اي دل نه کاءُ ڌوڪو

[منصور سرور]

اي دل نه کاءُ ڌوڪو، اچ پيءُ هي پروڪو
ساغر وچان ڏسي ٿو، هيءَ ڪائنات ڪو ڪو

گهر گهر، گهٽيءَ گهٽيءَ ۾، تون گهنڊ ٿو وڄائين
اي، ميفروش! تنهنجو هر هنڌ آهي هوڪو

اڄ رات شبنمي آ، ڇو جام ۾ ڪمي آ
هن وقت ڪا به ناهي، مون تي ميار لوڪو

هي ناز جون نهارون، تون اڳ ۾ به آزمايون
شايد جٽاءُ ڪن اڄ، اي عشق کاءُ ڌوڪو

هي تندُ تيز طوفان، مان پار ڪيئن پهچان
سوچو ته ناخدائو، آهي به آسرو ڪو

تيسين اياز هن کي، پورو پسي نه سگهندين
جيسين کلي نه جاني! ڪو جيءَ ۾ جهروڪو