نذير مغل خلاف جاري ڪيل اڇو چٺو۔۔

سنڌ يونيورسٽي جي تڪراري وائيس چانسلر نذير مغل خلاف سنڌ يونيورسٽي جي استاد يونين پاران هڪ اڇو چِٺو White Paper جاري ڪيو ويو آهي. سنڌ جرنل انهي جو مڪمل متن ڇاپي رهيو آهي. جيتوڻيڪ يونيورسٽي انتظاميه انهي ۾ لڳايل الزامن کي رد ڪري ڇڏيو آهي پر اهي اهڙا الزام آهن جن کي يڪسر نظرانداز نٿو ڪري سگهجي، جيڪڏهن انهن مان هڪ به درست آهي ته پوءِ سنڌ حڪومت جي لاڳاپيل اختيارين کي نذير مغل کي بطور وائيس چانسلر مقرري تي نظرثاني ڪرڻي پوندي ۽ سنڌ جي مادرِعلمي سان ٿيندڙ ويڌن ۽ هزارين شاگردن جي مستقبل سان ٿيندڙ راند جو حساب ڏيڻو پوندو.​

​

جاري آهي​

 

​

استاد تنظيمن جي هڪ گروپ پاران جاري ڪيل وائيٽ پيپر جو مڪمل متن​

نذير مغل جو ابتدائي پروفائيل​

نذير مغل، سنڌ يونيور سٽي ۾ بطور ليڪچرار 1962 ۾ ڀرتي ٿيو ۽ هڪ سال سروس کانپوءِ آمريڪا پي ايڇ ڊي ڪرڻ ويو. پي ايڇ ڊي دوران هو آمريڪا ۾ ست سال يعنيٰ 1969 تائين موڪل تي رهيو ۽ پوءِ واپس اچي يونيورسٽي جوائن ڪرڻ بجاءِ هن اتي ئي آمريڪا ۾ نوڪري ڪرڻ شروع ڪري ڏني پر جيئن تـ سنڌ يونيورسٽي ۾ هو بطور ليڪچرار ڪنفرم نـ ٿيو هو، تنهن ڪري يونيورسٽي ۾ سندس موڪل واري عرصي کي غير قانوني قرار ڏيئي کيس ڪيترائي شوڪاز نوٽيس جاري ڪندي ٻيهر جوائن نـ ڪرڻ تي سندس نوڪري ختم ڪئي ويئي، جنهن جي خلاف هن اپيل دائر ڪئي. آمريڪا مان موڪل دوران وئڪيشن جي عرصي ۾ اچي هن سنڌ يونيورسٽي جوائن ڪئي ۽ وري نوڪري lien تي رکرائي. نذير مغل غير قانوني طور هڪ ئي وقت تي ٻن جڳهين تي نوڪري جاري رکي پر هو ڪڏهن بـ سنڌ يونيورسٽي ۾ مستقل ملازم نـ رهيو. شيخ اياز جي دور ۾ هن پنهنجي نوڪري بحال ڪرائڻ جي اپيل ڪئي ۽ هن جي نوڪري 19 جون 1980 ۾ وري بحال ٿي.​

(1) پرمسلسل غير حاضري ڪري سندس سروس 16ـ 5ـ 1987 ۾ وري معطل ڪئي ويئي. )ڏسوsyndicate no 42-16-5-1998 (​

(2) ان فيصلي خلاف نذير مغل وري اپيل ڪئي ۽ 1990 ۾ سئنديڪيٽ سندس نوڪري وري lien تي رکي ڇڏي.​

(3) جڏهن نذير مغل 27 جولاءِ 1995 ۾ سنڌ يونيورسٽي ۾ وي سي مقرر ٿيو تـ ان وقت تائين يونيورسٽي ۾ سندس ڪل نوڪري صرف ٻـ سال ڪجهـ مهينا هئي.​

(4) حيرت انگيز طور هن سڄي رڪارڊ ۾ هيرا ڦيري ڪري پنهنجي وائيس چانسلر جي دور ۾ پنهنجي lien واري سروس واري دور کي مستقل ڳڻائيندي پاڻ کي سنڌ يونيورسٽي اندر پروفيسر مقرر ڪرايو، اهو بـ انوکو مثال آهي تـ هڪ وي سي پاڻ کي پاڻ پروفيسر مقرر ڪرائي. سندس پروفيسروارو آرڊر ان وقت جي رجسٽرار حسين شيخ جاري ڪيو. ان آرڊر مطابق سندس سروس 22 سال ست مهينا آهي. وري وي سي شپ جي عرصي ۾ هن پاڻ کي 20 گريڊ مان 21 گريڊ ۾ سينيارٽي جي حساب سان ترقي ڏني، ان مطابق سندس سنڌ يونيورسٽي ۾ 33 سال سروس هئي جنهن تحت هوMeritorious پروفيسر مقرر ٿيو. ان وقت نذير مغل پنهنجي عمر ثابت ڪرڻ لاءِ ميٽرڪ جي سرٽيفڪيٽ بجاءِ حيدرآباد ميونسپالٽي جو ڄم جي تاريخ جو سرٽيفڪيٽ جمع ڪرايو، جيڪو پڻ قائدن قانونن جي خلاف آهي. ان سرٽيفڪيٽ جي مطابق هو 4 ـ 0 ـ1997 تي سنڌ يونيورسٽي مان پروفيسر ٿي رٽائر ٿيو. هن نـ صرف ڪوڙي نوڪري ڏيکاري پروفيسرشپ ورتي پر هن رٽائرمنٽ کانپوءِ پينشن پڻ وٺڻ شروع ڪئي، جيڪا سنڌ يونيورسٽي ايڪٽ جي خلاف ورزي هئي. مجموعي طور تي ڏٺو وڃي تـ نذير مغل جي سنڌ يونيورسٽي ۾ ڪل ملائي چار سال مس نوڪري هئي پر هن اداري کان هڪ ملين رپيا پينشن جا ورتا .​

