اياز گُل سنڌ جي خوبصورت شاعرن مان هڪ آهي جن پنهنجي غزل سان ماڻهن کي موهيو آهي۔ سندس شاعري جو هي ڪتاب ” تو بن ڪهڙا ڇانورا ” ۾ غزل، گيت، وايون، نظم، هائيڪا، ترايل ۽ ٽسٽا شامل آهن۔ ڪتاب جو مهاڳ محترم شيخ اياز جو لکيل آهي۔ هن ڪتاب مان هڪ غزل پيش آهي:
ياد جڏهن ڪي آيا نيڻ
لڙڪن سان وهنجايا نيڻ
اوسيئڙي ۾ پٿر ٿي ويا
ڪين مگر پڇتايا نيڻ
ڳوڙها، عڪس ، اوجاڳا، سپنا
ڪيڏا تو ورسايا نيڻ
چَپڙن جي سهڪار سان تهنجا
رات اسان پرچايا نيڻ
نرمل نيڻن واري ماڻهوء
منهنجا ڪين اگهايا نيڻ
پوء به اوکيء جاء اڙيا هن
ڪيڏا مون سمجهايا نيڻ
شاعريء جو هي ڪتاب اي بوڪ جي صورت ۾ سنڌي ادبي سنگت شاخ سٽي سکر جي ويب سائيٽ تي محترم عبداللطيف انصاري جي ڪاوشن سان متعارف ڪيل آهي۔
