[JUSTIFY] السلام عليڪم ورحمة الله اڪثر ڪري ترجمي سان قرآن پاڪ جي تلاوت ٻڌڻ لاءِ يو ٽيوب تي ڦيرو ڀربو رهبو هو. يو ٽيوب تي سنڌي ترجمي سان تلاوت ٻڌڻ لاءِ گهڻي کوجنا ڪرڻ باوجود به ڪا ويڊيو ملي نه سگهبي هئي. انهيءَ وقت خيال ايندو هو ته ڇونه انهيءَ ڀلاري ڪم کي ڪرڻ ۾ اڳرائي ڪجي. پر ويڊيو ايڊيٽنگ کان ناواقفيت هجڻ ڪري، هميشه وقت پيو ٽاريندو رهندو هيس. آخر هڪڙي ڀيري ڪوشش ڪري ونڊوز مووي ميڪر ۾ هڪڙي ويڊيو تيار ڪري ورتم، پر انهيءَ جي سائونڊ ڪوالٽي تمام خراب هئڻ ڪري، تسلي نه ٿي. انهيءَ کان پوءِ ويڊيو ايڊيٽنگ لاءِ سوني ويگاس سافٽويئر جو استعمال ڪيم. جلد ئي احساس ٿيو ته هي هڪ ٿڪائيندڙ ڪم آهي. انهيءَ ڪري پاور پوائينٽ ڏانهن متوجهه ٿيم. گهڻائي ڏينهن ته ٽيمپليٽ تيار ڪرڻ ۾ لڳي ويا. منهنجو خيال هيو ته ڪا اهڙي ٽيمپليٽ تيار ڪجي، جيڪا پهرين پاري کان آخري پاري تائين ڪم اچي. قرآن پاڪ جي عربي متن لاءِ Pak Quran in Word جو انتخاب ڪيم ۽ سنڌي ترجمو مولانا تاج محمود امروٽيءَ جو ڏيڻ جو سوچيم. پر جيئن ته هي قديم ترجمو آهي، انهيءَ ڪري مولانا محمد مدنيءَ جو سنڌي ترجمو لڳايم. (آخري ڪجهه سورتن ۾ مولانا تاج محمود امروٽيءَ جو ترجمو آهي) هڪڙو وڏو مسئلو قرآن پاڪ جي تلاوت جو انتخاب هيو. انهيءَ لاءِ شروع ۾ محمود صديق منشاويءَ جي تلاوت لڳايم. هن قاري جي تجويد جو هڪڙو انداز هڪڙي آيت کي ٻي آيت سان گڏائي پڙهڻ جو آهي. جنهن ڪري سنڌي ترجمو پڙهڻ جو وقت گهٽ ملي رهيو هيو. انهيءَ کان پوءِ پنهنجي پسنديده قاري محمود خليل الحصريءَ جي تلاوت جو انتخاب ڪيم. ننڍي آيت هجي يا وڏي، هي قاري هر آيت تي وقف ڪري ٿو. شروع ۾ ڪنهن به سورت جي هر آيت کي سيپريٽ ڪرڻ لاءِ الڳ الڳ ريڪارڊنگ ڪيم، جنهن ۾ تمام گهڻو وقت ضايع ٿيڻ لڳو. پر پوءِ خوش قسمتيءَ سان انٽرنيٽ تي تلاش ڪندي، متنخب ٿيل تلاوت جون الڳ الڳ آيتون ملي ويون. جنهن کان پوءِ سلائيڊ جي ٽائمنگ جو ته مسئلو حل ٿي ويو، البته انيميشن کي بالڪل به ختم ڪري ڇڏيم. پاور پوائينٽ جي پريزينٽيشن تيار ڪرڻ کان پوءِ هڪڙو وڏو مسئلو انهيءَ کي ويڊيو ۾ تبديل ڪرڻ جو هيو. جنهن لاءِ پڻ مختلف سافٽويئر ڊائونلوڊ ڪيم ۽ آخرڪار پاور پوائينٽ جي پريزينٽيشن