اي چنڊ ڀٽائي کي چئجان!

[ايس ايم درس]

اي چنڊ ڀٽائي کي چئجان!​

ــــــــــ​

اي چنڊ ڀٽائي کي چئجان!​

جنھن رات ۾ تو ٿي بيت چيا​

سا رات اڃان ڀي جاري آ​

۽ سج ڏنگايون ڪو نه ڇڏيون​

ھي پنڌ پري جو واري آ​

مان ڪنھن سان پنھنجا سور سليان​

اي چنڊ ڀٽائي کي چئجان!​

ــــــــــ​

اي چنڊ ڀٽائي کي چئجان!​

اڄ رات رنو آ رت ڦڙو​

۽ تارا سور پيئن ٿا پيا​

ھوءَ سانجھي سڏڪي روئي ٿي​

۽ سوري گيت چڙھن ٿا پيا​

توکي نه چوان ٻيو ڪنھن کي چوان​

اي چنڊ ڀٽائي کي چئجان!​

ــــــــــ​

اي چنڊ ڀٽائي کي چئجان!​

مون تنھنجي راڳن جي سرن ۾​

جان سنھڙي سينڍ وڄائي آ​

ھر ماڻھوءَ ڀينڊ ھنئي آھي​

ھر گھر گھٽي ڄڻ ڦاھي آھي​

ات ڪرڻن جي ڪا ڪوڪ ڪجان​

اي چنڊ ڀٽائي کي چئجان!​

ــــــــــ​

اي چنڊ ڀٽائي کي چئجان!​

مون تنھنجي ڏات ڏيا مان اڄ​

جان ھڪڙو چڪڙو چاھ چکيو​

ھر ماڻھوءَ کي مون ڀاءُ ڪيو​

ٿي تنھنجون وايون آءُ وڙھان​

اي چنڊ ڀٽائي کي چئجان!​

ــــــــــ​

اي چنڊ ڀٽائي کي چئجان!​

ھي ماڻھو تنھنجي بيتن کي​

ڌرتي کان ڌار ڇني ٿا ڪن​

ٿيون وايون تنھنجيون وار پٽن​

۽ سرڙا تنھنجا اوسارن​

ھي ارھي سرھي دانھن ڏجان!​

اي چنڊ ڀٽائي کي چئجان!​

ــــــــــ​

اي چنڊ ڀٽائي کي چئجان!​

ڪنھن انڌوڪار انڌا ڪيا ھن​

ٿا ماڻھو توکي شاھ چون​

۽ تنھنجي راڳ رسالي کي​

ٿا آيتون سمجھي ڪنڌ ھڻن​

تون ڪيڏو ڏور ھليو ويو آن​

اي چنڊ ڀٽائي کي چئجان!​

اي چنڊ ڀٽائي کي چئجان!​

ــــــــــ​

(شاعر: انور پيرزادو )​

جي ڪتاب اي چنڊ ڀٽائي کي چئجان جي پيج نمبر: 39 ۽ 40 مان کنيو ويو آھي​

​

​

​

​

 

[باغي عليم]

سائين انور جو هي نظم منهنجيون ڪيفيتون تبديل ڪري ڇڏيندو آهي
مون پنهنجي دوست حق نواز ارباب سان گڏ هي نظم ڀٽ شاهه ۾ استاد حنيف لاشاري جي زبانان
ٻڌو ته،پڙِهيل پهريان هو پر گائيڪي جي صورت ۾ پهريون دفعو ٻڌو ۽ واقعي سائين انور ڪيفيتون تبديل ڪندڙ شاعر هو۔۔