هن جي رخصتي کانپوءِ سنڌ يونيورسٽي سئنڊ يڪيٽ پاران ان وقت 1999 ۾ انڪوائري ويهاري ويئي، جنهن جي رپورٽ سڄي رڪارڊ سميت نذير مغل جا فراڊ پڌرا ڪري هنن کي مليل پنشن واپس وٺڻ جي سفارش ڪئي، جيڪا سئنڊيڪيٽ فيصلي هيٺ معطل ٿي ويئي.​

v نذير مغل سنڌ يونيورسٽي ۾ وائيس چانسلر طور ٻيهر مقرري کانپوءِ پنهنجو پاڻ کي ترقي ڏيئي پروفيسر ڪرائي پينشن ڏياري، ان معاملي تي ويٺل سينڊيڪٽ جي پاران پاس ڪرايل انڪوائري رپورٽ رد ڪرائي جنهن ۾ کيس پينشن جي مدي ۾ مڪمل 9,60,60 رپيا ڏنا ويا هئا. ياد رهي تـ هن پهرين دور ۾ وائيس چانسلر جي مقرري دوران يونيورسٽي ۾ڪوڙي سروس Claim ڪري پينشن جا پئسا ورتا هئا، جڏهن سندس برطرفي کانپوءِ سينڊ يڪٽ ان تي جانچ ڪرائي جنهن ۾ سندس Claim ڪوڙو ثابت ٿيو ڇو تـ ان عرصي ۾هوءَ آمريڪا ۾ ايڊينبرو يونيورسٽي ۾ Job ڪندو رهيو هو. (جنهن جو رڪارڊ موجود آهي) نذير مغل پروفيسرطورمقرر ڪيل مدو پورو نـ ڪيو هو ، ٻاهر نوڪري هئڻ ڪري کيس نوڪري مان خارج ڪيو ويو هو. پرهن يونيورسٽي ۾ وائيس چانسلر طور مقرري کانپوءِ ڪوڙوپروموشن وٺي پنهنجي لاءِ پينشن جاري ڪرائي.​

v ان انڪوائري رپورٽ ۾ مٿس ٻيا ڪرپشن جا ڪيس بـ درست ثابت ڪيا ويا هئا جنهن ۾ هن ڪرپشن ۾ شريڪ يونيورسٽي ملازمن کي غيرقانوني طور تي ميرٽ ۽ يونيورسٽي ڪوڊ جي لتاڙيندي پروموشن ڏنا هئا. سندس پاران غير قانون طور تي پروموٽ ڪيل سڀئي آفيسر کائنس پوءِ ايندڙ وائيس چانسلر مظهرالحق صديقي جي دور ۾ سينڊيڪٽ جي انڪوائري اچڻ بعد معطل ڪيا هئا جن کي هن ايندي شرط بحال ڪرايو.​

هن دور ۾ انهن معطل ٿيل آفيسرن کي ٻيهر بحال ڪري کين پنهنجي ويجهو آڻي نئين سر وائيس چانسلر سيڪريٽريٽ ۾ مقررڪيو. جتي پڻ هنن معطل ٿيل آفيسرن پئسا وٺي يونيورسٽي ۾ نوڪريون وٺي ڏيڻ ۽ بدلين عيوض رشوت وٺڻ واري ڌنڌي ۾ نالوڪمايو.​

نذير مغل پنهنجي مقرري دوران اڍائي سالن اندر سينٽ جي ڪا به ميٽنگ سڏائي يونيورسٽي جو بجٽ پاس نه ڪرائي سگهيو ڇاڪاڻ ته ان ۾ کيس خدشو هو تـ سندس غير معمولي مالي خردبرد جو داستان کلي سگهي ٿو، جيڪو سينٽ جا ميمبر ڪنهن بـ صورت ۾ پاس نـ ڪن ها.​

نذير مغل وائيس چانسلر طور مقرري دوران يونيورسٽي ۾ لائبريري جي بجٽ لاءِ ٽڪو به جاري نه ڪيو، جنهن ڪري ٻن سالن جي عرصي ۾ يونيورسٽي لائبرري جي ڏس ۾ ڪا بـ خريداري نـ ڪري سگهي، جڏهن تـ نون ڪتابن جي آمد ڪنهن به يونيورسٽي جي تدريسي ۽ تحقيقي ڪم جي لاءِ انتهائي ضروري هوندي آهي.​

نذيرمغل پنهنجي مقرري دوران سائنس فيڪلٽي ۾ ٿيندڙ ريسرچ لاءِ ڪيميڪل ۽ ٻين ضروري شين جي خريد لاءِ مختص ڪيل فنڊ روڪي، پنهنجي آفيس ۽ گهرجي مرمت تي ڪروڙين رپين جي بجٽ خرچ ڪئي (ثبوت طور وائي چانسلر هائوس جي مرمت جي نالي ۾ وائيس چانسلر آفيس جي مرمت / تعمير جا وائچر چيڪ ڪري سگهجن ٿا.(​

نذير مغل هڪ پاسي تدريسي ۽ تحقيقي ڪمن جي لاءِ فنڊز جي عدم دستيابي جو عذر ڏيکاريندو رهيوتـ ٻي پاسي ٻن سالن اندر يونيورسٽي جي خرچ تي سندس ذاتي پرڏيهي دورن جوتعداد ڪنهن بـ وائيس چانسلر کان نه رڳو وڌيڪ آهي پر ان ڪري غير ضروري آهي جو انهن دورن ۾ ڪٿي به ڪنهن پرڏيهي يونيورسٽي سان ٻه طرف تعاون جو ڪوبه MOU صحيح نه ڪيو آهي.​

