تحرير: رياضت ٻرڙو الهه ڏتو گوپانگ، ڊاڪٽر:ڊاڪٽر الھ ڏتو گوپانگ ولد محمد مريد گوپانگ، اڪيلو پِي ايڇ ڊِي عالم آهي، جيڪو قنبر شهر سان تعلق رکي ٿو. هُو 8 جونِ 1945ع تي، گوپانگ محلي، قنبر ۾ پيدا ٿيو. هن ابتدائي ۽ ثانوي تعليم قنبر مان، گريجوئيشن (آنرز) 1967ع ۾ ۽ ماسٽرز 1968ع ۾ سنڌ يونيورسٽي ڄامشوري جي پلانٽ بريڊنگ شعبي مان پاس ڪئي. 1978ع ۾ هُن يونيسڪو طرفان اسڪالرشپ تي، ڪمپيوٽر سائنس ۾ ايم ايس سي رومانيا مان ڪئي، جتان 1981ع ۾، رومانيا-گورنمينٽ پاران اسڪالرشپ ملڻ سبب پِي ايڇ ڊِي جي اعليٰ تعليم، بخارسٽ يونيورسٽيءَ مان، حاصل ڪئي. سندس ٿيسز جو عنوان هو: “Co-relation studies in some morphological characters and early ness in Cotton.” ڊاڪٽر الھ ڏتو گوپانگ 1968ع ۾ سڪرنڊ ۾ ريسرچ اسسٽنٽ مقرر ٿيو، جنهن بعد هن 1968ع کان 1976ع تائين ڪاٽن سيشن ٽنڊي ڄام ۾ ڪم ڪيو. 1881ع ۾ هو ڪاٽن سيشن ۾ ريسرچ آفيسر ٿيو. ان کان پوءِ 31 جولاءِ 1982ع کان وٺي ”پاڪستان زرعي تحقيقي ڪائونسل“ (پارڪ/PARC) اسلام آباد ۾ ڊپٽي ڊائريڪٽر طور ڪم ڪرڻ شروع ڪيو، جتي 1994ع ۾ ڊائريڪٽر مقرر ٿيو. اتان ڊاڪٽر الھ ڏتي گوپانگ 8 جونِ 2005ع تي رٽائر ڪيو. ڊاڪٽر صاحب جا مختلف پاڪستاني ۽ بين الاقوامي تحقيقي رسالن ۾ 20 کن تحقيقي مقالا ڇپيل آهن. هُو سنڌي ادبي سنگت اسلام آباد شاخ ۽ سنڌ گريجوئيٽ ايسوسيئيشن اسلام آباد شاخ سان لاڳاپيل رهيو آهي. سندس مستقل رهائش اسلام آباد ۾ آهي.
قنمبر شهر جو پي ايڃ ڊي عالم کي اسان جو به سلام۔ عالم ۽ محقق ئي قومن جو سرمايو هوندا آهن، جيڪي قومن کي تعليمي انقلاب ڏيندا آهن۔
