[JUSTIFY]پيارا سنڌ سلامت ساٿيو السلام عليڪم، جيئي سنڌ نمستي۔ گُذريل سال 15 ڊسمبر 2011 ع تي ڊپٽي ڪمشنر ضلع لسٻيلا بلو چستان محترم نوراحمد سمون سنڌ جي عظيم عشقيه داستان جي عظيم ڪردارن سسئي پُنهون جي آستاني تي تقريبن 50 سالن کان پوءِ هڪڙي مچ ڪچهري ڪرائي ان کان پهرين انهي آستاني تي 1960 يا 1961 ۾ سنڌ مان آيل ڊپٽي ڪمشنر محترم محمد اسماعيل ميمڻ سسئي پُنهون جي آستاني تي هڪڙي مچ ڪچهري ڪرائي هُئي ۽ سموري سنڌ ۽ بلوچستان مان لطيف سائين جي پارکوئن کي هن آستاني تي گهرايو هو، (محترم محمد اسماعيل ميمڻ جي باري ۾ توهان کي ٻُڌائيندو هلان ته پاڻ سنڌ جي نامياري ادبي شخصيت خيرپور يونيورسٽي جي سابق وائس چانسلر محترم حميد سنڌي جا والد بزرگوار هُئا) تقريبن پنجاهه سالن کان پوءِ محترم نوراحمد سمون صاحب ڊپٽي ڪمشنر لسٻيلا بلوچستان اها ساڳوڻي روايت دهرائي سموري سنڌ ۽ بلوچستان مان لطيف سائين جا پارکو ۽ سگهڙ گهرائي جنهن ۾ سنڌ حڪومت جي سيڪريٽري محترم قاضي شاهد پرويز کي مهمان خاص جي حيثيت سان سسئي پنهون جي آستاني تي گهرائي هڪڙي زبردست مچ ڪچهري اعلا پيماني تي منعقد ڪرائي سانئڻ سسئي ۽ سائين پنهون کي ڀيٽا ڏني ۽ مچ ڪچهري واريءَ سنڌ ۽ بلوچستان جي روايتن کي وري دوام بخشيو دوستن کي سُڌ هُجي ته ڊپٽي ڪمشنر لسٻيلا بلوچستان ادا نوراحمد سمون منهنجو ننڍو ڀاءُ آهي هينئر جڏهن آئون ڪجهه عرصو پهرين لسٻيلا بلوچستان ويو هُئس ته ادا نوراحمد سمون مونکي هن مچ ڪچهريءَ جو 2 ٻن ڪلاڪن جو وڊيو ڏيکاريو، ۽ جڏهن مون هي وڊيو ڏٺو ته دل چاهيو ته هي تاريخي وڊيو سنڌ سلامت جي سڀني ساٿين کي ڏيکاري مشاهدو ڪرائجي. سو ڀاءُ نوراحمد سمون کي گُذارش ڪيم ته ادا هن وڊيو کي جيڪڏهن سنڌ سلامت ڊاٽ ڪام کي ڊونيٽ ڪيو وڃي ته ساري دنيا جا سنڌي دوست هن مچ ڪچهريءَ مان آنند حاصل ڪري سگهن ٿا، ۽ سسئي پنهون جي مزار مُبارڪ جو ديدار پڻ ڪري سگهن ٿا، ڀاءُ نوراحمد سمون منهنجي هن جذبي جو قدر ڪندي انهي وڊيو جي ڪاپي مونکي ڪرائي ڏني دوستو جيئن ته توهان کي خبر آهي ته وڊيو ايڊيٽنگ کان اپ لوڊنگ تائين هڪڙو ڏکيو ۽ ٿڪائيندڙ ڪم آهي هن 16 منٽ جي وڊيو جي اپ لوڊ ڪرڻ کي تقريبن ست ڪلاڪ لڳا آهن اڄ برور اڱارو 20 مارچ 2012 رات جو 12 وڳي کان سسئي پنهون جي آستاني تي ڪيل مچ ڪچهري