سنڌ ڪارڊ ۔۔۔۔۔۔۔۔ سنڌي عوام وٽ آهي۔۔۔

[رشيد سمون]

مون کي هميشه پنهنجي سنڌي اڳواڻن ۽ ليکڪن کان شڪايت رهندي آهي ته اسان سنڌين جو موقف يا سنڌيت بابت اظهار غير سنڌين سان درست طريقي سان واضح طور ڪري نه سگهندا آهن۔۔ ان جو سبب اڙدو زبان جو گهٽ اچڻ هجي يا وري اسان سنڌين جو فطرتي طور ڌارين کي پاڻ کان وڌيڪ عقلمند سمجهڻ هجي پر ان سلسلي ۾ هڪ عام سنڌي کي مون وانگر ساڳي شڪايت رهندي آهي۔۔۔

منهنجي آفيس ۾ انگريزي اخبار سان گڏ روزانو امت اڙدو اخبار به ايندي آهي۔۔۔ جنهن جي خصوصيتن ۾ هڪ ڀلي خاصيت اها لڳندي آهي ته ڪراچي جي هر واقعي کي ڪنهن کان ڊڄڻ کان بغير درست طريقي سان فوڪس ڪندي آهي۔۔ هن اخبار جي آرٽيڪلس ۾ محترم الطاف شيخ ۽ محترم اعجاز منگي جو آرٽيڪل پڙهڻ نه وساريندو آهيان۔۔۔

سنڌين طرفان گذريل ٻن هڙتالن جو اثر اهڙو رهيو جو اهو ڌاريو جيڪو اسان سنڌين کي خاموش ۽ دنيا مافيها کان بيخبر سمجهندو هو اسان کي حيرت سان ڏسي رهيو آهي۔۔۔ هو حيران آهي ته اهڙي قوم جيڪا هڪ ئي ڏينهن ۾ پنهنجي جذبن سان ڪنهن جابر کي معافي وٺڻ تي مجبور به ڪري ٿي ته مطلب پرست حڪومت کي پنهنجي فيصلن ۾ تڪڙو ترميم ڪرڻ تي مجبور ڪري ٿي سا پنهنجا حق وٺڻ لاءِ ڪنهن به وقت طوفان مچائي سگهي ٿي۔۔۔

اڄوڪي امت اخبار ۾ محترم اعجاز منگي ۔۔۔۔ ان خاموش ۽ امن سان رهندڙ سنڌ جو ذڪر ڪيو ۽ ذڪر به اهڙو ڪيو جو ڌارين کي پنهنجي مقصد ۽ سنڌيت جي پرچارڪ جو درس به ڏئي ڇڏيو ۔۔ ۔ سندس امت اخبار ۾ لکيل هي آرٽيڪل اڙدو هجڻ باوجود ان ڪري ونڊ ڪجي ٿو ته متان توهان جي آسي پاسي ڪو غير سنڌي هجي جنهن اڳيان توهان کي به نڊر ۽ بهادر سنڌي پنهنجي سنڌ ڪارڊ سميت ثابت ڪرڻو پوي۔۔۔

حاضر آهي محترم اعجاز منگي جو ڪالم ۔۔۔۔۔۔۔۔۔۔۔ سنڌ ڪارڊ

 

[رحيم بخش]

جواب: سنڌ ڪارڊ ۔۔۔۔۔۔۔۔ سنڌي عوام وٽ آهي۔۔۔

سائين زبردست ڪالم آهي اهڙا ڪالم نگار جيڪڏهن سنڌ جي وڪالت ڪندا ته انشآء الله سنڌ پنهنجي اصلي ۽ حقيقي مقام ماڻڻ ۾ ضرور ڪامياب ٿيندي هن ڇنڇر تي تاريخي هڙتال واقعي گهڻن جون اکيون کولي ڇڏيون سنڌي قوم ۾ ڪنهن معاملي ۾ به ڪمي نه آهي فقط هڪ پيلٽ فارم تي جمع ٿيڻ جي ضرورت آهي ڪاش اهڙو ڪو با شعور اچي جو سڀني سنڌين کي پاڻ ۾ ملائي هڪ ڪري پوء سنڌي جوڌن جي قوت جو مشاهدو ڪيو وڃي ته سنڌ جا ارڏا نوجوان ڪهڙو خون رکن ٿا سندن خون جي خوشبوء نه رڳو پنهنجي ملڪ بلڪه پوري دنيا کي حيران ڪري ڇڏيندي جناب اعجاز منگي تمام بهترين ڪالم نويس آهي الله تعالى اهڙن دانشورن جي قلم کي مزيد قوت عطا فرمائي جو اهڙن ڪالمن ذريعي ممڪن آهي ته اسان سنڌين ۾ متحد ٿيڻ جو شعلو ڀڙڪي پوي ۽ اسان هڪ ٿي پوري دنيا ۾ پنهنجي قوت جو نمايا اظهار ڪرڻ ۾ ڪامياب ٿي وڃون۔ انشآء الله تعالى۔​

