سنڌ جي ارڏي پُٽ بشير خان قريشي لا تعزيتي ريفرنس

[نثارناز]

سنڌي ادبي سنگت ٽنڊو محمد خان پاران 8 اپريل 2012ع آچر جي ڏينهن سنڌ جي سورهيه پُٽ ارڏي پٽ بشير خان قريشي لا تعزيتي ريفرنس ڪوٺايو ويو۔ جنهن ۾ مختلف قوم پرستن جماعتن جا اڳواڻ انهن جا ڪارڪن سنڌي ادبي سنگت جا جملي ميمبر ۽ عام سنڌي ماڻهن وڏي تعداد ۾ شرڪت ڪئي۔

رپورٽ : نثاراحمدناز
تصويرون : شاهه زيب نثار سمون​

دوستو گُذريل آچر 8 اپريل 2012 تي سنڌي ادبي سنگت ٽنڊو محمد خان پاران سنڌ جي سرواڻ پُٽ بشير خان قريشي جي اوچتي لاڏاڻي تي تعزيتي ريفرنس ڪوٺايو ويو، جنهن ۾ سنڌ جون سانڃهه وند ڌُرين جا نمائندا، سنڌ جي قوم پرست جماعتن جا اڳواڻ، ڪارڪن ۽ سنڌي ادبي سنگت جا ميمبر وڏي تعداد ۾ شريڪ ٿي دلير اڳواڻ بشير خان قريشي  جي سنڌ لا ڪيل جدوجهد کي خراج تحسين پيش ڪيو ۽ بشير خان قريشي جي هن جُدائي کي سنڌي قوم ۽ سموري سنڌ لا هاڃيڪار قرار ڏنو، ان موقعي تي سنڌ سلامت جي جهوني نثاراحمدناز جيڪو سنڌي ادبي سنگت ٽنڊو محمدخان جو سيڪريٽري پڻ آهي سڀني اڳواڻن کي بشير خان قريشي جي اچانڪ وڇوڙي تي ڪوٺايل تعزيتي ريفرنس ۾ وڏي تعداد ۾ شريڪ ٿيڻ تي ٿورا مڃيا ۽ چيو ته سنڌي ادبي سنگت هر انهي سنڌي پُٽ کي سنڌ جو رهبر ۽ هيرو سمجهندي آهي جيڪي جيجل سنڌ لا سنڌي ماڻهن جي حقن جي حاصلات لا پاڻ پتوڙيندا آهن ۽ سنڌ امڙ جي دشمنن جي اکين ۾ اکيون وجهندا آهن ، جيئن ته بشير خان قريشي جي اچانڪ وڇوڙي تي سڀ کان پهريون فورم سنڌي ادبي سنگت جو هو جنهن بشير خان قريشي جي لاڏاڻي تي ٽن ڏينهن جي سوڳ جو اعلان ڪيو، نثاراحمد ناز وڌيڪ چيو بشير خان قريشي سان سندس ملاقات صرف هڪ ڀيرو مارچ 2012۾ ٽنڊو محمد خان مهراڻ چوڪ تي سنڌ لا مارچ جي سلسلي ۾ ٿي جڏهن هو ٽنڊو محمد خان جي سنڌي عوام کي 23 مارچ 2012 واري مارچ ۾ شريڪ ٿيڻ لا متحرڪ ڪرڻ لا آيو هو ۔ ان کانپو سنڌي ادبي سنگت ٽنڊو محمد خان جي خزانچي انعام ٽکڙائي کي مرحوم بشير خان قريشي جي جدوجهد تي ڳالهائڻ لا نينڊ ڏني انعام ٽکڙائي پنهنجي اکين مان ڳوڙها وهائيندي چيو ته جڏهن به سنڌ جي دلير اڳواڻن جو ذڪر ٿيندو انهن ۾ بشير خان قريشي جو ذڪر لازمي لازمي مٿاهون هوندو، بشير خان قريشي جي ڪري ئي سنڌي ماڻهو آزادي  سان سنڌ جي وڏن شهرن ڪراچي، حيدرآباد جي رستن تي سنڌي ٽوپيون پائي گهمندا هُئا، بشير خان قريشي سنڌ جي ازلي دشمنن جي اک جي ڪنڊو هو۔ ان کانپو سنڌي ادبي سنگت جي اعظم ڀٽي کي بشير خان قريشي جي فڪر سنڌ جي موضع تي دعوت خطاب ڏنو ويو ، اعظم ڀٽي پنهنجي تاريخي لکيل مقالي ۾ چيو ته اڄ جيجل سنڌ جا ماڻهو بشير خان قريشي جي اچانڪ وڇوڙي تي ائين محسوس پيا ڪن ڄڻ انهن جي مٿن تان ڇت ڪري پئي هُجي هو يتيمي جي ڪيفيت ۾ آهن ، سنڌ ۾ قومي غدارن جي ڪري سنڌي هيروز تمام ٿورا آهن انهن ٿورن هيروز ۾ بشير خان قريشي به چوڏهين جيان چنڊ جيان چمڪندڙ هيرو آهي، جنهن جي دل ۾ سنڌ رچي ۽ وسي پئي هُئي بشير قريشي سدائين سنڌ لا زنده رهيو ۽ يقينن هن سنڌ لا موت ماڻيو۔سنڌي ادبي سنگت ٽنڊو محمد خان جي سينئر ميمبر پروفيسر ريٽائرڊ محمد موسى سٺيو سنڌ جي قومي سرواڻ بشير خان قريشي کي لفظن جي ڀيٽا ڏيندي لاکيڻي لطيف جو هي بيت پڙهيو : اڄ نه اوطاقن ۾ ٿا طالب تنوارين، آديسي اُٿي ويا مڙهيون مون مارين، جيڪي جِيءَ کي جيارين سي لاهوتي لڏي ويا هُن چيو ته بشير خان قريشيءَ جهڙا اڻموٽ بهادر سپوت پُٽ صدين کان پوءِ جنم وٺندا آهن بشير خان قريشيءَ سدائين سنڌ امڙ جي حلالي پُٽ وارو ڪردار ادا ڪيو، پنهنجي پاڻ کي سنڌ جيجل لاءِ وقف ڪري ڇڏيو هو، هُن سنڌ جي عشق ۾ پنهنجو پاڻ کي تياڳي ڇڏيو هو، اسان سڀني سنڌين کي گهرجي ته بشير خان قريشيءَ جي لاڏاڻي واري ڏُک کي هڪ آواز ٿي متحد ٿي طاقت ۾ تبديل ڪري ڇڏيون ۽ جڏهن اسان سڀ سنڌي هڪ ٿينداسين ته جيجل سنڌ جي آجپي وارو خواب جيڪو اسان جي سنڌ جي قومي هيروز ڏٺو هو ان جي ساڀيان ماڻڻ پوءِ اسان لاءِ مشڪل ڪونه هوندو۔​