کي ويڊيو ۾ تبديل ڪرڻ لاءِ هڪڙو بهترين سافٽويئر Wondershare PPT to Video ڊائونلوڊ ڪيم. جنهن ذريعي هائي ڪوالٽي ۾ ويڊيو تبديل ڪرڻ بالڪل آسان ٿي پيو. بهرحال ابتدائي مرحلي ۾ هي پروجيڪٽ تمام ڏکيو لڳي رهيو هيو، پر رب سائين پنهنجو خاص ڪرم ڪيو ۽ آساني پيدا ٿيندي وئي. اڄ الحمدلله ٽيهون سيپارو مڪمل ٿي چڪو آهي، جنهن جي هڪ هڪ سورت الڳ الڳ موضوع ۾ شيئر ڪري چڪو آهيان. دوستن جي سهولت لا سمورين سورتن کي سنڌ سلامت ٽيوب تي جمع ڪيو اٿم ته جيئن دوستن کي پڙهڻ ۽ ڪابه سورت تلاش ڪرڻ ۾ آساني ٿئي. جيئن ته هي سمورو ڪم مون اڪيلي سر انجام ڏنو آهي. يقينا ڪي غلطيون ۽ خاميون به رهجي ويون هونديون. ڪجهه خامين ڏانهن اڳ ۾ ئي دوستن توجهه ڏياري هئي، جن کي درست ڪيو ويو آهي. آخري ڪجهه سورتن جي ويڊيو ڪوالٽيءَ واري نه آهي، ان شاءَ الله اڳتي هلي انهن کي ايڊٽ ڪيو ويندو. سنڌي ترجمي جي ڪمپوزنگ ۽ پروف ريڊنگ ۾ ڪافي ٽائيم لڳي ٿو. تنهن ڪري دوستن کي عرض آهي ته ڪنهن به غلطيءَ جي صورت ۾ فورا نشاندهي ڪئي وڃي ته جيئن اصلاح ڪري، ويڊيو ٻيهر اپ لوڊ ڪجي. آخر ۾ ڌڻيءَ در دعا آهي ته منهنجي هن حقير ڪوشش کي قبول فرمائي. صحت ۽ توفيق عطا فرمائي ته جيئن باقي سيپارن تي به جلد کان جلد ڪم شروع ڪري سگهان. سنڌ سلامت ٽيوب تي سنڌي ترجمي سان ٽيهين سيپاري جي تلاوت ٻڌڻ لا هن لنڪ تي وڃو: http://www.sindhsalamat.com/media.php?do=category&cid=56 [/JUSTIFY]
جواب: (30) ٽيهين سيپاري جي ويڊيو تلاوت (سنڌي ترجمي سان) ماشاء الله ! دوست ابو زين صاحب يقين ڪيو قرآن مجيد سان محبت جو ثبوت جيڪو اوهان ڏنو آهي سا قابل تعريف آهي ، هڪ وڏو ديني ڪم آهي جنهن کي اوهان احسن طريقي سان ترتيب ڏئي ونڊ ڪيو آهي ، الله تعالى ضرور اوهان کي هن جو اجورو ڏيندو۔ انشاء الله وقت سر سڀئي سورتن کي پڙهبو جيڪر ڪا غلطي نظر آئي ته ضرور اوهان کي اطلاع ڏيندا سون جئين اصلاح جو ڪم مڪمل ٿي وڃي ، آخر ۾ ٻيهر اوهان کي لک شابسون هجن اميد آهي ته اهو ديني جذبو کڻي پنهنجي جستجو جاري رکندا ، مهرباني
جواب: (30) ٽيهين سيپاري جي ويڊيو تلاوت (سنڌي ترجمي سان) سائين جزاڪم الله تمام بهترين ڪم آهي الله تعالى توهان کي ان جو اجر عطا فرمائيندو ۔
