ممتاز قريشي
سينيئر رڪن
اسان مان ڪيترائي دوست پنهنجن ڪنن کي صاف ڪرڻ لا مختلف ڪاٽن بڊز، وارن ۾ استعمال ٿيندڙ ڪانٽا، ڪاٺي يا تيلي وغيره جو استعمال ڪندا آهن ڪي ته رڳو ٽائيم پاس ڪرڻ لا ، ڪي وري ڪن ۾ خارش جي ڪري به اهي شيون استعمال ڪرڻ کان ڪو نه ڪيٻائين۔
توهان سڀني سڄڻن کي ڄاڻڻ گهرجي ته اسان جي ڪن ۾ الله پاڪ ڪجهه اهڙا غدود رکيا آهن جيڪي هڪ قسم جي رطوبت خارج ڪندا آهن جنهن کي ويڪس (wax) جي نالي سان سڏجي ٿو۔ اها ويڪس بيڪٽيريا ۽ مختلف قسم جي جراثيمن کي ڪن ۾ واڌ ڪرڻ کان روڪيندي آهي۔ ان کان علاوه ڪن ۾ مٽي ۽ ڪا ٻاهرين شي وڃڻ کان به بچائيندي آهي۔
اها ويڪس ڪڏهن ڪڏهن تمام گهڻي ٺهي ويندي آهي جنهن کي ڪڍڻ جي ضرورت به پئجيو وڃي پر ان لا ٻيا محفوظ طريقا استعمال ڪرڻ گهرجن۔
مثال طور: سرنجنگ ۽ سڪشننگ (syringing and suction)
هن طريقي سان ڪن جي صفائي ڪرڻ لا انجيڪشن جي ذريعي پاڻياٺ ڪن ۾ وجهي ان کي نلڪي ۽ مشين ذريعي ڇِڪيو ويندو آهي جيڪو هڪ بهتر ۽ محفوظ طريقو آهي۔
ڪن ۾ غير ضروري ڪا به شي وجهڻ کان پرهيز ڪرڻ گهرجي۔ خاص طور تي نوڪدار شيون ۽ ڪاٽن واريون تيليون وغيره۔
ڪن ۾ ٻُڌڻ جو عمل:
مختلف قسم جا آواز لهرن جي شڪل ۾ اسان جي ڪن ۾ ٺهيل هڪ حساس ۽ نازڪ پردي ۾ لرزش پيدا ڪندا آهن۔ ان لرزش سان مختلف سگنلز پيدا ٿين ٿا جيڪي اتي موجود خاص قسم جا نيورانز ڪرنٽ جيان اسان جي دماغ ۾ موجود ٻولي ۽ ياداشت جي مرڪز تي پهچائين ٿا۔ اهڙي طريقي سان اسان آواز ۽ ان جو مفهوم سمجهي سگهندا آهيون۔
ٻُڌڻ جي عمل لا ڪن جي پردي جو موجود هجڻ ۽ درست انداز ۾ ڪم ڪرڻ بيحد ضروري آهي۔ ان نازڪ پردي کي ايئر ڊرم (eardrum) چوندا آهن۔ ياد رهي ته ڪن ۾ ڪا به ٻاهرين سخت شي ان کي آساني سان زخم رسائي سگهي ٿي۔
ڪن ۾ بار بار صفائي ڪرڻ سان انفيڪشن ٿيڻ جو خطرو به وڌي ويندو آهي۔ ان کان علاوه ڪن جو نازڪ پردو ڦاٽي پوڻ سان اسان ٻُڌڻ جي صلاحيت کان به محروم ٿي سگهون ٿا۔۔!!
انڪري هوشيار، خبردار۔۔ڪن ۾ ڪجهه به نه وجهندا ڪريو۔۔احتياط علاج کان بهتر آهي۔۔
صحت بابت ڄاڻ پاڻ به حاصل ڪريو ۽ ٻين تائين به پهچايو
