ڇا انسان عظيم آهي ... ؟

[نثارابڙو]

ڇا انسان عظيم آهي ... ؟

انسان جي عظمت جو شاهد ته پاڻ قرآن الفرقان آهي جو کيس فرشتن کان سجدو ڪرايو ويو ۽ سندس علم ۽ عظمت جو ثبوت ڏنو ويو هو پر هي هيٺ ڏنل قصو به پڙهڻ جي لائق آهي؛

ذوالحج جي 8 تاريخ سعودي ملڪ جي جده شهر ۾ تمام زوردار مينهن وسيو هو جنهن سبب شهر جي ويجهو هڪ ڍنڍ جو بند ڀڳو بس پوءِ ته ان پاڻيءَ جده شهر ۾ قهرام مچائي ڇڏيو هزارين گاڏيون ۽ ڪروڙين ملڪيتون تباه ٿيون، سوين جانيون پاڻيءَ جي بي رحم وهڪري ۾ وهي ويون ۽ اڃان تائين لاشن جي ملڻ جون خبرون هلن پيون ...

ان ٻوڏ دوران ڪي اهڙا واقعا پيش آيا جي انسان جي انسانيت تي فخر ڪرڻ جهڙا آهن، شايد انهن ئي سببن ڪري انسان اشرف المخلوقات آهي ۽ فرشتن کان ڪئي ڀيرا اتم ۽ اعلا درجي تي فائز آهي ... بلڪه هن ڌرتي تي الله جي خليفي جا فرائض سرانجام ڏئي رهيو آهي ۽ هزارين ڪروڙين ملائڪ سندس خذمت ۾ حاضر ڪيل آهن ...

ساڳي وقت ڪجهه ماڻهون اسفل سافلين ۽ شيطان سان دوستيءَ واري صفت ڏيکاريندي ٻڏندڙ ماڻهن جا سامان چوريون ڪندا رهيا ۽ لاشن جي کيسن مان پئسا ۽ مال ميڙيندا رهيا ۽ پنهنجي ڪريل حرڪتن سان انسان کي فرشتن آڏو شرمائيندا رهيا ...

ان ٻوڏ دوران هڪ پاڪستاني نوجوان، انساني فرض کي نڀائيندي سورنهن يا سترهن انسانن کي ٻڏڻ کان بچائڻ کانپوءِ ان ئي ڪم ڪندي پاڻيءَ جي بي رحم لهرن آڏو بي بس ٿي خالق حقيقيءَ سان وڃي مليو، جت اميد آهي ته ملائڪ سندس مٿان گلن ۽ رحمتن جي ورکا ڪندا هوندا .... ۽ هت بادشاه سلامت پڻ سندس ڪيل خدمت جو انعام ڏيڻ تي غور ۽ فڪر ڪري رهيو آهي ... ڇاڪاڻ ته بهادري ۽ سورهيائي جي ان مثال جو اجر ڇا آهي انجو شايد ڪاٿو ڪري رهيو آهي ...

الله ۾ اميد آهي ته سندس ٻئي جهان سرخرو ٿيندا ...

هڪ ٻيو واقعو جو اڄ جي اخبار ۾ آهي سو پڻ انسان جي اشرف المخلوقات هجڻ جي ٺوس شاهدي ڏئي رهيو آهي ۽ هن نفسانفسيءَ واري حالت ۾ ان بيت جي مصداق جيئان ته؛

اڃان رڃ مان رڙ اچي ٿي اچي ٿي ، متان ايئن سمجهين مئا مور سارا ....

قصو ڪجهه هيئن آهي؛

ٻوڏ واري ڏينهن تي هڪ 60 ساله عورت نالي فاطمه پنهنجي ضعيف مڙس سميت ويٺي هئي ته اوچتو ئي اوچتو سندس گهر ۾ ٻوڏ جو پاڻي ڀرجڻ لڳو، پنهنجي ۽ پنهنجي مڙس جي جان بچائڻ خاطر هن پنهنجا قيمتي زيور، ڪجه پئسا ۽ جائداد جا ڪاغذ پٽ هڪ پيتيءَ ۾ وجهي کنيا ۽ مڙس کي هڪ هٿ جي آسري سان جهلي گهر مان نڪتي، پر گهٽيءَ جو پاڻي ايترو ته زور سان هيو جو هو ٻنهي کي گهلڻ لڳو ۽ خاص ڪري فاطمه جو مڙس صعيف هجڻ سبب پاڻيءَ جي مقابلي جي سگهه نه هجڻ ڪري پاڻيءَ ۾ گهلبو ٿي ويو ... فاطمه سوچيو ته جي آءُ کيس ٻنهي هٿن سان نه پڪڙيندس ته هو پاڻيءَ ۾ هليو ويندو سو هن اها قيمتي پيتي پاڻيءَ ۾ اڇلائي پنهنجي مڙس کي ٻنهي هٿن سان پڪڙي ورتو ۽ آهستي آهستي کيس محفوظ هنڌ ڏانهن وٺي آئي پر سندس اکين آڏو اها قيمتي پيتي ڏسندي ڏسندي ئي پاڻيءَ ۾ لڙهندي غائب ٿي وئي ...

