قطع تاريخ وفات ؛ مرحوم ميان جان محمد “شاد” عباسي ٻورڙائي.

[ImamBux]

احمد خان آصف مصراڻي​

قطع تاريخ وفات ؛ مرحوم ميان جان محمد “شاد” عباسي ٻورڙائي.​

​

روز شب هلندو رهي ٿو زندگي جو ڪاروان​

موت جي منزل کي پهچي ٿو وڃي سو بي گمان​

​

ساھ جنهن کي آھ، سو مرندو اٽل قانون آھ​

جنهن کي سڏ سائين جو ٿئي تنهن کي ملي مهلت ڪٿان​

​

ٿي ويو ماحول مغموم ۽ فراق ٿي فضا​

“شاد” عباسي جڏهن رحلت ڪئي هي ناگھان ​

​

هن جي لاڏاڻي جو ڪاٿي وقت هو اي دوستو!​

لال لٽجي ويو اچانڪ موت ماريءَ جي هٿان ​

​

جان محمد جي وڃڻ جو دل کي صدمو سخت ٿيو​

موڪلائڻ کانسواءِ ويو موڪلائي مهربان​

​

عالم ۽ استاد عاليشان دلبر دوست هو​

ماهر موسيقيت ۽ شاعر شيرين زبان ​

​

ذوالقعد ۽ ماھ سيپٽمبر جي اڻٽيهين هئي​

جو رضا رب جي مڃي ٿيو راه رب جي سان روان​

​

مونکي هاتف هيئن چيو همدرد ٿي ۽ هم زبان​

شاد جي رحلت جا ٻيئي سن اي “آصف” لک عيان​

​

(جان محمد شاد دل، دلشاد و شاعر) ڌار ٿي​

۱۴۰۱ھ​

(دربهشت خلد ساڪن شاد ٿي ويو شادمان​

1981ع​