جيئن ته نذير مغل جي وائيس چانسلر طور مقرري ڪنهن به قانوني قائدي مطابق نه ٿي هئي ان ڪري هن پنهنجي ڪرسي مضبوط رکڻ لاءِ گورنرهائوس جي خوشنودي حاصل ڪرڻ لاءِ پنهنجي پرڏيهي دورن ۾ گورنر جي ان وقت جي پرنسيپل سيڪريٽري ممتاز رحمان کي به ساڻ کنيو. ٻنهي جي آمريڪا ۽ اسپين جي دورن ۽ اتي هوٽلن ۾ مهانگي رهائش سميت ٻيا خرچ بـ ان غريب يونيورسٽي کان وصول ڪيا ويا جتي فنڊز جي عدم دستيابي ڪري تدريسي شعبن ۾ پرنٽنگ پيپروٺڻ تي به پابندي قائم ڪئي وئي هئي. جڏهن تـ ممتاز رحمان سان سندس پرڏيهي دوري ۾ 50 لک کان مٿي پئسا خرچ ڪيا ويا.​

جيئن ته نذير مغل اڳئي به ميڊيڪل بلن جي مد ۾ ”واياگرا“ جا بل به يونيورسٽي اڪائونٽ مان کڻندو رهيو، هن دفعي به هن پنهنجي بيمارين لاءِ ڪروڙن روپين جا ڪوڙا بل يونيورسٽي جي کاتي ۾ جمع ڪرائي پئسا کنيا، ثبوت طور يونيورسٽي ۾ وائيس چانسلر جا ميڊيڪل بل ڏسي سگهجن ٿا.​

ميڊڪل بلن جي مد ۾ هن پنهنجي سَس کي پنهنجي ماءُ ڄاڻائيندي (Mother in law) ان جا ميڊيڪل بل به غريب يونيورسٽي کان چارج ڪيا.​

عمررسيده ۽ بيمارهئڻ ڪري وائيس چانسلر طورهن يونيورسٽي ۾ قائم وائيس چانسلر آفيس بجاءِ اڍائي سالن ۾ ڪي ٻـ سال پنهنجي ڪراچي واري گهر ۽ وائيس چانسلر هائوس کي ڪئمپ آفيس بڻائي ان ۾ گذاريا. انهن ٻنهي گهرن جو خرچو سندس وائيس چانسلري دور ۾ سنڌ يونيورسٽي ادا ڪندي رهي.​

سنڌ يونيورسٽي جي تاريخ ۾ اهوپهريون ڀيروهو تـ ڪنهن وائيس چانسلرڪراچي ۾ پنهنجي ذاتي گهر کي ڪئمپ آفيس طور ڏيکاري پنهنجي گهر جي خرچ ۾ ڪروڙين رپيا يونيورسٽي کان وصول ڪيا.​

نذير مغل غير ملڪي دورن ۾ پنهنجي پٽ جي بنگلاديش مان شادي لاءِ يونيورسٽي جي آفيسرن ۽ پنهنجي فيملي جوخرچ يونيورسٽي جي فنڊز مان وصول ڪيو ويو ۽ ان کي پڻ سرڪاري دورو ڏيکاريو ويو.​

يونيورسٽي ڪئمپس ۾ سندس پٽ جي وليمي جي تقريب جا سمورا پئسا يونيورسٽي جي کاتي مان ڀريا ويا. ان شادي لاءِ ٻـ نيون اي وي پي گاڏيون خاص طور تي خريد ڪيون ويون.​

نذير مغل کي جبري رخصتي تي موڪلڻ وقت کيس بيمار ڄاڻائي ميڊيڪل ليو ڏني ويئي هئي پر هن چئن مهينن جي ميڊيڪل ليو تي پرڏيهي دورا ڪيا جنهن جو خرچ 70 لک کان مٿي آهي.​

امتحانن واري شعبي ۾ ڪاليج سائيڊ کان ٿيندڙ امتحانن ۾ ليٽ فيءَ ڪٿي 500 تـ ڪٿي 5000 ورتي ويئي ۽ ان ليٽ في جي مد ۾ لکين رپين جي وصولي ڪري مالي خرد برد ڪئي ويئي. جنهن لاءِ الڳ هڪ شفاف عدالتي انڪوائري ڪرائڻ جي ضرورت آهي.​

ايڊميشن جي شعبي ۾ مالي ۽ انتظامي خرد برد جي انتها اها هئي جوسيٽون من پسند شاگرد ڌرين عيوض کپائڻ جي نتيجي ۾ پروفيسر“ بشير چنڙ” جو قتل ٿيو. ايڊميشن لسٽ جيڪا عام طور تي نيئن سيشن هلڻ کان اڳ جنوري جي پهرين هفتي ۾ پڌري ڪئي ويندي آهي، سيٽون پئسن تي کپائڻ ۽ انٽري ٽيسٽ جي نتيجن ۾ ڦيرڦارڪري هن سال فائينل لسٽ پهرين سيمسٽرجي امتحانن دوران يعنيٰ جنوري بجاءِ جون ۾ جاري ڪئي ويئي جيڪا ڇهـ مهينا ليٽ هئي، جنهن ڪري زيرو حاضري وارا شاگرد بـ امتحانن ۾ ويهاريا ويا.​

ايڊميشن جي شعبي ۾ ٿيل مالي خرد برد ۽ ٻين غير قانوني بي ضابطگين جي ڪري شاگرد ڌرين کي هڪٻئي سان ويڙهائي يونيورسٽي جي تدريسي ماحول کي تباهـ ڪيو ويو (سال 2012 جي ايڊميشن جو ريڪارڊ سيل ڪرائي اعليٰ عدالتي جانچ ڪرائي وڃي تـ يونيورسٽيءَ ۾ پروفيسر سميت ٽن شاگردن جي قتل جا سبب بـ ملي پوندا.)​

​

جاري آهي۔​

 

يونيورسٽي جا قاعدن ۽ قانونن جي لتاڙ ڪندي ڪيل غير قانوني ڀرتيون۽ فائده​

وائيس چانسلرمقررٿيڻ شرط نذير مغل ڪجهه ڪرپٽ آفيسرن سان گڏجي وائيس چانسلر سيڪريٽريٽ ۾ هڪ خفيه سيل ٺاهيو هو جنهن وسيلي پابندي هئڻ باجود بنا اشتهار جي پهرين گريڊ کان سورهين گريڊ جون نوڪريون پئسن تي کپايون ويون۽ ڪجهـ سياسي رشوت طور ميرٽ جي لتاڙ ڪندي لڪ ڇپ ۾ ورهايون ويون.​