سنڌي ادبي سنگت جي سينئر ميمبر ۽ کاهوڙي ليکڪ مشڪور ڦلڪاري چيو ته بشير خان قريشي جو لاڏاڻو منهنجي قلم منهنجي سوچ منهنجي ڏات تي وڄ بڻجي ڪريو آهي ، مونکان لکڻ وسري ويو آهي، مونکان پڙهڻ وسري ويو آهي ڏات جي ديوي ڪارو لباس پائي ماٺ جي صحرا ۾ گم ٿي وئي آهي منهنجي سنڌ جا ماڻهو سڪتي ۾ آهن منهنجي شهر جا ماڻهو اشڪبار آهن منهنجي اکين مان ڳوڙها مهراڻ بڻجي پيا آهن بشير خان قريشي سان سندس قربت جو ناتو تڏهن کان آهي جڏهن کان هر سنڌي جيئي سنڌ جو نعرو هڻڻ شروع ڪيو آهي بشير خان جو وڇوڙو سموري سنڌ لاءِ عظيم صدمو آهي۔
سنڌي ادبي سنگت ٽنڊو محمد خان جي ميمبر منظور عادل سومرو چيو ته ڪي ماڻهو تاريخ ٿين ٿا ۽ تاريخ جي وارتائن جا رُخ موڙي ڇڏيندا آهن ، يقينن بشير خان قريشي پنهنجي پاڻ ۾ هڪڙي تاريخ هو ، جنهن جي دل ۾ سنڌ سان پيار جا دريا هميشهه موجزن رهندا هُئا ، سنڌ جيجل جي دشمنن سان سائين جي ايم سيد جي ارڏي پُٽ جيان وڙهيو، سنڌ دشمنن سان سدائين لاکيڻي لطيف : هڻ ڀالا وڙهه ڀاڪرين آڏي ڍال مَ ڍار، اُٿي تيغ ترار مار ته متارو ٿئين جي مصداق اکين ۾ اکيون وجهي ويڙهاند ڪئي۔ ڌرتيءَ جي ارڏي ۽ اڻ موٽ پُٽ جيان سنڌ جي سنڌي ماڻهن کي سنڌ جي مالڪي جا حق ڏياريا۔ بشير خان قريشيءَ جي جدوجهد وارو سبق هر سنڌي جيڪڏهن پڙهي ان تي عمل ڪري ته سنڌ تان غاصبن جي تڏا ويڙهه لازمي ٿي سگهي ٿي۔ سنڌ يونائيٽڊ پارٽي ضلع ٽنڊو محمد خان جي صدر شبير شاهه سنڌي ادبي سنگت ٽنڊو محمدخان جا ٿورا مڃيندي چيو ته سنڌي ادبي سنگت ٽنڊومحمد خان وارن کي شاباسون هُجن جو فوري طور تي بشير خان قريشيءَ لاڏاڻي تي هڪڙو تعزيتي ريفرنس جو انعقاد ڪري اسان سڀني قوم پرست پارٽين کي هڪڙي جاءِ تي گڏ ڪري ويهاريو، جنهن مان سنڌي ادبي سنگت وارن جو سنڌ سان محبت وارو جذبو تمام زبردست نموني ظاهر ٿئي ٿو۔ جيڪڏهن هر قوم پرست پارٽي پنهنجي پاڻ کي متحد ڪري صرف سنڌ امڙ جي نالي تي گڏ ٿي هڪ مُٺ ٿي وڃن ته اسان سنڌي پنهنجي منزل کي جلدي حاصل ڪري وٺنداسين، ۽ بشير خان قريشي جي تاريخي جدوجهد کي ساڀيان جي شڪل ۾ ماڻي وٺنداسين ، بشير خان قريشي سنڌ امڙ جو هڪ سورهيه پُٽ هو سدائين سنڌ امڙ جو مان ۽ شان وڌائڻ ۾ جاکوڙڻ ۾ اڳي کان اڳرو رهيو۔ سنڌي ماڻهو ۽ سنڌ سندس دل م سدائين رچيا وسيا پيا هُئا۔جسقم ضلعي ٽنڊو محمد خان جي نائب صدر ذوالفقار حاجاڻو چيو ته بشير خان جو وڇوڙو اسان سڀني سنڌين مٿان وڄ وراڪي جيان ڪريو آهي اسان بشير خان قريشي جي خوابن کي ضرور ساڀيان ڪري ڏيکارينداسين هن حڪومت وقت کان مطالبو ڪيو ته بشير خان قريشي جي موت جي عدالتي تحقيقات ڪرائي وڃي ڇو ته اها ڳالهه تاريخي آهي ته سنڌ جا حلالي پُٽ سدائين غدارن جي سازشن جو شڪار ٿيندا آهن اسان جي سرواڻ بشير خان قريشيءَ به اهڙي ڪنهن مڪروهه غداري سبب پنهنجي جان سنڌ جيجل مٿان قربان ڪئي آهي ۽ شهيد بڻجي هميشهه لاءِ امر بڻجي ويو آهي۔​

