڀاڳن ڀريو ڏينهن آهي جنهن ڏينهن سنڌ جو هي ڏاهو ڏات ڌڻي، عظيم شاعر ۽ رهنما جو جنم ٿيو۔ ان ڏينهن جي مناسبت سان سنڌ سلامت پاران سڀني سنڌين کي واڌيون هجن۔ نُورِي ۽ نارِي، جوڳِــيَڙا جَهانَ ۾؛ ٻَري جن ٻارِي، آءٌ نه جِئندِي اُنِ ري.
جواب: شاهه عبداللطيف ڀٽائيء جو جنم ڏينهن - سنڌ ۽ سنڌين کي مبارڪون سنڌ جي مهان ۽ عظيم هستي، سنڌ جي ڪنڊ ڪڙڇ جي نمائندگي ڪندڙ آواز جو مصنف، ڀٽ جي گهوٽ، خدا جي پياري ولي ۽ عاشق رسول حضرت شاهه عبداللطيف ڀٽائي جو جنم ڏيهاڙو دنيا جي سڀني سنڌين کي مبارڪ هجي۔ سليمان صاحب ، شاهه صاحب جا بهترين شعر ونڊڻ تي مهرباني۔
جواب: شاهه عبداللطيف ڀٽائيء جو جنم ڏينهن - سنڌ ۽ سنڌين کي مبارڪون يار سليمان! اصل چمڻ جهڙو ونڊ ڪيو اٿئي ۔۔۔ سهڻي رهبر ۽ سنڌ جي گهوٽ جون سنڌ، سنڌي ٻولي ۽ سنڌي فڪر جون وضاحتون اسان لاءِ رهنمائي آهن ۔۔۔ سنڌ جي هن لاکيڻي لطيف سنڌي ٻوليءَ کي امر ڪري ڇڏيو آهي ۔۔۔ جيستائين لطيف جو ڪلام اسانجي هٿن ۾ آهي تيستائين سنڌي ٻولي جيئري رهندي ۽ جيستائين سنڌي ٻولي جيئري رهندي تيستائين لطيف جي رهنمائي به اسانجي مٿان ڇپر ۽ ڇانوَ ٿي رهندي ۔۔۔ سلام لطيف ۔۔۔ سلام سنڌ ساري رات سبحان، جاڳي جن ياد ڪيو، تن جي عبدالطيف چئي، مٽيءَ لڌو مان، ڪوڙين ڪن سلام، اچيو اڱڻ انـــجي۔
جواب: شاهه عبداللطيف ڀٽائيء جو جنم ڏينهن - سنڌ ۽ سنڌين کي مبارڪون شاهه صاحب مهرباني لطيف جي شاعري هر دور جي شاعري رهي آهي، بلڪل هو عاشق رسول سان گڏ ولي الله به رهيو آهي پر سندس وڏو ڪارنامو سندس شاعري آهي، جنهن سنڌي ٻوليء کي جيئدان ڏنو۔
جواب: شاهه عبداللطيف ڀٽائيء جو جنم ڏينهن - سنڌ ۽ سنڌين کي مبارڪون سائين نثار سلام لطيف سرڪار جو جنم ڏينهن ملهائڻ جو رواج پهريان ڪونه هو پر ڪجهه سالن کان هن ڏينهن کي ياد ڪري ملهايو پيو وڃي۔ لطيف جي رسالي ۽ لطيف جي شاعريء کي ياد ڪرڻ ۽ ان تي عمل ڪرڻ اسان جو فرص به بڻجي ٿو۔ تو جنِين جي تاتِ، تن پڻ آهي تنهنجي؛ ’فَاذۡڪُرُونِي اَذڪُرۡ ڪُمۡ‘، اِيَ پَرُوڙِج بات؛ هَٿِ ڪاتي ڳُڙُ واتِ، پُڇَڻُ پَرِ پِرِين جي.
جواب: شاهه عبداللطيف ڀٽائيء جو جنم ڏينهن - سنڌ ۽ سنڌين کي مبارڪون ڀٽ جي گهوٽ، خدا جي پياري ولي ۽ عاشق رسول حضرت شاهه عبداللطيف ڀٽائي جو جنم ڏيهاڙو دنيا جي سڀني سنڌين کي مبارڪ هجي۔ توڙي جو منھنجو گھر ڀٽ شاه ۾ آھي پر بد قسمتي سان ھن دفعي سائين جي جنم ڏھاڙو ملائڻ لا ڀٽ شاھ نه وڃي سگھيس