پنهنجي غير قانوني ڪمن ۽ مالي خرد بُرد تي پردو وجهندڙ يونيورسٽي جي آفيسرن ۽ ملازمن کي رشوت طورنوڪريون ڏنيون ويون. يونيورسٽي جي قائدن / قانونن جي لتاڙ ڪندي گريڊ هڪ کان 16 گريڊ تائين بنا ڪنهن اشتهار ۽ انٽرويو جي هيٺيون ڀرتيون ڪيون ويون.​

موجوده رجسٽرار محمد نواز ناريجي جي پٽ کي سنئون سڌو 16 گريڊ ۾ نوڪري ڏني ويئي .​

وائيس چانسلر جي ذاتي P.A نديم ٻٽ جي ڀيڻ کي 16 گريڊ ۾ پناهـ علي شاه اسڪول ۾ بنا ڪنهن اشتهار۽ انٽرويو جي ڀرتي ڪيو ويو.​

اڳوڻي رجسٽراراخترميمڻ جي ڌيءَ کي پڻ سيد پناهـ علي شاه اسڪول ۾ 16 گريڊ ۾ نوڪري ڏني ويئي جيڪا بنا ايڊورٽائيزمنٽ جي هئي.​

اڳواڻي ڊائريڪٽر فنانس بشير شيخ جي ڌيءَکي بـ 16 گريڊ ۾ پناه علي شاه اسڪول ۾ نوڪري تي رکيو ويو.​

شهيد بشير احمد چنڙ جي خاندان کي خوش رکڻ لاءِ سندس ڌيءَ کي سليڪشن بورڊ ۽ انٽرويوکانسواءِ سنئون سڌو IBS ۾ 18 گريڊ ۾ ليڪچرر جو آرڊر ڏنو ويو، جڏهن تـ ٽيچنگ ۾ سليڪشن بورڊ کان سواءِ مقرري يونيورسٽي ڪوڊ ۽ ميرٽ جي لتاڙ آهي.​

پاڪستان اسٽڊي سينٽر جي ڊائريڪٽرجي 22 گريڊ واري Post تي 16هين گريڊ جي شاهد مرزا کي انچارج طورمقررڪيو ويو، جيڪو سئنڊيڪيٽ جي ميمبر رٽائر جسٽس حامد مرزا جو ڀاڻيجو آهي. هن نان اڪيڊمڪ ماڻهوءَ کي سڄي اڪيڊمڪ فيڪلٽي جو انچارج مقرر ڪيو ويو ڇو ته اهو نذير مغل جو خاص ماڻهو هو. جيئن مالي خرد برد ۾ آساني ٿئي. ياد رهي ته پاڪستان اسٽڊي سينٽر جي بجٽ يونيورسٽي بجاء سنئون سڌو وفاق مان ايندي آهي.​

يونيورسٽي جي قائدن ۽ قانونن جي ابتڙ غير قانوني طور مقرر ڪيل ميمبر پروفيسر ڀٽو جي پٽ ذوالفقارعلي ڀٽو کي غير قانوني طريقي سان IICT ڊپارٽيمنٽ مقررڪيو ويو. هڪ يونيورسٽي مان ٻي يونيورسٽي ۾ ڪنهن فيڪلٽي ميمبر کي ڊيپيوٽ ڪرڻ وائيس چانسلر بجاءِ چانسلر جو اختيار آهي جيڪو نذير مغل غير قانوني طور تي استعمال ڪيو.​

ٽرانسپورٽ آفيسر سيد سجاد علي شاه جي ڀائٽي جي مقرري به بنا ڪنهن اشتهار ڏيڻ ۽ انٽرويو وٺڻ جي سنئون سڌو 16 هين گريڊ ۾ ڪئي وئي.​

خود ٽرانسپورٽ آفيسر سيد سجاد علي شاه جي مقرري ۽ پروموشن تي سئنڊيڪيٽ بـ وائيس چانسلرتي قانون جي لتاڙ جو اعتراض اٿاري چڪي آهي.​

نيچرل سائنس جي ڊين طاهر راجپوت جي پٽ کي بنا اسڪريننگ ٽيسٽ ، انٽرويو ۽ اشتهار جي سنئون سڌو آءِ بي ايس ۾ ريسرچ ايسوسيئٽ طور ڀرتي ڪيو ويو.​

هن وائيس چانسلر سنڊيڪيٽ مان نين پوسٽن جي منظوري وٺڻ کانسواءِ 300 غير قانوني، اڻ اشتهاريل ڀرتيون ڪيون جنهن مان ڪجهه نوڪريون پئسن تي کپائي ڏنيون ويون ۽ ڪجهه نوڪريون ڪرپشن ۾ شريڪ آفيسرن کي خوش ڪرڻ لاءِ ڏنيون ويون جيڪو يونيورسٽي جي مالي وسيلن تي ڳرو بار بڻيل آهن.​

سنڌياالاجي جي متنازعـ ڊائريڪٽر محمد قاسم ماڪا کي ڪرپشن ۾ شريڪ هجڻ جي ڪري ذاتي فائدا ڏيندي کيس يونيورسٽي جي ڪروڙ رپين جي ماليت سان بڪ اسٽور قائم ڪري ڏنو ويو. بڪ اسٽور جنهن جي ماهوار ڪمائي 7000 مس آهي ان ۾ 30 ملازم ڀرتي ڪيا ويا جنهن مان خود محمد قاسم ماڪا جا ٻـ پٽ بـ شامل آهن 7000 ڪمائي ڏيندڙ بڪ اسٽور جي ڪل ملازمن جي ماهوار پگهار جي مد ۾ يونيورسٽي 280000 کان مٿي پئسا خرچ ڪري رهي آهي.​

