آشا چاند : سنڌي ٻوليء جي ترقي لاء ڪوشان رهندڙ [JUSTIFY]آشا چاند سنڌي ٻوليءَ جي مشهور اديب جوڙي اي . جي . اُتم ۽ سندري اتمچنداڻيءَ جي لائق نياڻي ، 23 مارچ 1951ع تي ممبئيءَ ۾ ڄائي . هن بي . اي ايڪانامڪس ۽ ايم . اي ( سنڌي ادب ) ، سان گڏ بزنس مئنيجمينٽ ۾ ڊپلوما ۽ بئنڪنگ جو BIIS جو ڪورس پاس ڪيل اٿس . پنهنجي مڙس چاند پنجابيءَ ( پنجابي سنڌي هندن جي نک آهي ) سان گڏجي سنڌي ٻوليءَ ۽ ادب جي ترقيءَ لاءِ وڏو ڪم ڪري رهي آهي . هوءَ هڪ ئي وقت پبلشر ، ميوزڪ پروڊيوسر ، ٽي وي پروڊيوسر ۽ ادبي ثقافتي پروگرامن جي آرگنائيزر آهي . هوءَ پنهنجون سموريون صلاحيتون سنڌي ٻوليءَ ، ادب ۽ تهذيب جي واڌاري ۽ مشتهريءَ لاءِ ڪم آڻيندي رهي ٿي . هوءَ ممبئي ۽ دبئيءَ ۾ سنڌي ٻوليءَ جي هڪ سچي سفير آهي . هن نوجوان نسل ۾ سنڌي ٻوليءَ لاءِ چاهه پيدا ڪرڻ لاءِ ڪيتريون سي ڊيون ( CDs ) تيار ڪيون آهن ، جن ۾ سڀ کان مقبول سي . ڊي ‘ Let ’ s Learn Sindhi ’ ( اچو ته سنڌي سکون ) آهي ، جيڪا سڄيءَ دنيا ۾ گهٽ ۾ گهٽ 4000 سنڌين جي هٿن تائين پهچي چڪي آهي . هن خاص ڪري سنڌي ٻارن لاءِ هڪ نئين سي . ڊي ” پنجتنتر “ نالي جاري ڪئي آهي ، جنهن ۾ ٻارن لاءِ دلچسپ ننڍيون ڪهاڻيون ، نرسري گيت ۽ رانديون شامل آهن ان کان سواءِ هن هند ۾ سنڌي ادب جي ٽمورتي- ڪيرت ، اتم ۽ مالهي جي انٽروين تي مشتمل هڪ آڊيو ڪيسٽ به جاري ڪئي آهي ، جيڪا ڏاڍي مقبول وئي هئي. سنڌي ٻولي هن جي رت ۾ شامل آهن . هوءَ پنهنجي ماءُ پيءُ جي سنڌ لاءِ لازوال محبت کان حد کان وڌيڪ متاثر آهي . پنهنجي ماءُ جي ڪهاڻين ۽ شاعريءَ کان تهائين وڌيڪ ،ان ڪري هن سندري اتمچنداڻيءَ جا 1992ع کان ڪتاب ڇپائڻ جو ارادو ڪيو . پنهنجي ڀيڻ بينا سان گڏجي ” جيئي سنڌي پبليڪيشن “ قائم ڪري سندريءَ جا ٽي ڪتاب ڇپائي چڪي آهي ان کان سواءِ ماءُ جي جنم ڏينهن تي هن سندس نظمن/ نثري نظمن جي آڊيو ڪئسٽ ” هڳاءُ “ جاري ڪري ، کيس سالگرهه جي تحفي طور ڏني ، جيڪا سنڌ ۽ هند ۾ ڏاڍي مقبول ٿي. آشا چاند سنڌي ٻولي ،ادب ۽ ورثي جي سگهه ۽ اهميت محسوس ڪندي 2000ع ۾ دبئيءَ ۾ ” سنڌي سنگت “ نالي آرگنائيزيشن جوڙي موجوده سنڌي اليڪٽرانڪ ۽ آڊيو وزيوئل ميڊيا ذريعي دلچسپ ٽيلي فلمن ( Tele films ) ۽ T . V پروگرامن لاءِ سنڌي ميوزڪ وڊيو تيار ڪرڻ تي ڪم جي شروعات ڪئي آهي . ان ڏس ۾ هن ابتدا پنهنجي ماءُ جي لکيل ” ولايتي گهوٽ جي ڳولا “ عنوان واري مزيدار ٽيلي فلم سان ڪئي . هن اهڙيءَ طرح سنڌي ٽيليويزن پروگرامن لاءِ 16 ٽيلي فلمون تيار ڪيون آهن ، جيڪي ” دوردرشن “انڊيا ۽ دوردرشن گجرات تان ” سنڌي سرهاڻ “ جي نالي سان ٽيليڪاسٽ ٿي چڪيون آهن .ان کان سواءِ هوءَ سنڌي ميوزڪ وڊيوز تي ڪم ڪري رهي آهي ، جيڪي دور درشن تان ٽيليڪاسٽ ٿينديون ۽ پڻ ڊي وي ڊي تي رليز ٿينديون آشا چاند دبئيءَ ۾ نجي ٽي وي چئنلز جي ڪيترن گرانڊ ميوزيڪل پروگرامن ۾ سهڪار ڪري چڪي آهي . سندس نياڻي مومل پڻ بهترين ڪمپيئر ۽ اداڪاره آهي ، جيڪا ماءُ سان سنڌي ٻوليءَ جي مٿين ترقيءَ وارن پروگرامن ۾ ٻانهن ٻيلي هوندي آهي. [/JUSTIFY] معصوم سنڌي جي ٿورن سان، سندس فيسبوڪ البم تان ورتل