فاطمه چيو الحمد الله پيتي وئي ته وڃي مون پنهنجي مڙس کي ته بچائي ورتو ... هاڻ هوءَ ۽ سندس مڙس پنهنجي سڀ موڙي وڃائي ويٺا ... جيتوڻيڪ کين موڙيءَ جو وڃڻ جو ڏک هو جو اها عمر ئي اهڙي آهي پر هو الله جا شڪر ادا ڪري رهيا هئا ته رب العالمين جان بخشي ...

ايئن ڪندي ڪي ڏهه ٻارنهن ڏينهن گذري ويا ... ڪالهه کين هڪ اجنبي فون آيو ۽ کين ان ماڻهونءَ ٻڌايو ته سندن اها قمتي پيتي هن وٽ آهي ۽ کيس پتو ٻڌايو وڃي ته اها پيتي پهتي ڪري ... فاطمه جي خوشيءَ جي ڪا حد ئي نه رهي ... اهو ماڻهون آيو جنهن اها پيتي کين حوالي ڪندي چيو ته وڏي مشڪل سان هن کين ڳولهي لڌو آهي جو هو پورا ڏهه ڏينهن کين ڳولهيندو رهيو هو ... اڄ هن اها پيتي کولي ڏٺي ته ان ۾ قيمتي زيور ۽ پئسن سان گڏ هڪ بئنڪ جو ڪاغذ هو جنهن ۾ ان عورت جو نالو لکيل هو بئنڪ وارن سان رابطو ڪيائين ته وڏي مشڪل سان بئنڪ آفيسر کيس ان عورت جو پتو ڏنو ۽ هن الله جو شڪر ادا ڪيو ۽ امانت مالڪن تائين پهتي ...

فاطمه کيس انعام ۾ ڪجهه پئسا ڏيڻ جي درخواست ڪئي ته اهو چئي واپس ڪيائين ته ڇا هو اهي پئسا وٺي الله جي اجر کان محروم ٿي وڃي ...

سبحان الله ؛ اهي آهن مومن جنکي الله جي اجر جي گهرج آهي نه مال ۽ ملڪيت جي نه دنياوي حرام جي ....

قرآن الفرقان جا هي لفظ جي سورت النور ۾ بيان ٿيل آهن سي ياد پيا اچن؛

الله جو نور انهن کي ملندو جي لين دين جي وقت الله جي ذڪر کان غافل نه ٿا ٿين ...

نوٽ: ان پيتيءَ ۾ جي قيمتي زيور ۽ پئسا هئا انهن جي قيمت پاڪستاني روپيا هڪ ڪروڙ ڏهن لکن کان به مٿي جي هئي ....​

 

[مست]

سائين بلڪل انسانيت جا اهي مثال ملڻ ڏکيا آهن۔۔۔ بهترين ونڊ ڪيا آهن توهان۔۔۔۔۔ جيڪڏهن انسان پنهنجي انسانيت جي صفت کي مٿي رکي ته اشرف المخلوقات ٿي وڃي ٿو نه ٿه جانورن کان به بدتر ۔۔۔۔
توهان واري ڳالهه وانگر ته ماڻهو لاشن جي کيسن مان پئسا ڪڍي ويا۔۔ اهڙو ئي مثال تازو ملتان جي مون مارڪيٽ ۾ ٿيو جتي ڪيترين ئي عورتن جي لاشن کي جڏهن وارثن حوالي ڪيو ويو ته انهن ته هڪ ذرو به ڪپڙي جو نه هو، رب ڄاڻي اسپتال وارن يا وري ٻئي ڪنهن انهن لاشن تان ڪپڙا قيمتي سمجهي، لاهي انسانيت کي شرمندو ڪري ڇڏيو۔۔۔

 

[نثارناز]

پيارا نثار ابڙا ۽ سائين اسد ڄامشورائي صاحب۔۔۔۔ هي پوسٽ پڙهي اکين مان بي اختيار ڳوڙها وهي نڪتا آهن۔۔۔۔ ڪٿي انسان فرشتن کان ڀلا ته وري ڪٿي انسان شيطان کي به شرمائي وجهن۔۔۔۔۔۔۔۔۔۔ اکين مان ڳوڙها وهائيندي پاڻ کي ڳولي رهيو آهيان ته مان اڀاڳو۔۔۔۔۔۔۔۔ خبر ناهي ڪهڙي جڳه تي موجود آهيان۔۔۔ شال الله سائين اسان گهنگارن جون ڍڪيون ڍڪي، ۽ اسان کي پنهنجي ٻاجهه سان سڌي رستي تي هلڻ جي توفيق عطا فرمائي (آمين)

 

[عبدالغني لوهار]