سنڌ ياالاجي ۾ ايزي لوڊ ڀرائڻ واري پوسٽ کي11 گريڊ ڏيئي ان تي ملازم ڀرتي ڪيو ويو جنهن هيلتائين فقط 20 رپين جو ايزي لوڊ ڀرڻ وارو ڪم سرانجام ڏنو آهي.​

سنڌ يونيورسٽي ڪالوني جي بنگلن جي الاٽمنٽ ۾ به يونيورسٽي جي قائدن قانونن جي لتاڙ ڪئي وئي. يونيورسٽي ڪالوني جو انچارج بـ هڪ رٽائرڊ ماڻهو کي مقرر ڪيو ويو.​

اسٽور ۽ پرچيز آفيس ۾ خريداري جي ڏس ۾ پڻ ڪروڙين رپين جون گهوٻيون هنيون ويون ۽ مالي خرد برد ڪئي وئي. جنهن جا ڪجهه نمونا هيٺ ڏجن ٿا.​

​

​

آگسٽ 2011 ۾ ڪيل خرچ​

12,55000 روپيـ هاسٽلز ۾ گٽرن جي ڍڪڻ لڳائڻ لاءِ ڏنا ويا.​

27,90000 جون لوهي کٽون گرلس هاسٽل جي خريداري ۾ ڏيکاريون ويون.​

ڪنٽرولر آفيس جي لاءِ 17,3040 روپيه ڪنٽرولر آفيس لاءِ 30K جي ڊيزل جنريٽر جي خريداري لاءِ ڏيکاريا ويا.​

23,65175 روپيه 30k ڊيزل جنريٽر جي خريداري لاءِ ايجوڪيشن فيڪلٽي کي مختص ڪيا ويا.​

22,19,250 ڊيزل جنريٽر30k، سينٽ هال ۽ وي سي سيڪريٽريٽ جي خريداري لاءِ مختص ڪيا ويا.​

سينيٽري جي سامان لاءِ 27,65,055 جي خريداري ڏيکاري وئي.​

12 ڪروڙ روپيا دادو ڪئمپس جي ان زمين جي خريداري لاءِ ڏيکاريا ويا جيڪا تڪراري آهي ۽ ان تي دادو جي سينيئر وزير جو قبضو ٻڌايو پيو وڃي.​

ياد رهي ته هڪ پاسي سندس ذاتي خرچ لاءِ شاهانه خرچ جاري هئا ته ٻي پاسي ٻن سالن تائين لائبريري جي ڪتابن ۽ ڪيميڪلز جي خريداري تي پابندي هئنل هئي.​

جاري آهي​

 

تدريسي ۽ تحقيقي ڪلچر جي حوصلي شڪني ۾ وائيس چانسلر نذير مغل جو ڪردار ۽ ڪارڪردگي​

ڪنهن به يونيورسٽي جو رينڪنگ جودارو مدار ان جي تحقيقي ۽ تدريسي عمل سان ڳانڍاپيل آهي نذير مغل جي دور ۾ يونيورسٽي جي رينڪنگ ٽي ڏاڪا هيٺ ڪري آهي ڇاڪاڻ تـ ڻ نذير مغل سنڌ يونيورسٽي ۾ تحقيقي ۽ تدريسي ڪلچر کي هٿي وٺائڻ بجاءِ انهن سڀني ڪمن جي حوصلـ شڪني ڪئي جيڪي ڪنهن بـ يونيورسٽي جي اعليٰ معيار جي ضمانت هوندا آهن.​

نذير مغل، وائيس چانسلر طور چارج وٺندي ئي لائبريري جي ڪتابن ۽ تحقيق لاءِ سائنسي سامان مشين، ڪيميڪل ۽ ٻين تدرسي ۽ تحقيقي عمل لاءِ گهربل مواد جي خريداري تي Ban هڻي ڇڏيو جيڪو سندس جبري رخصتي تائين جاري رهيو.​

نذير مغل وائيس چانسلر مقرر ٿيندي ئي HEC پاران جاري ڪيل استادن جي اسڪالرشپ بند ڪري ڇڏي، هن اها رقم استادن تي خرچ ڪرڻ بجاءِ ان رقم تي Deposit Fixed ۾ رکي ان تي Interest کاڌو. پرڏيه مان پي ايڇ ڊي ڪيل استادن سان يونيورسٽي جي رينڪنگ ۽ معيار اعليٰ ليکيو ويندو آهي نذير مغل استادن جي اهليت ۽ قابليت توڙي يونيورسٽي جي معيار کي بهتر بنائڻ بجاءِ پنهنجي عياشين ۽ ذاتي پرڏيهي دورن تي يونيورسٽي جو پئسو پاڻي جيان خرچ ڪيو.​

HEC پاران جاري ڪيل فنڊز کي مناسب طريقي سان خرچ نه ڪرڻ ۽ GRE پاس ڪيل 80 کان مٿي استادن جي اسڪالرشپ روڪڻ تي HEC سنڌ يونيورسٽي کي فيڪلٽي Development لاءِ اسڪالرشپ ڏيڻ بند ڪري ڇڏي. ياد رهي ته ٻن سالن جي عرصي دوران صرف ٻن ٽن استادن کي اسڪالرشپ کي ٻاهر موڪليوويو جڏهن ته ان جي ڀيٽ ۾ ڪراچي جي يونيورسٽي 100 کان مٿي استادن کي اعليٰ تعليم لاءِ پرڏيهـ موڪليو ۽ پنجاب ۾ ان کان ٻيڻا استاد پرڏيهه اسڪالرشپ تي موڪليا ويا.نذير مغل جي استادن جي اسڪالر شپ روڪڻ واري عمل يونيورسٽي جي رينڪنگ ۽ معيار کي ناقابل تلافي نقصان پهچايو.​

يونيورسٽي جي Ranking ۾ ڪئمپس اندرتدرسي سرگرمين ۾ بين الاقوامي ڪانفرنسون ورڪشاپ، سمپوزيم ۽ سيمينار بـ هڪ اهم جزا لکيا وڃن ٿا. نذير مغل پنهنجي مقرري دوران اهڙي ڪنهن به اڪيڊمڪ سرگرمي کي هٿي ڏيڻ بجاءِ فنڊز روڪي يونيورسٽي جي Ranking کي ڪافي نقصان پهچايو.​

