غزل
سعيد ميمڻ
سعيد ميمڻ
********
هاڻي نه هي گلن جي، چادر رکي وڃو،
ٽي چار بس قبر تي، پٿر رکي وڃو.
هر روز هينئن جهڙالو، هوندو نه آ صبح،
جلدي نه هَٿُ ڇڏائي، گهاگهر رکي وڃو.
نيڻن اڳيان وڇوڙو، واريءَ تي آ وِڇيل،
ميلاپ جا اکين ۾، منظر رکي وڃو.
اڄ دل لکڻ گهري ٿي، مَنَ جي سڄي ڪَٿا،
هڪ رازدان پين ۽ ، ڪاڳر رکي وڃو.
هر هر گهرن ٿا خرچي، مان تنگ ٿي ٿيان،
ٻارن جي لاءِ سائين، ڪجهه گهر رکي وڃو.
حيلا ڪيا حياتيءَ ، تبديل ڪجهه نه ٿيو،
اڄ حالتون هٿن ۾ ، خنجر رکي وڃو.
