وزن ڪيئن گهٽ ڪجي؟(اياز احمد سومرو) برٽش هارٽ فائونڊيشن مطابق جديد تحقيق مان اهو نتيجو ڪڍيو ويو آهي ته جن ماڻهن جو وزن گهڻو آهي جيڪڏهن انهن ۾ ٿوري ڪمي ڪئي وڃي ته پنهنجي صحت کي جيڪي مسئلا درپيش آهن انهن ۾ گهٽتائي ٿي سگهي ٿي، ايتريقدر جو مختلف بيمارين جي دوائن کان به ڇوٽڪارو حاصل ڪري سگهون ٿا، وزن تي ضابطو آڻي نه صرف جسماني صحت بهتر بڻائي سگهجي ٿي، پر چستي ۽ توانائي به وڌي ٿي ۽ اهڙي طرح طبيعت ۾ اعتماد پيدا ٿيندو آهي ۽ زندگي کي به وڌيڪ لطف اندزو ڪري سگهجي ٿي، هاڻي سوال اهوٿو اڀري ته وزن ڪيئن گهٽ ڪجي؟ ۽ ان جي شروعات ڪٿان ڪجي؟ جواب اهو آهي ته وزن گهٽائڻ لاءِ سنجيدگي سان ابتدا ڪئي وڃي ۽ غذا ۽ ورزش ٻنهي تي خاص وقت ڪڍي ڌيان ڏنو وڃي ۽ اهو ڪم ڪو خاص ڏکيو نه آهي ڪنهن انسان جي صحت لاءِ جتي غذا جو تعلق آهي ته ماني ، چانور، سايون ڀاڄيون ۽ ميوا گهڻا کائو، کير مان ٺهيل شيون، گوشت مڇي، سڻڀ ۽ کنڊ واريون شيون گهٽ کائو، هفتي جي پنج ڏينهن ۾جيڪڏهن اڌ اڌ ڪلاڪ روز ورزش ڪئي وڃي ته دل جي بيمارين جو به خطرو گهٽ ٿئي ٿو، اهڙي طرح ورزش ڪيو جو جسم ۾ گرمي پيدا ٿي وڃي، پگهر اچڻ شروع ٿئي ۽ ساهه جي رفتار ٿوري تيز ٿي وڃي، پر ايتري به تيز نه جو ڳالهائڻ مشڪل ٿي وڃي، بهتر اهو آهي ته غذا ۽ ورزش ٻئي گڏ شروع ڪيو احتياط سان، کائڻ ۾ سڻڀ گهٽ رکو، کائڻ ۾ جيڪي سڻڀيون شيون آهن جيئن ته گيهه، مکڻ، انهن شين جي جڳهه تي زيتون جو تيل، ڪنولا، تِرن جو تيل ۽ سورج مکي جو تيل استعمال ڪيو وڃي ته بهتر آهي. کير جي ڪريم کان پرهيز ڪريو. کائڻ ۾ جڙي ٻوٽيون استعمال ڪريو، پر کاڌي کي لذيذ ڪرڻ لاءِ ان ۾ لوڻ گهڻو نه وجهو، بس ذائقي مطابق ئي هجي، فروٽ ۽ ڀاڄين تي وڌ کان وڌ زور ڏيو ۽ گوشت گهٽ استعمال ڪريو، پر ٿي سگهي ته هفتي ۾ هڪ دفعو مڇي ضرور کائو، ڪرسپي بسڪيٽ ۽ ڪيڪ وغيره کان پاسو ڪريو، جيڪڏهن کائڻ تي دل چوي ته پوءِ اهڙيون شيون ڳوليو، جيڪي گهٽ سڻڀ ۾ تيار ڪيون ويون هجن، يا ته انهن کي گهر ۾ ئي تيار ڪرائي وٺو ته جيئن توهان کي يقين ٿي وڃي ته اهي سڀ شيون گهٽ سڻڀ رکن ٿيون ۽ هاڻي ٻڌايو ته جيڪي توهان کي ڳالهيون مٿي ٻڌايون ويون آهن انهن تي عمل ڪرڻ ڪٿي ڏکيو ته ناهي...؟؟ ۽ جيڪڏهن ڏکيو آهي ته ان ۾ گهٻرائڻ جي ڳالهه نه آهي. پنهنجي صحت کي ٺيڪ رکڻ لاءِ ۽ جسم کي صحيح مقدار ۾ رکڻ لاءِ ٿورو برداشت ته ڪرڻو پوندو، جيڪڏهن صحت بخش غذا ۽ ورزش کي پنهنجو معمول بڻايو ته ماهرن جو اهو خيال آهي ته توهان پنهنجو وزن گهٽائي پنهنجي صحت کي قائم رکي سگهو ٿا.
يار واهه واهه ۔۔۔۔۔ ان ئي مرض ته منجهايو آهي، هاڻي وزن وڃي پيو وڌندو ورزش ٿئي ڪانه، ماڻي ۽ خوراڪ ۾ ڪمي ٿئي ڪانه ۔۔۔۔۔۔ ڪو ٻيو سولو حل ٻڌايو ادا۔۔۔
ساڳي ڪار اسان سان به آهي اهڙا نسخه اسان کان ٿيندا ڪون باقي ٻيو ڪو سولو طريقو هجي ته عنايت ڪندا ، لک ٿورا قيمتي ونڊ جا
