اڄوڪو ڏينهن 2 جنوري تاريخ جي دري مان

اڄوڪي ڏينهن 2 جنوري تي جنم وٺندڙ ۽ وڇڙندڙ مشهور شخصيتون

جنم ڏينهن:

2 جنوري 1885ع ليکڪ ۽ تعليمدان هيرانند ڪرم چند هنگوراڻي جي پيدائش جو ڏينهن آهي.
2 جنوري 1888ع رئيس المهاجرين جو لقب ماڻيندڙ رئيس جان محمد جوڻيجو جو جنم ڏينهن آهي.​

2 جنوري 1902ع ليکڪ ۽ تعليمدان عبد الحسين شاهه موسوي جو جنم ڏينهن آهي.
2 جنوري 1912ع عالم ۽ اديب پير غلام رسول سرهندي جي پيدائش جو ڏينهن آهي.

2 جنوري 1925ع سياستدان بيگم اشرف عباسي جو جنم ڏينهن آهي.​

2 جنوري 1937ع شاعر آثم ناٿن شاهي جو جنم ڏينهن آهي.
2 جنوري 1937ع شاعر سروپچند شاد جو جنم ڏينهن آهي.
2 جنوري 1948ع سماجي اڳواڻ ۽ اديب پروفيسر اعجاز قريشي جو جنم ڏينهن آهي.
2 جنوري 1958ع قومپرست اڳواڻ قمر ڀٽي جو جنم ڏينهن آهي.

وڇوڙو:

2 جنوري 1934ع سماج سڌارڪ ڀائي مولچند عاج وارو ديهانت ڪري ويو.
2 جنوري 1969ع جسٽس الاهي بخش خميساڻي جي وفات ٿي.
2 جنوري 1977ع سگهڙ ٻيڙو فقير ڪنڀر جي وفات ٿي.
2 جنوري 1990ع اسڪالر، اديب ۽ محقق ڊاڪٽر عبدالڪريم سنديلو لاڏاڻو ڪري ويو.
2 جنوري 1990ع مشهور براڊڪاسٽر سرور بلوچ جي وفات ٿي.
2 جنوري 2011ع موسيقار ۽ راڳي استاد طفر علي خان وفات ڪري ويو.

حواله:

ڊاڪٽر در محمد پٺاڻ
روزانه ڪاوش
انسائيڪلوپيڊيا سنڌيانا
وڪيپيڊيا
سنڌ سلامت ڊاٽ ڪام
​

 

آثم ناٿن شاهي: غلام رسول سولنگيءَ جو ادبي نالو -آثم ناٿن شاهي- هو. هن 2 جنوري 1937ع تي ڳوٺ کاٿڙي تعلقي خيرپور ناٿن شاهه ضلعي دادوءَ ۾ -الله- بخش سولنگيءَ جي گهر ۾ جنم ورتو هو. سندس شمار ناليوارن شاعرن ۾ ٿئي ٿو. -آثم ناٿن شاهي- پنج درجا سنڌي پڙهڻ کان پوءِ عربي ۽ فارسي -تعليم- پنهنجي ناني مولوي فيض محمد ”پريشان“ ۽ لاڙڪاڻي ضلعي جي ڳوٺ الهرکيي جلباڻيءَ جي مدرسي ۾ حاصل ڪئي. پيشي جي لحاظ کان پاڻ ڪڏهن مزدوري، ڪڏهن کيتي ته ڪڏهن خانگي ملازمت ڪري گذر سفر ڪندو رهيو. کيس ننڍپڻ کان ئي شعر و شاعريءَ سان لڳاءُ رهيو. 1962ع کان پوءِ نالي واري شاعر ”محسن“ ڪڪڙائيءَ جي -اصلاح- هيٺ شعر چوڻ لڳو. ”بزم طالب الموليٰ“ شاخ خيرپور ناٿن شاهه سان وابسته ٿي علمي، ادبي سرگرمين ۾ حصو وٺڻ لڳو. 1963ع ۾ ”محسن ڪڪڙائي“ سان گڏجي ”اداره فلاح و بهبود خيرپور ناٿن شاهه“ قائم ڪيائين ۽ هڪ لئبرري به کوليائين. سندس شاعري جا ٽي مجموعا ”جڏهن اُلا اُڀ ۾“ (1994ع) ۽ ”لهرون لهرون لاٽ“ (1998ع ۾ مارئي اڪيڊمي سڪرنڊ) ۽ ”ڇا چيس آئيني؟“ (رم جهم پبليڪيشن دادو طرفان) شايع ٿيا آهن. کيس ادبي خدمتن جي مڃتا طور ”ڪينجهر ادبي بورڊ“ (1994ع) ۽ سنڌي ادبي سنگت طرفان سندس ڪتاب تي نقد -انعام- مليا . سندس وفات 6 -آڪٽوبر- 2006ع تي ٿي.

انسائيڪلوپيڊيا سنڌيانا تان ورتل

 

ڀائي مولچند عاج وارو:

مشهور سماج سڌارڪ ڀائي مولچند جو جنم حيدرآباد ۾، 1850 جي ويساک مهيني جي 12 تاريخ تي مينگهراج ڪرپالاڻيءَ جي گهر ۾ ٿيو. ماءُ پيءُ جو سڪيلڌو پٽ هو. ننڍي هوندي سنڌي ۽ گرمکي اکر سکيو. سندس مائٽ وڏي پئسي وارا هئا ۽ سندن وڏو ڪاروبار هو. مولچند به شروع ۾ جنڊيءَ جو سامان خريد ڪري، سنڌ مان بمبئيءَ موڪليندو هو. پوءِ عاج جو ڌنڌو ڪيائين. ڌنڌي دوران غريبن جي ڪافي پرگهور لهندو هو. اسپتالن ۾ داخل مريضن لاءِ گاڏيءَ ۽ دوائن جو خاص بندوبست ڪندو هو. مسڪين ماڻهن جي گهر اناج پهچائيندو هو. سال 1897ع ۾ پليگ جي وڏي بيماري پکڙي ته ان وقت هن درويش پنهنجي جان جوکي ۾ وجهي، مريضن جي خدمت ڪئي ۽ مريضن کي هزارين رپيا کاڌي پيتي لاءِ وڃي ڏيندو هو. ان وقت هزار رپيا اڄ جي لک رپين کان مٿي هئا. هنن نيڪ ڪمن ۾ ڏيارام گدومل، ڀائي مولچند جو ساٿي هو. هيءُ نيڪ ٻانهو، 2 جنوري 1934ع تي لاڏاڻو ڪري ويو.