نذير مغل يونيورسٽي جي سربراهه جي حيثيت ۾ پنهنجي تقرري جي سموري عرصي دوران سواءِ ڪنهن ايڪڙ ٻيڪڙ جي ڪنهن PH.D جي فائنل سيمينار جي صدارت نـ ڪئي جڏهن تـ يونيورسٽن جي اڪيڊمڪ سربراهن لاءِ اها ڳالهه اعزاز ليکي ويندي آهي تـ اهي يونيورسٽيءَ اندر ٿيندڙ تحقيق کي ذاتي طور تي نظر مان ڪڍن ۽ انهن سيمينارن جي صدارت دوران تحقيقي ڪم جي ڪوائيلٽي ۽ اسڪالر جي ذاتي دلچسپي ۽ محنت جو شخصي طور تي جائزو وٺي سگهن. پر نذير مغل بيماري ۽ پيرسني جي ڪري حقيقي طور تي اهڙي ڪنهن به سيمينار ۾ ويهڻ کان قاصر آهي جنهن ۾ لاڳتي دلچسپي ۽ Concentration کپي.​

يونيورسٽي جي سربراهه جي حيثيت ۾ لازم آهي ته اهو ذهني ۽ جسماني طورتي ايترو چشت۽ لائق هجي جو اهو يونيوسٽي جي تدريسي توڙي انتظامي شعبن جي ڪارڪردگي کان باخبر هجي ۽ اهڙي عمل لاءِ ڪئمپس اندر سندس موجودگي لازم آهي جڏهن ته نذير مغل پنهنجي وائيس چانسلري جي سموري عرصي دوران آفيس کي گهربل ٽائيم ڏيڻ بجاءِ گهڻو عرصو ڪراچي واري گهر ۾ قائم ڪئمپ آفيس ۾ هئڻ ڪري اڪيڊمڪ هيڊس کان ويندي ٻين انتظامي شعبن جي سربراهن کي سندس ملاقات لاءِ مهينن کان پوءِ ٽائيم ملي سگهندوهو. کائنس اڄ بـ جي سڀني شعبن جي سربراهن جا نالا پڇا وڃن تـ شايد پاڻ انهن کان واقف نـ هوندو.​

نذير مغل جي دور ۾ اڪيڊمڪ هيڊس جي ورلي ڪا ميٽگ سڏائي وئي هجي سواءِ ان وقت جڏهن سندس تقريري دوران سندس مخالفت ٿي تڏهن هن گڏجاڻي ڪوٺائي.​

وائيس چانسلر طور نذير مغل جي مقرري کان پوءِ تدرسي عمل ۾ لاٿ جو وڏو سبب سندس پاران امتحانن ۾ شاگردن کي Zero attendance سان ويهڻ جي اجازت ڏيڻ بـ هڪ اهڙو فيصلو هو جنهن ڪري 2011 جي فائينل سيمسٽر ۾ ڪي 20 ڏينهن تدريسي عمل هلي سگهيوهو. ڇاڪاڻ ته Zero attendance کان پوءِ شاگردن ۾ ڪلاس Attend ڪرڻ جو رجحان گهٽيو. سندس ان فيصلي پڻ يونيورسٽي جي تدريسي عمل کي ناقابل تلافي نقصان پهچايو.​

يونيورسٽي جي رينڪنگ ۽ تدريسي ۽ تحقيقي عمل کي بتدريج پهتل نقصان ۾ سندس داخلا پاليسي کي پڻ خصوصي حيثيت حاصل آهي، جنهن ۾ پڻ اينٽري ٽيسٽ ۾ ميرٽ جي لتاڙ ڪندي Zero ۽ Minus ۾ مارڪون حاصل ڪندڙن کي رشوت عيوض اعليٰ انتهائي پروفيشنل شعبن ۾ داخلا ڏني ويئي. جيئن تـ اهڙن شاگردن جو رجحان پڙهائي بجاءِ ٻيو ڪجهه هوندو آهي، تنهنڪري اهڙن نااهل شاگردن تدريسي ماحول کي ناقابل تلافي ڇيهو رسايو​

جاري آهي​

 

نذير مغل جي دور ۾ سنڌ يونيورسٽي جي پرامن ڪئمپس کي پهتل نقصان
ڪئپمس سربراهه جي حيثيت ۾ سندس غير موجودگي، ڪرپشن تي ٻڌل داخلا پاليسي ، ناقص امتحاني پاليسي، مالي ڪرپشن، ميرٽ جي لتاڙ ۽ سربراهه جي حيثيت ۾ يونيورسٽي قاعدن ۽ قانونن جي مسلسل خلاف ورزي حقيقت ۾ ڪئپمس کي پر امن تدريسي ماحول ڏيڻ بجاءِ هڪ WAR ZONE ۾ تبديل ڪري ڇڏيو هو.نذير مغل جي دور ۾ يونيورسٽي ڪئمپس اندر فائرنگ ۽ ڇوڪرن جو زخمي ٿيڻ معمول جي ڳالهـ هئي.
نذير مغل جي وائيس چانسلر شپ جي دور ۾ مختلف جهيڙن جي حوالي سان هڪ سال اندر 235 ايف آءِ آر درج ٿيون، جيڪو يونيورسٽي جي ٿيندڙ ڏوهن ۾ هڪ رڪارڊ واڌارو آهي. چار سئو کان مٿي شاگرد فائرنگ ۽ جهيڙن جي واقعن ۾ زخمي ٿيا. هڪ پروفيسر شهيد بشير احمد چنڙ ڪئپمس اندر هلندڙ تدريسي عمل دوران قتل ڪيو ويو. چار شاگرد ڪئپس اندر تعليمي سيشن دوران قتل ٿيا.
يونيورسٽي اندر موبائلن جي چوري، موٽرسائيڪلن جي ڦرروز جو معمول بڻيل هو يونيورسٽي ڪالوني ۾ صديق ڪلهوڙي جي گهر تي نامعلوم ماڻهن جي فائرنگ ۽ ڊائريڪٽر ايڊميشن پروفيسربشير احمد شيخ جي گهر تي ڌاڙو سندس دور جا خاص واقعا آهن جن جا جوابدار اڄ تائين نـ پڪڙيا ويا.
ڪئپمس اندر شاگردياڻين کي جنسي حراسان ڪرڻ جا واقعا بـ رپورٽ ٿيا جيڪي ميڊيا ۾ پڻ آيا پر انهن ۾ پڻ ڪنهن به جوابدار کي سزا ڪونـ آئي پر ان جي برعڪس اهڙن واقعن کي لڪائڻ ۽ دٻائڻ جي ڪوشش ڪئي ويئي.
نذير مغل جي ويجهي سمجهندڙ پرو وائيس چانسر جي هڪ ويجهي ساٿي تي پڻ جنسي طور تي حرا سان ڪرڻ جا الزام آيا پر وائيس چانسلر انڪوائري ڪرڻ بجاءِ ان کي کي بچائڻ جي ڪوشس ڪئي .
ڪاوش جي ايڊيٽرنياز پنهور جي گاڏي کي ڪئپمس اندر ماروي هاسٽل آڏو نامعلوم جوابدارن باهه ڏيئي ساڙي ڇڏيو. جنهن جا جوبدار پڻ گرفتار ڪونه ٿيا.

