حمد

[جاويد نواز]

منهنجي اُستاد مرحوم اُستاد پيرل قمبر جي ڪتاب سجدو اُداس آ مان هڪ حمد اوهان سڄڻڻ سان شيئر ڪجي ٿي

الله ته اهڙو ڏيندڙ آ نڪي دان کُٽي نڪي نان کُٽي
سو سال حياتي انسان جي پر ان جو نه ٿو احسان کُٽي

انسان کي آخر ڏئي ڏئي ڀي آخر ٿو مٺا انسان کُٽي
مالڪ جي خزاني جو ليڪن صدين ۾ نٿو سامان کُٽي

هن اهڙي پر جي پالڻ ۾ سردار کُٽي سلطان کُٽي
پر ميزبان اهڙو آ مولا نٿو ماني سانگي مهمان کُٽي

ڪو شاھ کُٽي پيئنار کُٽي ڪو داتا کُٽي دربان کُٽي
ويا ونڊ ڪروڙ وليؤ وٺي نٿو قدرت ۾ قُرآن کُٽي

حيدر نه لڙي ها جي حق لئي ڪاٿي ها ايڏو ڪفران کُٽي
هڪ قلمي لئي ابوجهل جو ڏس ڪاٿي ٿو اچي ايمان کُٽي

هٿ آهي شفا ڀي شافي جي لوچڻ ۾ ائين لُقمان کُٽي
هن نفس نڀاڳي گندي جو نٿو گوڙ کُٽي گمسان کُٽي

انسان جي کُٽي ٿي عمر پوي پر ان جو نٿو ارمان کُٽي
ڪٿي ٿو پوي داناءُ کُٽي ڪٿ نقطو نٿو نادان کُٽي

ٿو تير ڪمان مان نڪري کُٽي نظرن جو نٿو نشان کُٽي
ميدان کُٽن ٿا ٻيا پيرل محبت جو نٿو ميدان کُٽي

مرحوم اُستاد پيرل قمبر​

 

[سليمان وساڻ]

جواب: حمد

محترم دوست جاويد نواز صاحب سلام

مهرباني جو اوهان استاد پيرل جو حمد اسان سان ونڊ ڪيو۔ ڪافي ڏينهن کان اوهان سنڌ سلامت کان پري رهيا آهيو۔ اوهان جي شاعري به گهڻي عرصي کان شيئر ناهي ٿي۔

 

[ڏاڏل شينو]

جواب: حمد

ماشاءِ الله بهترين حمد سائين جاويد نواز صاحب اوهان اسان سان ونڊي اوهان جا ڪروڙين قُرب ايمان تازو ٿي ويو۔
وسلام

 

[نثارابڙو]

جواب: حمد

سهڻا دوست استاد پيرل قمبر واري جا سهڻا ٻول ونڊ ڪرڻ جا ٿورا ۔۔۔ لفظن جي جوڙجڪ ۽ فڪر جي گهرائيءِ ۾ بيشڪ استادي رنگ سمايل آهن۔

ٿو تير ڪمان مان نڪري کُٽي نظرن جو نٿو نشان کُٽي
ميدان کُٽن ٿا ٻيا پيرل محبت جو نٿو ميدان کُٽي

 

[غلام مصطفي ميمڻ]

جواب: حمد

انسان کي آخر ڏئي ڏئي ڀي آخر ٿو مٺا انسان کُٽي
مالڪ جي خزاني جو ليڪن صدين ۾ نٿو سامان کُٽي


جاويد نواز صاحب ۔استاد پيرل قمبر جي سهڻا ۽ ڏاهپ ڀريا ٻول ونڊ ڪرڻ تي اوهان جون مهربانيون۔بيشڪ الله سائين وٽ ڪڏهن به ڪنهن شي جي کوٽ نه آهي چاهي ان کي ڪيترو به ونڊ ڪن۔هو دنيا کي تخليق ڪندڙ آهي،پالڻهار آهي۔زمين جي پاتل ۾ هلندڙ ڪيلي کي به رزق ڏين ٿا۔هن جي رزق جي سمنڊ ۾ ڪابه کوٽ نه ٿئي اچي۔محترم پيرل فقير جهڙا ڏاها پنهنجي اندروني مشاهدي سان الله سائين جون ڏاتون ڏسي ان کي پنهنجي ٻولن ۾ ماڻهن جي سامهون ظاهر ڪن ٿا۔تاڪي انسان پنهنجي رب \ پالڻهار ڏي رجوع ڪري۔

 

[جاويد نواز]

جواب: حمد

مهرباني سائين وساڻ صاحب اوهانجي سائين نفسانفسي جو دور آهي زندگي ۾ ڪم ڪار وڌي ويا آهن گهڻي عرصي تائين غير حاضر رهڻ جي معافي سڀني دوستن جي مهرباني پسند جي الله سرن ڏي خير ڪري باقي جُدائي ڪون ٿيندي سنڌسلامت جي سڄي سنگت کي سلام