سنڌين کي پاڪستان ۾ شامل رکڻ لاءِ ماحول بهتر بڻايو وڃي: آمريڪي ڪانگريس ميمبر

سنڌين کي پاڪستان ۾ شامل رکڻ لاءِ ماحول بهتر بڻايو وڃي : آمريڪي ڪانگريس ميمبر​

واشنگٽن (ع آ نيوز) : پاڪستان ۾ انساني حقن جي خراب صورتحال ۽ سنڌ ۽ سنڌين سان ٿيندڙ زيادتين جو معاملو آمريڪي ڪانگريس ۾ پهچي ويو آهي. ڪانگريس ميمبر براڊ شرمين آمريڪي دوري دوران وزيراعظم نواز شريف کي خط لکي مذهبي انتهاپسندي روڪڻ، جبري گم شدگيون روڪڻ،سنڌي هندو ڇوڪريون اغوا ڪري جبري مذهب مٽائي شادي ڪرڻ جي روڪٿام جو مطالبو ڪندي چيو آهي ته سنڌين کي خوف آهي ته رياستي ڏاڍ ۽ سماجي اڻ برابرين جي ڪري سندن ٻولي، ثقافت ۽ سماجي قدرن کي خطرو آهي.براڊ شرمين وزيراعظم نواز شريف کي خط لکي چيو آهي ته مون کي پاڪستان ۾ انساني حقن جي صورتحال تي سخت ڳڻتي آهي. انساني حقن جي عالمي اصولن تحت توهان کي گذارش ٿو ڪريان ته مذهبي انتهاپسندي ۽ عدم برداشت روڪڻلاءِ اثرائتا قدم کڻو. جبري گمشدگين جو سلسلو روڪيو ۽ سنڌين کي پاڻ سان گڏ رکڻ لاءِ ماحول بهتر بڻايو. هن چيو ته پاڪستان ۾ هندن، عيسائين ۽ احمدين سميت سڀني مذهبي اقليتن جي حفاظت لاءِ تڪڙا قانوني قدم کنيا وڃن. خاص طور تي مون کي سنڌي هندن بابت سخت ڳڻتي آهي. گذريل ڏهاڪي ۾ انهن اقليتي برادرين خلاف تشدد جا خوفناڪ واقعا ٿيا آهن. انتهاپسند غير مسلم ۽ مسلمان اقليتن خلاف نفرت جو کليو اظهار ڪري رهيا آهن. ان کانسواءِ اغوا، مذهبي جبري تبديلي ۽ ڇوڪرين جي شادي تي به سخت ڳڻتي آهي.هن چيو ته پاڪستان ۾ جبري گم شدگين ۽ غير قانوني حراست جي ٻين صورتن کي به روڪيو وڃي. انساني حقن جي تنظيمن سنڌي سياسي ڪارڪنن سميت غير قانوني گرفتارين جا سوين ڪيس نوٽ ڪيا آهن. انهن ڪاررواين سان ماڻهن جو قانون تحت ڪارروائي جو حق غصب ٿئي ٿو. گم ڪيل ماڻهن جي ڪيسن جي جاچ ڪرائي حراست ۾ وٺندڙن خلاف شفاف قانوني ڪارروائي ڪئي وڃي. ان سان سنڌ سميت سڄي ملڪ ۾ قانون جي حڪمراني قائم ٿيندي. ڪانگريس ميمبر براڊ شرمين خط ۾ وڌيڪ چيو ته سنڌين جي سماجي ۽ سياسي خدشن کي سهڻي نموني حل ڪيو وڃي. سنڌين جي پاڪستان جي وفاقي حڪومت ۽ سڪيورٽي فورسز ۾ جوڳي نمائندگي ناهي. سنڌين جي حقن لاءِ جدوجهد ڪندڙ سياسي ڪارڪنن کي جبر جو نشانو بڻايو ويندو آهي. ڪيترن ئي سنڌين کي خوف آهي ته سندن ٻولي، ثقافت ۽ زندگي گهارڻ جو طريقو رياستي جبر ۽ سماجي اڻ برابرين جي ڪري خطري ۾ آهي. هن چيو ته پاڪ، آمريڪا ناتن جي بهتري لاءِ توهان سان گڏجي ڪم ڪندو رهندس.