جاري آهي۔۔

 

سينيٽ ۽ سينڊيڪٽ جي منظوري کانسواءِ ورتل فيصلا​

سنڌ يونيورسٽي اولڊ ڪئمپس جي پراڻي ايجوڪيشن نيڪلٽي جي بلڊنگ جنهن ۾ بي ايڊ ۽ ايم ايڊ جا ڪلاس هلندا آهن. USAIDجي پراجيڪٽ جي فنڊز جي آڌارتي سال اڳ ٺهيل بلڊنگ مڪمل طور تي ڊاهي پٽ ڪري نئين بلڊنگ ٺاهڻ جي پراجيڪٽ جي منظوري نه ورتي ويئي.​

ان پراجيڪٽ تي تمام سنجيده قسم جا اعتراض آهن ته نئين بلڊنگ لاءِ نئين جاءِ خريد ڪرڻ بجاءِ ان پراڻي عمارت کي ڇوٿو ڊاهيو وڃي جنهن ۾ اڃان هڪ سال اڳ ڪروڙ روپين لاڳت سان نيا ڪمرا ٺهرايا ويا آهن.​

ان پروجيڪٽ ۾ پراڻي بلدنگ ڊهڻ ۽ نئين بلڊنگ ٺهڻ واري عرصي دوران بي ايڊ ايم ايڊ جا ڪلاس ڊسٽرڊ ڪري ناقابل تلافي نقصان پهچايو ويو آهي.​

هن سال بي ايڊ جي داخلا به نه ڪئي ويئي آهي ڇو ته ناقص پروجيڪٽ جي ڪري نيئن سال جي شاگردن لاءِ ڪلاس هلائڻ لاءِ جاءِ ناهي جڏهن ته پراڻي بلڊنگ غير ضروري طور تي ڊاهي پئي وڃي. سنڌ يونيورسٽي وٽ پنهنجي واڌو زمين هوندي پراڻي بلڊنگ جي جاءِ تي نئين بلڊنگ ٺهرائڻ وارو ڊرامو فنڊز جو ڳچ حصو خرد برد ڪرڻ لاءِ رچايو ويو آهي.​

هڪ سال لاءِ بي ايڊ جا ايڊميشن نه ٿيڻ جو ملطب آهي ته ٻن سالن جي مدي تائين ان ڊگري لاءِ سنڌ يونيورسٽي جو ڪوبه ڊگري يافته شاگرد Available نه هوندو.​

ايجوڪيشن فيڪلٽي ۾ يونيورسٽي جي قائدن جي لتاڙ ڪندي Education Distance جي مالي بچت ۾ خرد برد ڪئي وئي آهي.​

ايجوڪيشن فيڪلٽي ۽ اولڊ ڪئپمس ۾ BBA جون داخلائون ڪيون ويون جڏهن ته IBS پاران اڳ ئي Self Finance Evening, Morning ڪلاس علامه آءِ آءِ قاضي ڪئمپس ۾ هلندڙ آهن.​

BBA جا ڪلاس شهر ۾ هلائڻ لاءِ وقت شاگردن کي لائبريري ڪمپيوٽر ۽ ٻين سهولتن جو ڪو بـ خيال نه رکيو ويو اهڙي قسم جي غير معياري ۽ تدرسي عمل لاءِ يونيورسٽي جي ڪنهن به مجاز اداري يعني سينڊيڪٽ کان منظوري نـ ورتي ويئي ۽ نـ ئي ان جي PCI جمع ڪرائي وئي. اهڙي ناقص ڊگري سنڌيونيورسٽي جي معيار کي ناقابل تلافي ڇيهو رسائڻ جو سبب بڻبي.​

ٻي طرف اهي شاگرد جن ڳريون فيسون ڀري ان پروگرام ۾ داخلا ورتي انهن جو مستقبل داءُ تي لڳل آهي.​

سينڊيڪيٽ جي منظوري کان سواءِ غير ضروري طور تي سنڌيونيورسٽي ڪئپمس ۾ چار پرو وائيس چانسلر مقرر ڪيل آهن، جن جي تعداد پاڪستان جي ڪنهن به يونيورسٽي کان مٿي آهي. انهن چار PVCs ۾ ٽن PVCs جون آفيسون به اڃان سنڌيونيورسٽي علامه آءِ آءِ قاضي ڪئپمس ۾ ئي آهن اهي Posts ڪنهن به مجاز اداري جي منظوري کانسواءِ آهن ۽ يونيورسٽي تي مالي بارآهن. ياد رهي ته اهي پڻ بنا ڪنهن اشتهار جي سياسي ۽ ذاتي مفاد حاصل ڪرڻ جي لاءِ نيون CREAT ڪيل Posts آهن. انهن چار PVCs مان هڪ PVC ريٽائرڊ آهي جنهن جي مقرري پڻ سپريم ڪورٽ جي آرڊر جي لتاڙ آهي.​

