ڳالهايو گهٽ، ٻڌو گهڻو گفتگو ڪرڻ هڪ وڏو فن آهي ڪيترن ئي ماڻهن کي پنهنجي صلاحيت تي ڏاڍو ناز هوندو آهي جڏهن اهي ڳالهائيندا آهن ته هڪ زمانو خاموشي سان کين ٻڌندو آهي. ٻيو ته انهن جي ٻڌندڙن جو دائرو وسيع آهي پر شايد هي هن ڳالهه طرف توجهه نه ٿا ڏين ته ماڻهو جنهن قدر جلد انهن جي حلقي ۾ شامل ٿين ٿا.. ايترو ئي جلدي انهن کان پري به ٿيو وڃن. اهڙن ماڻهن ۾ عورتون يقينن اڳيان اڳيان نظر اينديون. جيڪي گهٽ ٻڌڻ ۽ گهڻو ڳالهائڻ جي معاملي ۾ عالمي شهرت رکن ٿيون. سڀني کي خبر آهي ته اها منفي قسم جي شهرت آهي پر جن عورتن کي ڳالهائڻ جو چسڪو لڳي وڃي اهي هن ڳالهه جي پرواهه ڪٿي ٿيون ڪن ته ماڻهو هنن جي باري ۾ ڇا ٿا ڳالهائيندا وتن. سٺي ۽ معلوماتي گفتگو اها آهي جنهن ۾ ٻه يا ٻن کان وڌيڪ ڌريون هڪ ٻئي جي ڳالهه ٻڌن ۽ سمجهن. عقل وارا ۽ سياڻا ماڻهو ڳالهائيندا گهٽ ۽ ٻڌندا گهڻو آهن. اهي ٻين کي ڳالهائڻ جو وڌيڪ موقعو ڏيندا آهن جيئن کين سمجهي سگهجي. اوهان به جيڪڏهن اهڙي روش اختيار ڪريو ته وڌ کان وڌ ماڻهن کي دوست بڻائي سگهو ٿيون.
گفتگو ڪرڻ جو سليقو به هڪ وڏو فن آهي، ايئن ناهي ته جيڪي ماڻهو سڀني کان وڌيڪ گهڻ ڳالهائو هوندا آهن، اهي ئي سڀني کان وڌيڪ سٺي گفتگو ڪرڻ وارا هوندا آهن. ٻين جي ڳالهه کي صبر ۽ تحمل سان ٻڌڻ به ايترو ئي مشڪل آهي، جيترو اعليٰ گفتگو ڪرڻ.
