ملڪاڻي شريف (نمائنده ڪاوش) ملڪاڻي شريف سميت ڀرپاسي ۾ ٽن مهينن کان بيٺل برساتي پاڻي نيڪال نه ٿيو، خبر موجب ملڪاڻي شريف سميت يوسي خيرپور گمبو ۽ يوسي پنگريو جي سوين ڳوٺن مان ٽي مهينا گذرڻ باوجود برساتي پاڻي نيڪال نه ٿي سگهيو، ان سلسلي ۾ سنڌ جو ناليوارو آبپاشي ماهر ادريس راجپوت ملڪاڻي شريف پهتو، جتي هن ملڪاڻي شريف سميت ٻڏل خيرپور گمبو، سمن سرڪار، پير حامد علي شاهه راشدي ۽ ٻين علائقن جي تازي صورتحال جو معائنو ڪيو، ادريس راجپوت چيو ته خيرپور گمبو يوسي کي ايم ايم ڊي ڊرين سم نالي ٻوڙيو، مستقبل ۾ اهڙا اپاءَ ورتا وڃن ته جيئن ايتري وڏي تباهي کان بچي سگهجي، هن چيو ته ايريگيشن وارن کي برساتن دوران واهه اڳ ۾ بند ڪرڻ کپندا هئا، جيڪو هنن نه ڪيو پر اهڙو عمل هنن هروڀرو نه ڪيو، هن چيو ته سم نالن جي کوٽائي ڪرڻي پوندي، جنهن ۾ ايل بي او ڊي پڻ شامل آهي، ٻيو ته برساتن جي درست اڳڪٿي ٿيندي ئي واهه بند ڪرڻا پوندا، هن چيو ته سياسي مداخلت سبب سم نالن ۽ ڍورن تي ٿيل ناجائز اوڏاوتون هٽائڻ انتهائي مشڪل آهي پر اهي ڪنهن به حالت ۾ هٽائڻ کپن، هن چيو ته هڪ سال ۾ سمورو تباهه ٿيل سسٽم ته نٿو ٺاهي سگهجي پر ان ۾ بهتري ضرور آڻي سگهجي ٿي، ادريس راجپوت چيو ته اکوڙي به ڪالاباغ ڊيم جيان سنڌ لاءِ انتهائي نقصانڪار ۽ خطرناڪ آهي، ان جي سنڌ واسي ڀرپور مزاحمت ڪندا ۽ اهو ڊيم نه ٺهڻ ڏيندا، هن چيو ته ڪالاباغ مان 24 سئو ميگاواٽ، ڀاشا ڊيم مان 45 سئو ميگاواٽ، جڏهن ته اکوڙي مان فقط 6 سئو ميگاواٽ بجلي ٺهي سگهندي، جنهن جو ڪو به فائدو ناهي.
