وائي شاديءَ جو سِينگارُ، آيَلِ! مَرَڪُ مُنهِجو مُون پِرِين. آهي ڳَههُ ڳِچِيءَ جو، ڏِئي هالورا هارُ؛ آهي اُگھاڙيِن کي؛ جانِبَ جو جنسارُ؛ آهِئين کاڄُ بُکِيَنِ جو، تُون تان طَعامُ تيارُ؛ اَعليٰ اَڇو عِيدَ ۾، دوسِتاڻو دِيدارُ؛ حُسۡنَ هوتَ پُنهونءَ جي، ڪَڪورِيو ڪوهِيارُ؛ سُڃَ ڪَيائِين سُرَهِي، واسِيائِين وَڻِڪارُ؛ ڇَپَرَ ڇاٽُون مُڪيُون، عَطُرُ ٿِيو آوارُ؛ ڪوڙيـين ٿِيا ڪيترا، نالي تان نِثارُ؛ سَدا صلابَتَ جِي، گولِي گِرِفِتارُ؛ گھورِيان گَھرُ گِھٽِيءَ تان، اَچي جِئان آڌارُ؛ اَدِيُون! عَبۡدُاللَطِيفُ چئي، مِليو مُون مَنَٺارُ