السلام عليڪم ادا نثار احمد واقعي اھڙا انسان موجود آهن جن جي ڪري دنيا هلي ٿي پئي

 

[نثارناز]

السلام عليڪم ادا نثار احمد واقعي اھڙا انسان موجود آهن جن جي ڪري دنيا هلي ٿي پئي

ها ها بلڪل ادا جيئن اسان جي سنڌ سلامت جي محبتي اڱڻ جو دوست عظيم انسان ”عظيم“ آهي۔۔۔۔ پري ڇو ٿو ڳولين جاني ۔۔۔۔۔۔۔۔۔۔۔

 

[ڦلپوٽو فقير]

السلام عليڪم ادا نثار احمد واقعي اھڙا انسان موجود آهن جن جي ڪري دنيا هلي ٿي پئي

بيشڪ سائين نثار ابڙا صاحب ڪجهه ماڻهن جي ڪري ئي هي دنيا قائم ۽ دائم آهي


تمام بهترين ونڊ آهي سائين

lajwab-sharinglajwab-sharinglajwab-sharing

shal judy hujeen


sindhsalamatsaathsal

 

[رحيم بخش]

سائين بيشڪ سائين نثار جن جي ان ايمان افروز مضمون جي حقيقت ۽ ان تي وري سائين جن جي طرز بياني جي زرگريء مضمون کي اهڙو اجاگر ڪيو آهي جو حقيقت ۾ اکين ۾ لڙڪ اچي ويا ته ڪاش سڀ انسان پنهنجي اصلي فضيلت واري حقيقت کي سمجهن ته حضرت انسان کي جيڪا فضيلت مليل آهي اها انهن سهڻن گڻن جي ڪري آهي جيڪڏهن هر انسان پنهنجي اصل وجود تي نظر ڪري جنهن ڪري ڪريم رب اشرف المخلوقات جو تاج ان جي مٿي تي رکيو ته هوند هيء دنيا امن جو گهوارو بنجي وڃي ۽ پر شيطان انسان تي اڪثر حاوي رهندو آهي اهڙا ڪي ماڻهو هزارن ۾ لڀندا جن پنهنجي شرف واري تاج کي برقرار رکڻ لاء مڪمل انسان ٿي ڏيکاريو ورنه اسان خود اهڙا مضمون پڙهي في الحال ته دل ۾ رقت طاري ٿيندي آهي ليڪن ڪجهه دير بعد شيطاني وسوسن جي ور چڙهي ويندا آهيون پنج آڱريون برابر نه آهن ليڪن اڪثريت ۾ اهي گڻ نه آهن الله تعالى کان دعا آهي ته جهڙو تاثر مضمون پڙهڻ سان في الفور وجود ۾ آيو ان تي قائم ۽ دائم رکي ۽ حقيقي انسان بنجڻ جي سعادت نصيب ڪري۔

 

[عظيم]

سائين نثار ابڙو نهايت ئي عجيب واقعو آهي دنيا ۾ اهڙا انسان آهن
واقعا انسان جو مقام مٿي آهي اشرف المخلوقات آهي خداوند ڪريم جي نعمتن سان مالامال آهي پر ناشڪري ڪفران نعمت ۔۔۔۔۔۔۔۔۔۔۔۔۔۔۔۔۔۔۔
دنيا ۾ ڪجھ اهڙا انسان آهن جنهن جا واقعا ڪڏهن پڙهڻ وٽان ملندا آهن بحرحال بهترين ونڊ آهي

ها ها بلڪل ادا جيئن اسان جي سنڌ سلامت جي محبتي اڱڻ جو دوست عظيم انسان ”عظيم“ آهي۔۔۔۔ پري ڇو ٿو ڳولين جاني ۔۔۔۔۔۔۔۔۔۔۔

سائين نثار غريبن تي ٺٺولون نه ڪيون اسان عظيم ڪئين آهيون
مونکي ۽ فقير کي جيڪڏهن اها پيتي ملي ها ته پوءِ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔hall charihall chari

 

[نثارابڙو]

دوستو! اهو ليک لکڻ وقت يا پڙهڻ وقت، منهنجي دل ۽ دماغ تي پڻ سر سارنگ هو، اکڙين ۾ پڻ ڪڪرن جي قطار هئي، انهن ڪڪرن جي وسڪاري کي بجاءِ ڳلن تي وهائڻ جي کين سنڌو درياه جيئان، دل جي سمنڊ ۾ ڇوڙ ڪرائيندو رهيس ... انسان جي عظمت کي سلام ڪندو رهيس،

محترمه فاطمه جي پنهنجي مڙس سان وفا تي ... محترم غامديءَ جي ايمانداري ۽ الله شناسيءَ تي سوچيندو رهيس .... ۽ اوهان جيئان انسانيت جي عظمت لئه الله جي بارگاهه ۾ دعائون گهرندو رهيس ...

sindhsalamatsaathsal

 

[وحيد سمون]

تمام ڏکوئيندڙ تحرير آهي ۔ ڇا عظيم انسان آهي ۔