سنڌي ادبي سنگت ٽنڊو محمد خان پاران بشير خان قريشي جي وڇوڙي تي تعزيتي ريفرنس جون تصويري جهلڪيون

سنڌي ادبي سنگت ٽنڊومحمد خان پاران تعزيتي ريفرنس جو بينر ۽ ڊائس تي لکيل بينر

سنڌ سلامت جوجهونو نثاراحمدناز جيڪو سنڌي ادبي سنگت ٽنڊو محمدخان سيڪريٽري پڻ آهي هن تعزيتي ريفرنس جي ڪاروائي هلائي رهيو آهي

سنڌ ترقي پسند پارٽي جو مرڪزي اڳواڻ ڊاڪٽر احمد نوناري مرحوم بشير خان قريشي کي لفظن جي ڀيٽا ڏئي رهيو آهي

سنڌ مشهور ليکڪه شاعره محترما زيب نظاماڻي صاحبه پڻ ڀيٽا جي صورت ۾ بشير خان قريشي جي ياد ۾ هڪڙوآزاد نظم پڙهيو ۽ تفصيل سان بشير خان قريشي جي جدوجهد کي سارهايو

سنڌي ادبي سنگت ضلع ٽنڊو محمدخان جو رابطه سيڪريٽري پنهنجي صدارتي تقرير ۾ بشير خان قريشي کي لفظن جي ڀيٽا ڏئي رهيو آهي

سنڌي ادبي سنگت ٽنڊومحمد خان جي ڪاروباري ڪاميٽيءَ جو ميمبر اعظم ڀٽي پنهنجو مقالو پيش ڪري رهيو آهي

سنڌي ادبي سنگت ٽنڊو محمد خان جو خزانچي انعام ٽکڙائي بشير خان قريشي جي جدوجهد کي سلام پيش ڪري رهيو آهي۔

سنڌ يونائيٽڊ پارٽي ضلع ٽنڊو محمدخان جو صدر سيد شبير شاهه مرحوم بشير خان قريشيءَ کي خراج تحسين پيش ڪري رهيو آهي

جيئي سنڌ قومي محاذ ضلعي ٽنڊو محمد خان جو اڳواڻ بشير خان قريشي جي جدوجهد کي سُرخ سلام پيش ڪري رهيو آهي​

 

[نثارناز]

جواب: سنڌ جي ارڏي پُٽ بشير خان قريشي لا تعزيتي ريفرنس

ڪُجهه وڌيڪ تصويرون