انٽرنيٽ ريگيوليٽري باڊي پاران غير لاطيني رسم الخط ۾ به ويب ايڊريسون ٺاهڻ جي منظوري ڏيڻ جو فيصلو ڪري ورتو آهي جنهن ذريعي آن لائين جي دنيا ۾ هڪ وڏو انقلاب اچي سگهي ٿو. سيول جي سالياني ميٽنگ ۾ ”انٽرنيٽ ڪارپوريشن فار اسائينڊ نيم ۽ اين نمبر “ (ايڪان) عربي، چيني ۽ ڪجهه ٻين زبانن ۾ به ڊومين نالا استعمال ڪرڻ جي اجازت ڏئي ڇڏي آهي. چاليهه سال اڳ جڏهن انٽرنيٽ شروع ٿي هئي تڏهن کان ويب ايڊريس کي صرف لاطيني ٻولي ۾ لکيو ويندو هيو. پر چئن ڏهاڪن کان پوءِ هي پهريون دفعو آهي جو غير لاطيني ٻولين ۾ ويب ڊومين لکڻ جي اجازت ملي آهي. ياد رهي ته دنيا ۾ هن وقت ڏيڍ ارب اهڙا ماڻهو آهن جيڪي انٽرنيٽ استعمال ڪري رهيا آهن، پر ان جي اڌ انگ کان به وڌيڪ ماڻهو غير لاطيني زبانون استعمال ڪن ٿا. ايڪان جي صدر روڊبيڪ سٽرام ان اهم تبديلي جو اعلان ڪندي چيو آهي ته هن وقت انٽرنيٽ استعمال ڪندڙ ماڻهن جو هڪ نئون اڌ ان تبديلي مان فائدو حاصل ڪندو ۽ مستقبل ۾ به انٽرنيٽ ڦهلائڻ ۾ اهم ڪردار ادا ڪندو. ايڪان اداري جو چوڻ آهي ته دنيا ۾ جديد ٽيڪنالاجي سبب هي نئين تبديلي آندي وئي آهي ۽ هن منصوبي کي 2008 دورا ن ئي منظوري ملي چڪي آهي پر ان حوالي کان ٻن سالن تائين مختلف تجربا ڪيا ويا. هن منصوبي جي تحت هاڻي ڊومين نيم سسٽم ۾ تبديلي ڪئي ويندي ته جيئن اهو غير لاطيني اسڪرپٽ جي شناخت ڪري ان کي پڙهي سگهي. ايڪان جو اهو به چوڻ آهي ته انٽرنيشنل ڊومين نالي لاءِ مختلف زبانن جي منظوري کان 16 نومبر کان درخواستون وصول ڪرڻ شروع ڪندو ۽ ايندڙ سال جي وچ واري عرصي تائين پهريو ڊومين سامهون ايندو. اهو امڪان پڻ ڏيکاريو ويو آهي ته جيڪي زبانون سڀ کان پهرين ڊومين تي اچي سگهن ٿيون انهن ۾ عربي چيني ۽ روسي ٻوليون شامل آهن ۽ ان کان پوءِ ٻين ٻولين تي به غور ويچار ڪيو ويندو.