 

[عبدالحفيظ لغاري]

جواب: سنڌ ڪارڊ ۔۔۔۔۔۔۔۔ سنڌي عوام وٽ آهي۔۔۔

سنڌين اکيون ٻوٽي پي پي پي تي اعتبار ڪيو آهي۔ پر انهن هميشه هنن کان وؤٽ وٺي پوءِ پنهنجن مفادن لاءِ سنڌين جا ئي جذبا مجروح ڪيا آهن۔ هاڻي سواءِ قؤمپرستن جي ٻيو هو آپشن ناهي۔ پر انهي لڏي وٽ سواءِ سٺن اڳواڻن ۽ سٺي نظرئي جي باقي ڪل خير آهي۔ ڪاش هنن جي ٽيم سٺي ٿي پئي ۽ عملي سياست ۾ اچن ته هوند سنڌ جو ڀلو ٿي پئي۔ سنڌ واسي جيڪي هنن جي هڪڙي سڏ تي سنڌ جو پيغام پنهنجن غدارن ۽ ڌارين ڌرتي دشمنن کي پهچائيندي دير ئي نه ٿا ڪن۔ سو هي کين پنهنجي اکين تي ويهاري پنهنجي هن سهڻي سنڌ جي امان هنن جي هٿ ۾ ڏيندا۔ بس رڳو ٿورو هي پنهنجو قبلو درست ڪن۔

 

[سليمان وساڻ]

جواب: سنڌ ڪارڊ ۔۔۔۔۔۔۔۔ سنڌي عوام وٽ آهي۔۔۔

مان هن کي ڪڏهن به سنڌ ڪسارڊ نه سڏيندس پر سنڌين جي طاقت سڏيندس ۔۔۔۔۔۔۔۔۔ ڪارڊ اهو هوندو آهي جيڪو اسان جي هٿن ۾ هجي ۔

سنڌ ڪارڊ جي دعوى پ پ پ اڃان به ڪندي جيستائين هن کي سنڌي عوام سياسي طرح نه ٿو ٺڪرائي۔ هاڻوڪي هڙتال نه ته ڪنهن دهشت گرد گروپ جي هئي، نه وري ڪنهن جاگيردار يا وڏيري جي پر سنڌي عوام جي هئي جنهن کي سنڌي عوام ڪامياب ڪيو۔ ويجهي تاريخ ۾ اهڙي هڙتال شايد ئي ڪڏهن ٿي هجي جنهن ۾ ڪشمور کان ڪراچي ۽ ڪينجهر کان ڪيٽي بندر تائين نه دڪان کليا نه ڦيٿو ڦريو۔

هڪ هڙتال مان اسان جي قومپرست سياستدانن کي اهو سمجهڻ گهرجي ته اهو سڀ گڏ ٿيڻ ۽ هڪ ٿيڻ جي نتيجي ۾ ٿيو آهي۔ مان هتي اهو به واضح ڪندو هلان ته هن هڙتال کي ڪامياب ڪرڻ ۾ پ پ پ جي ورڪرن جي هڪ وڏي انگ جو پڻ هٿ هيو جن پنهنجي قيادت ۽ پنهنجي انهن بي ضمير وزيرن ۽ ميمبرن کي ڄڻ ته ٺڪرائي اهو اعلان ڪيو ته سنڌ امڙ جي خلاف ڪيل فيصلا هنن کي قبول ناهن ۽ هو هر ان حڪم ۽ فيصلي کي ٺڪرائيندا جيڪو سنڌ جي سالميت جي خلاف هوندو۔

هاڻي ڳالهه اتي ختم ٿيڻ نه گهرجي پر هن تحريڪ کي هڪ نئون رخ ڏيڻ گهرجي ها پر ماٺار ڇانيل آهي ۽ قومپرست قيادت اڳتي ڪهڙا قدم کڻندي ان جو انتظار آهي۔

اعجاز منگي حقيقتن تي ٻڌل ڪالم لکيو آهي۔