سپريم ڪورٽ جي آرڊر جي لتاڙ ڪندي ۽ سنڊيڪٽ جي منظوري کانسواءِ سنڌ يونيورسٽي جي وائيس چانسلر جي صلاحڪار لاءِ هڪ ٻي نئين Post تي هڪ رٽائرڊ آفيسر ظهور افغان کي مقرر ڪيو ويو آهي. ياد رهي وائيس چانسلر جي ايڊوائيزر جي Post پاڪستان جي ٻي ڪنهن به يونيورسٽي ۾ ناهي، اهو مالي بوجهـ به سنڌ يونيورسٽي کي برداشت ڪرڻو پوندو، جنهن ۾ اڄ تائين تدرسي ۽ تحقيقي مواد جي خريداري تي پابندي پيل آهي.​

يونيورسٽي ۽ قانونن مطابق وائيس چانسلر پنهنجي Power جي استعمال جي منظوري لاءِ سينڊيڪٽ مان منظوري وٺڻ جو مجاز آهي، ان کان بچڻ خاطر پنهنجي غير قانوني آرڊرس کي شيلٽر ڏيڻ لاءِ وائيس چانسلر پنهنجي هن پسند/ آفيسرن/ ڊينن PVCs تي ٻڌل هڪ جڙتو وائيس چانسلرايگزيڪيٽوڪميٽي جوڙي ان کان پنهنجي ايمرجنسي پاور ۽ ٻين فيصلن جي منظوري وٺندي هڪ طرح سان سئنڊيڪيٽ جي متبادل طور استعمال ڪندو رهيو جڏهن تـ يونيورسٽي ڪوڊ ۾ وائيس چانسلر ايگزيڪٽو ڪميٽي جي ڪابـ قانوني حيثيت ڪانـ آهي .​

وائيس چانسلر پاران سنڊيڪٽ پڻ غير قانوني آهي جنهن کي پڻ سنڌ هاءِ ڪورٽ ۾ چيلنج ڪيو ويو آهي يونيورسٽي جي ڪوڊ جي لتاڙيندي سنيئر وڪيل جهمٽ مل کي سينيئر ڊين جي جاءِ تي ميمبر رکيو ويو جيڪا سينيئر ڊين جي حق جي لتاڙ آهي ڇاڪاڻ تـ وڪيل جهٽ مل ڪنهن بـ يونيورسٽي ۾ ريگيولر پروفيسر ناهي پر کيس يونيورسٽي قائدن جي لتاڙ ڪندي ان ڪري سنڊيڪيٽ جو ميمبر ڪيو ويو جيئن اهو وائيس چانسلر جي غير قانوني ڪمن، ڪرپشن ۽ بد انتظامي کي قانوني لبادو پارائي سگهي.​

سنڌ يونيورسٽي جي سئنڊيڪيٽ ۾ پروفيسر ممتاز ڀٽو ۽ پروفيسر اسد لاڙڪ جي ميمبر واري حيثيت پڻ متنازعـ آهي ڇاڪاڻ تـ اهي ٻئي يونيوپرسٽي مان پينشن کڻندڙ آهن.​

سئنڊيڪيٽ ۾ چار PVCs جو ميمبر هجڻ پڻ متنازعـ آهي جيڪي وائيس چانسلر جي ڪرپشن ۽ غير قانوني ڪمن کي سئنڊيڪيٽ ۾ شيلٽر ڏيڻ لاءِ رکيا ويا آهن جڏهن تـ يونيورسٽي ڪوڊ مطابق فقط هڪ PVC سئنڊ يڪيٽ جو ميمبر ٿي سگهي ٿو.​

نذير مغل جي وائيس چانسلر طورغير قانوني تقرري سميت( جيڪا پڻ سنڌ هاءِ ڪورٽ ۾ چيلنج ٿيل آهي) ۽ مٿين سڀني حقيقت کي مد نظر رکي ڏسجي تـ هن شخص سنڌ يونيورسٽي مان رڳو ناجائز مالي فائدا نه ورتا آهن پر سندس داخلا ۽ امتحان پاليسي، مالي خرد برد ۽ بد انتظامي سنڌ يونيورسٽي جي عزت، ناموس ۽ نالي سميت سنڌ جي تعليمي مستقبل کي ناقابل تلافي نقصان پهچايو آهي. ان ڪري سنڌ يونيورسٽي جا استاد، شاگرد، ملازم ۽ سنڌ جا گهڻ گهرا۽ سنڌ جو ساڃهه وند طبقو اپيل ٿو ڪري ته نذير مغل کي فوراً سنڌ يونيورسٽي ۾ وائيس چانسلر شپ جي Post تان هٽائي. مٿس سنڌ هائڪورٽ جي فاضل ججن تي ٻڌل اعليٰ عدالتي ڪميشن ويهاري وڃي. جيڪا شفاف طريقي سان مٿين الزامن جي اڻ ڌري جانچ ڪرائي وڃي سنڌ يونيورسٽي جا استاد، ملازم ۽ شاگرد گهر ٿا ڪن تـ سنڌ يونيورسٽي ۾ HEC جي مقرر ڪيل معيار مطابق ڪو حاضر سروس وائيس چانسلر ڏنو وڃي جيڪو سنڌ يونيورسٽي کي وڌيڪ تباهي کان روڪي ان ۾ اڪيڊمڪ پيس قائم ڪرائي حقيقي طورتي تحقيقي ۽ تدرسي ماحول جي بحالي جو ڪم ڪري.​

​

سڀني علم دوست سنڌين کي گذارش آهي ته هن ٿريڊ کي غور سان پڙهن ۽ پنهنجا رايا دير سوير ضرور ڏين۔۔۔ (مست)
اوريجنل لنڪ​