جي پهرين حصي جي مڪمل اپ لوڊنگ اڄ صُبح جو ستين وڳي ڪمپليٽ ٿي آهي. مچ ڪچهري جي پهرين حصي ۾ سسئي پنهون جي مزار مُبارڪ جي ديدار، انهي مزار مُبارڪ جي خليفي سائين عبدالرحمان ٻُرو جون سانئڻ سسئي جي باري ۾ تاريخي ڳالهيون ڪيل آهن جنهن ۾ سنڌ حڪومت جو سيڪريٽري قاضي شاهد پرويز، ادا نوراحمد سمون ڊپٽي ڪمشنر لسٻيلا بلوچستان ۽ ضلع لسٻيلا بلوچستان جا ڪافي انتظامي عملدار ۽ضلع لسٻيلا بلوچستان جون ڪافي معزز شخصيتون پڻ نمايان آهن . دعا ڪريو ته هن تاريخي وڊيو جا ٻيا حصا به ايڊٽ ڪرڻ کان پوءِ اپ لوڊ ڪري سنڌ جي لاکيڻي لطيف جي عظيم سورمي سانئڻ سسئي جي جدوجهد کي توهان سان ونڊ ڪري تاريخي طور پنهنجو فرض ادا ڪري سگهان. توهان جو دعاڳو [/JUSTIFY] لاکيڻي لطيف جي عظيم سُورمي سسئي ۽ سندس ور پنهون جي ابدي آرام گاهه جا اندروني ۽ بيروني منظر جيڪي پندرهان ڏينهن پهرين انهي عظيم آستاني جي زيارت ڪرڻ ويلي مون خود سنڌ سلامت جي ڪئميرا جي اک ۾ محفوظ ڪيا هُئا۔ لاکيڻي لطيف جي عظيم سورمي سانئڻ سسئي ۽ سندس ور پُنهون جي ابدي آرام گاهه جي حاضري ڀرڻ کانپوءِ سنڌ سلامت جو جهونو نثاراحمدناز تمام گهڻو خوش آهي ، هن عظيم آستاني جي حاضري ڀرڻ جي خواهش الله سائين جي فضل ۽ ڪرم سان بروز سومر بتاريخ 27 فيبروري 2012 تي پوري ٿي ضلع لسٻيلا جي شهر وندر جي سنگهر علائقي ۾ سسي پُنهون جي مزار نمايان آهي(رپورٽ ۽ تصويرون نثاراحمدناز)
جواب: لاکيڻي لطيف جي عظيم سُورمي سانئڻ سسئي جي آستاني تي ڪيل مچ ڪچهري ادا نثار ناز صاحب اسلام عليڪم۔ادا اوهان ۽ اوهان جي ڀاء محترم نور احمد سمون صاحب ۔جيڪي ڊپٽي ڪمشنر ليسبيلا۔بلوچستان آهن ،جون تمام گهڻيون مهربانيون جو شاه سائين جي مک ڪهاڻين جي ڪردارن جي آخري مقام جي نه رڳو ڦوٽن ۽ ويڍيو جي ذريعي ڄاڻ ڏني اٿئو پر اوهان جي ڀاء انهن جي آخري آستان تي مچ ڪچهري جو پروگرام ڪري سچ مچ ته شاه سائين جي شاعري ۽ انهن ڪردارن کي زنده ڪري ڇڏيو آهي۔توهان جي ڀاء جي انهي ڪاوشن جي جيتري تعريف ڪئي وڃي گهٽ آهي۔اسان هنن جي لاء دعاگو آهيون ته الله پاڪ هنن کي وڌيڪ همٿ ۽ ذريعا ڏئي جو هن قسم جون ڪچهريون شاه سائين جي شاعري جي هر ڪردار جي آخري آستان تي مچائين ۽ شاه صاحب جي اصلي فڪر کي ماڻهن ۾ عام ڪن۔ سسئي جو داستان شاه عبدالطيف ڀٽائي جن جي پنجن سرن"سُر آبري،سُر معذور،سُر ديسي،سُر ڪوهياري ۽ سر حسيني"تي مشتمل آهي۔سسئي جي پنجن سُرن ۾ باوجود ساڳئي پس مناظر ۽ ساڳئي مرڪزي موضوع جي،هر سُر جي داستان ۾ ،۽ هر داستان جي بيتين ۽ واين ۾ شاه صاحب پنهنجي اعلئ شعور ۽ شاعري سان مرڪزي موضوع جا نت نوان رخ روشن ڪيا آهن جن ۾ اعلئ فهم ۽ فڪر جا ماڻ ڀريل آهن۔سُر آبري جي شروع واري سٽ ۾ ئي سسئي جي پڪي پختي اردي جو اظهار ٿيل آهي ته "اول آخر آه،هلڻ منهنجو هوت ڏي" هو جيئن پئي سور سختيون سهي تئن پئي سنديس سڪ سرسي ٿئي۔آڃ،سڃ ۽ رڃ سڪ وارن لاء ئي آهن،سو "ساجن ڪارڻ سڃ۔ مر قبولي سسئي"جن کي اندر ۾ عشق جي آُڃ آهي پاڻي کي به تن لاء اُڃ آهي۔سسئي کي صلاح ته شروع کان ئي حجت ڇڏي عاجزيء سان پنهنجي پنهون کي ڳولج،۽ عزازيل وارو هٺ نه ڪج۔ڏونگر ڏورڻ وڏو ڏاکڙو آهي ; اتي سڪ واري سچي جذبي(لَئُون) سان هلڻ کان سواء ٻيو ڪو چارو ئي ڪونهي،پر ڀنڀور کي ڇڏ ۽ اٿي هل:پوءُ "ليڙون لو لطيف چئي،ڏونگر ڏيندَء ڏس";"سکين ٿيءُ مَ سنري ، پَسي ڏک م ڏر"هڪ طرف اها تاڪيد،ته ٻئي طرف الٽي رمز ۽ راز وارا اشارو ته:- ويهه مَ مُند ڀنڀور ۾ ، هاڙهي هڏ مَ هل ڪُوڙي ڪج مَ ڪڏهين،سڄي ساک مَ سل جانب لئي مَ جَل ، سُور وسار مَ سسئي
جواب: لاکيڻي لطيف جي عظيم سُورمي سانئڻ سسئي جي آستاني تي ڪيل مچ ڪچهري ادا غلام مصطفى ميمڻ توهان جون مهربانيون جو توهان منهنجي هن موڪليل علمي ۽ ڄاڻ واري ادبي ونڊ کي مڪمل طور مشاهدو ڪيو ۽ پسند ڪرڻ فرمايو، ادا توهان جون نيڪ تمنائون منهنجي ننڍي ڀاءُ نوراحمد سمون تائين پهچايون ويون آهن هو توهان جو انتهائي ٿورائتو آهي، ادا عمر جي هن حصي ۾ مون لاءِ سفر ڪري لاکيڻي لطيف جي بيان ڪيل ماڳ مڪانن ۽ آستانن جون حاضريون ڀري انهن جو اکين ڏٺو احوال ، انهن جو تصويري احوال ۽ انهن جو وڊيو وارو احوال ممڪن ئي ڪونهي پر وري به سنڌ سلامت جي محبتي اڱڻ توهان سڀني سنڌي ڀائرن ۽ ڀينرن جي لاءِ اهي ڪشالا ڪڍي توهان لاءِ علمي ، ادبي ۽ ڄاڻ سان ڀريل شيئرنگ هر ناممڪن کي ممڪن بنائي موڪلڻ پنهنجو فرض سمجهندو آهيان ، ادا توهان جون همت افزايون مونکي نت نئين حوصلي ۽ همت جو ڏس پتو ڏينديون آهن، دعا ڪريو ته شاهه سائين جي عظيم سورمي سانئڻ سسئي ۽ ان جي ور پنهون جي آستاني تي ڀاءُ نوراحمد سمون پاران منعقد ڪرايل 15 ڊسمبر 2011ع واري مچ ڪچهري واري وڊيو جا باقي حصا ايڊيٽنگ ۽ اپ لوڊ ڪري توهان سان ونڊ ڪري سگهان۔ منهنجي خيال ۾ اڃا 9 حصا پندرهن پندرهن منٽن جا انهي مچ ڪچهري واري پروگرام جا ٿيندا، هڪ هڪ پندرهن منٽن جي وڊيو جي ايڊيٽنگ مون جهڙي اڻ ڄاڻ لاءِ پورو هڪ ڏينهن کايو وڃي، ۽ انهي پندرهن منٽن جي وڊيو کي سُٺي فارميٽ ۾ يو ٽيوب تي اپ لوڊ ڪرڻ ۾ ست ڪلاڪ لڳن ٿا، خير توهان جون همت افزايون ۽ حوصلا افزايون ساٿ رهيون ته الله سائين جي فضل ۽ ڪرم سان ضرور هن وڊيو جا باقي حصا به ايڊيٽنگ ۽ اپ لوڊ ڪري وٺندس۔ باقي سُهڻي لطيف جي عظيم سُورمي سانئڻ سسئي جي جدوجهد واري داستان کي پڙهي ان تي جيڪڏهن عمل پيرا ٿيون ته سنڌ امڙ جي آجپي کان وٺي سنڌ کي خوشحالي طرف وٺي اچڻ ڪو ڏکيو ڪم ڪونهي، سُهڻي لطيف جي پيغام ته: ”سُتي نه سرندياءِ ڪر ڪا پچار پرين جِي“ فلسفي کي جيڪڏهن اسان سمجهي وٺون ته هر مشڪلات ، هر ڏک ۽ هر ڏولاوي سان اسان سڀ سنڌ تمام گهڻي آساني ۽ سئولائي سان مقابلو ڪري سگهون ٿا۔ هڪ ڀيرو ٻيهر توهان جون مهربانيون ادا غلام مصطفى ميڻ صاحب جو توهان کي اسان جي هي ڪاوش پسند آئي۔ شال سدائين جُڙيا هُجو آباد هُجو آمين
جواب: لاکيڻي لطيف جي عظيم سُورمي سانئڻ سسئي جي آستاني تي ڪيل مچ ڪچهري سائين نثار ناز ۽ سندس ڀاء نور احمد سمون جون مهربانيون سٺي رپورٽ ۽ تمام سٺي روايت۔ جس هجي سائين سمون صاحب کي جنهن ايتري عرصي کانپوء ٻيهر اهڙو ميڙاڪو گهرايو۔ خوشي آهي جو سنڌ جي ثقافت جا امين سگهڙ اڃان ريتون نڀائيندا اچن۔
جواب: لاکيڻي لطيف جي عظيم سُورمي سانئڻ سسئي جي آستاني تي ڪيل مچ ڪچهري سائين ناز صاحب هن جتن جي جيتري تعريف ڪجي سا ٿوري ۔ الائي ڇو اوهان جهوني جي نالي سان مشهور آهيو اهڙو ڪم ته هتي ڪنهن جوان به ناهي ڪيو جهڙو ونڊ اوهان ونڊيو آهي سنڌ سلامت جا سُر وري مٿان اهڙي ڪچهري سبحان الله. الله اوهان جهڙن مُدبرن و ٻولي جي ثقافتن سان محبت ڪندڙ مٺڙن ماڻهن جي ڇانو اسان مٿان شل قيامت کانپوءِ به قائم رکي ۔ وسلام
