شاه جو هي بيت آءُ نالي ڪريانٿو سمورن سنڌين جي؛ مرشد لطيف جون صلاحون ۽ هدايتون ائين آهن جيئن لوه لاءِ پارس، اسانجا سنڌي جيڪڏهن مرشد لطيف جي صلاحن تي هلي پون ته هوند ٻنهي جهانن جي زندگي سڦل ٿي پوي ... سـون ساريڪا هٿــڙا، ڪوهُ نه ڪتيـن رڏِ، ويهي ڪنڊ، ڪاپوڪر، گھتون گهويون ڇڏ، تـه صـــرافاڻي ســڏِ، مرڪيـو هــوند مٽائين. سر ڪاپائتي اي هوڏ ۽ اجائي آڪڙ سان ڀريل ڇوڪري! تنهنجا هٿ ته سون جهڙا آهن، جيڪڏهن تون هڪ پاسي تي ويهي ڌيان سان پنهنجي مقصد کي حاصل ڪرڻ جا جتن ڪرين ۽ هي ازرخواهيون ۽ چنڊايون ڇڏي ڪم ڪرين ته هوند اهڙي شئي حاصل ڪري وٺين جيڪا وٺڻ وارن ۽ اگهائڻ وارن جي آڏو توکي سرخرو ڪري ڇڏيندي ۽ تنهنجو سر بلند ٿي ويندو جنهن سان تنهنجون خوشيون موٽي اينديون.
