اپريل مهيني ۾ وڇڙي ويل اداڪارن ۽ فنڪارن جي ياد ۾

سنڌ فنڪار ويلفيئر ٽرسٽ پاران اپريل مهيني ۾ وڇڙي ويل اداڪارن ۽ فنڪارن جي ياد ۾ 23 اپريل 2014ع تي هڪ گڏجاڻي آرٽس ڪائونسل ڪراچي ۾ ٿي گذري. هن گڏجاڻي ۾ فنڪارن، صحافين ۽ فن سان واڳيل شخصيتن اپريل ۾ وڇڙي ويل فنڪارن کي ڀيٽا پيش ڪئي ۽ انهن جي فن بابت ڳالهايو. ان موقعي تي اهو به مطالبو ڪيو ويو ته حڪومت کي گهرجي ته ڪسمپرسي واري حالت ۾ رهندڙ فنڪارن ۽ اداڪارن يا سندن پونيرن جي سار لهي انهن جي مدد ڪئي وڃي. ان موقعي تي اداڪار انور سولنگي، اداڪار سعيد احمد واگهي ۽ راڳي ماسٽر منظور جي گهر ڀاتين هن گڏجاڻي ۾ خصوصي طور شرڪت ڪري سندن ساروڻيون اوريون. سنڌ فنڪار ويلفيئر ٽرسٽ جي چيئرمين حميد ڀٽي چيو ته اسان ڪوشش ڪنداسين ته هر مهيني ان مهيني ۾ وڇڙيل فنڪارن کي ياد ڪندي گڏجاڻيون رکون. تقريب ۾ سنڌ فنڪار ويلفيئر ٽرسٽ جي تخليقي ڪميٽي جي چيئرمين محمد سليمان وساڻ اپريل مهيني ۾ وڇڙي ويل فنڪارن جي زندگي ۽ انهن جو مختصر تعراف پيش ڪيو. هن تقريب ۾ اسماعيل چانڊيو، لطيف منو، فلم اسٽار وسيم، بشارت سمون، سعيد واگهي جو پٽ وسيم سعيد ۽ ٻين ڪيترن ئي فنڪارن شرڪت ڪئي.

اپريل مهيني ۾ اسان کان هيٺيان فنڪار وڇڙيا آهن

4 اپريل 2008ع ريڊيو ۽ ٽي وي جي مشهور اداڪار انور سولنگي جو انتقال ٿيو.
5 اپريل 1994ع مشهور قوال غلام فريد صابري دل جي دوري سبب لاڏاڻو ڪري ويو.
8 اپريل 2011ع ناليوارو اداڪار حسين ساريو ڪراچي جي اسپتال ۾ وفات ڪري ويو.
9 اپريل 1996ع گلوڪار قمر سومري جو انتقال ٿيو.
11 اپريل 1983ع مشهور گلوڪار احمد رشدي جو انتقال ٿيو.
13 اپريل 1987ع گلوڪاره بيگم فقيرياڻي جو لاڏاڻو ٿيو.
13 اپريل 1993ع اداڪار سعيد احمد واگهو وڇڙي ويو.
16 اپريل 1987ع سنڌي ساز مُرلي جي جادوگر اقبال جوڳي جي وفات ٿي.
16 اپريل 1948ع راڳي استاد سينڌو خان وفات ڪري ويو.
17 اپريل 2000ع راڳي زوار محمد جمن ڀٽ لاڏاڻو ڪري ويو.
17 اپريل 2007ع اداڪاره شيلا راماڻي انتقال ڪري وئي۔
21 اپريل 2009ع گلوڪاره اقبال بانو جو انتقال ٿيو.
22 اپريل 2011ع اداڪار ۽ اسٽيج ڪمپيئر معين اختر وفات ڪري ويو.
22 اپريل 2012ع تي گلوڪار ماسٽر منظور جو سندس ئي گهر مان گولي لڳل لاش مليو.
23 اپريل 1966ع برک سنگيتڪار ۽ گويي استاد بڙي غلام علي خان جو انتقال ٿيو.
24 اپريل 1995ع راڳي حاجي ڪلو وفات ڪري ويو.
24 اپريل 2003ع سنڌي ۽ اردو ڊرامن جي مشهور اداڪاره شهزادي جي وفات ٿي.
25 اپريل 2008ع اسٽيج اداڪار، هدايتڪار، ليکڪ ۽ صداڪار محمد صديق پرهياڙ جو انتقال ٿيو.
26 اپريل 2012ع شرناءِ نواز فنڪار امام ڏنو فقير حيدرآباد ۾ لاڏاڻو ڪري ويو.
28 اپريل 1995ع راڳي استاد طفيل خان جي وفات ٿي.
29 اپريل 1976ع اداڪار منور ظريف جي وفات ٿي.
29 اپريل 2003ع لوڪ گلوڪاره مائي الهه وسائي جي وفات ٿي.



















وڌيڪ تصويرن لاء فيسبوڪ جي هن البم جو ڀيرو ڀريو