جواب: لاکيڻي لطيف جي عظيم سُورمي سانئڻ سسئي جي آستاني تي ڪيل مچ ڪچهري محترم محمد سليمان وساڻ صاحب جا ٿورا جنهن کي اسان جي موڪليل هي غريباڻي رپورٽ سُٺي لڳي ، توهان جي نيڪ تمنائن جو پيغام ادا نوراحمد سمون تائين پهچايو ويو آهي ، جنهن سموري سنڌ سلامت جي سٿ جا دل جي گهرائين سان ٿورا مڃيا آهن۔ ادا سليمان دعا ڪريو ته هن مچ ڪچهري جا باقي حصا ايڊيٽنگ ۽ اپ لوڊ ڪري توهان تائين پهچائي سگهان ۔هن مچ ڪچهري ۾ سگهڙن رڳو حضرت شاهه عبداللطيف ڀٽائي رح جا بيت سُر سسئي، سسئي آبري، معذوري، ڪوهياري ۽ حُسيني وارن سُرن مان ٻُڌايا آهن ان کان علاوه ادا نوراحمد سمون صاحب جي فلسفي ۽ ڏاهپ سان ڀريل تقرير، سنڌ جي سيڪريٽري قاضي شاهد پرويز جي تقرير پڻ ٻُڌڻ وٽان آهي۔ اميد ته منهنجي باقي موڪليل وڊيو رپورٽ جو توهان کي انتظار رهندو۔ هڪ ڀيرو توهان جي ٻيهر مهرباني جو توهان اسان جون حوصلا افزايون ۽ همت افزايون ڪيون۔ لک لائق ادا۔
جواب: لاکيڻي لطيف جي عظيم سُورمي سانئڻ سسئي جي آستاني تي ڪيل مچ ڪچهري محترم ڏاڏل شينو صاحب جون لکين مهربانيون جو هن اسان کي بي لوث دعائون ڪيون ۽ اسان جون حوصلا افزايون ڪيون، ادا جهونو ته جهونو هوندو آهي۔ ۽ جهونو سدائين جهونو ئي رهندو، باقي سدائين ڪوشش ڪندو آهيان ته تاريخي حوالي سان ادبي حوالي سان ، علمي حوالي سان ۽ ڄاڻ جي حوالي سان ڪجهه مختلف ڪجي، هاڻي پنهنجي انهي ڪوششن ۾ ڪيتري قدر ڪامياب آهيان ان جا بهترين جج توهان ڀائر آهيو، منهنجو مقصد ۽ منهنجي آرزو صرف اها هوندي آهي ته رپورٽس جي حوالي سان سنڌ سلامت سڀني فورمن کان مختلف هُجي ۽ نمبر ون هُجي۔ادا رشيد سمون ، ادا نثاراحمد ابڙو، ادا محمد سليمان وساڻ ، سميت هر ننڍي توڻي وڏي سنڌ سلامت جي هر ميمبر کي لکين شاباسون آهن جو هڪ فرض سمجهي سنڌ سلامت جي هن محبتي اڱڻ کي سنوارين پيا سينگارين پيا۔ سنڌي ادب ، سنڌي ٻولي ، پوري سنڌي قوم ۽ سموري سنڌ جو مان ۽ شان وڌائين پيا۔منهنجي لاءِ سنڌ سلامت جو جهونو سڏائڻ هڪ اعزاز جي ڳالهه آهي۔۔ توهان دوستن جون لکين مهربانيون آهن جو منهنجي توهان قدم قدم تي حوصلا افزائي ۽ همت افزائي ڪئي آهي۔ الله سائين توهان کي سدائين شاد ۽ آباد رکي آمين۔
ادا نثار ناز صاحب ۽ محترم نور احمد سمون صاحب توهان جون مهربانيون جو اهڙي سٺي تحرير مچ ڪچهري ساڻ گڏوگڏ وڊيو جي به عنايت ڪئي ائين پيو محسوس ٿئي ڄڻ اسين به انهيء ڪچهريء ۾ شامل آهيون..... ڀٽائي سرڪار جي هن عظيم سُورميء کي ”” سنڌ سلامت”” ۾ ونڊُ ڪرڻ تي اوهان جا لک لائق ۽ قرب سائين.........
