ڪلهه وري منهنجي ڳوٺ ملڪاڻي جو ٽرانسفارمر سڙي ويو ۽ هڪ دفعو وري اهي چؤٻول ته واپڊا وارن ايترا پئسا گهُريا آهن. هاڻي چندو ڪجي. پر هن دفعي اسان جي هن فورم جي ساٿي ۽ منهنجي پياري دوست يونس ملڪاڻي اهو اعلان ڪرايو ته پئسا نه ڏبا. اهو اسان جو حق آهي. اسان کي ملڻ کپي. هن ان حوالي سان فيس بُڪ تي هڪ پوسٽ به رکي جنهن تي اڪثريت اهو ئي چيو ته ڪم پئسن سان ٿيندو. ٻين اهو چيو ته پئسا ناهن ته تڪ جي اُميدوار سان ڳالهايو. يونس لوڪل اڳواڻن معرفت ڊاڪٽر ذوالفقار مرزا تائين رسائي ڪئي. جنهن فلحال ته عابدشير علي وغيره جا نالا وڍي عُذر پيش ڪيا پر وري به اها خاطري ڪرائي ته اوهان رشوت نه ڏيو. جيڪڏهن اوهان وٽ ريڪوري ٺيڪ آهي ته اهو ڪم مفت ڪرائبو. توڙي جو اها خاطري نه ٿي ڪرائي سگهجي ته ملڪاڻي ۾ سؤ فيصد ريڪوري آهي پر گهڻن جي ڀيٽ ۾ بهتر آهي. هتي بل جمع ڪرائڻ جو وڏي وقت تائين ته هڪ منظم سسٽم جُڙيل هو. هڪ جهونو الهه جڙيو وٽ بل جا سٿا ايندا هُئا جيڪي هو هر ماڻهو کي پُهتا ڪندو هو وري پئسن سان گڏ کيس ملندا هُئا. في بل تي 5 کان 10 رُپيا سندس ان ڪم جي خرچي يا مزدوري هوندي هُئي. اهي سڀ بل ۽ پئسا کڻي وڃي جمع ڪرائيندو هو جهُڏو جي بئنڪ ۾. هاڻي اومني ۽ ايزي پئسا جي سهولت اچڻ ۽ الهه جڙئي ۾ سڪت نه رهڻ ڪري اهو سسٽم ته کڻي ناهي رهيو پر پوءِ به ڪافي قدر بل جمع ٿين ٿا. خاص ڪري ملڪاڻي جي وڏي مشينري وارا ڪاراخاني جا مالڪ ته 100 فيصد ادائگي ڪن ٿا. پر چوندا آهن نه ته “سِڌي ڪاٺي تي وزن گهڻو“. اهو ئي قِصو آهي. جتي رڪوري وڌيڪ واپڊا جا نخرا به اُتي ئي وڌيڪ جو ماڻهو بل ڏيئي اها تقاضا ڪن ٿا ته اسان کي جائز سروسز ڏيڻ خاطر رشوت نه وٺو. اها ڳالهه کين وڻي نه ٿي. اهو ٽرانسفارمر گُذريل ڪيئي سالن کان پنهنجي مدد پاڻ تحت ريپئر ٿئي ٿو ۽ لڳ ڀڳ 70 سيڪڙو ڳوٺ جو بار کڻندي وڌ ۾ وڌ 110 وولٽ ڏيئي ٿو. بل ڏيندڙ ايتري وولٽيج تي به خوش آهن بس رشوت نه هُجي. اڳي جي ڀيٽ ۾ هن دفعي ڪم تڪڙو پيو ٿئي ڇو ته مرزا جي وچ ۾ اچڻ سان فرق پيو آهي پر اهو هڪ بنيادي حق آهي جيڪو بنا چوڻ جي به ملڻ کپي ها. پر هڪ فرق اهو آهي ته هن دفعي پئسا ناهن ڏيڻا پيا. جيڪڏهن ڪوشش ڪجي ۽ انفرادي طور ئي سهي پر عملي ڪم ڪجي ته بُرايون آهستي آهستي ختم ٿي سگهن ٿيون. جيئن يونس جي ڪوشش سان اڄ رشوت مان جان ڇُٽي ٻي دفعي متان مرزا جي غرض به نه ڪڍڻي پئي. پر ڳالهه آهي ڳالهه کان عمل جي. . . .
ساڳيو حال ڪراچي جي سنڌي وسندي سچل ڳوٺ جو به آهي ۽ اوهان خوب ڄاڻو ٿا ..... بس جي ٽرانسفارمر سڙيو ته مري وياسين جو 70 فيصد ريڪوري لاء اسانکي کي هٿ پير هڻڻا پوندا .... يونس ڀلي ڪوشش ڪري پر فائدو وري به مفت خورن جو ئي ٿيندو ....
سائين سليمان اهي ئي ڪمينٽس مون فيس بڪ تي شيئر ڪيا هئا ته واپڊ جهڙي هڏن تي هريل مخلوق بنا هڏي جي ڪم ڪري سوال ئي پئدا نه ٿو ٿئي .
ڳالهه ته ڀلي آ... مون کي لڳي ٿو يونس جو حوصلو گهڻو وقت برقرار نه رهي سگهندو... جو هن وقت گرمي به سوائي آ.. ۽ ٽرانسفارمر هجي نه هجي هميشه وانگر بل به ساڳيو ايندو... ان کان علاوه ٻارن ٻچن جي پريشاني جو الڳ الڪو رهندو... ۽ سڀ کان اهم ڳالهه ته واپڊا وارا مٿيون سڀ ڳالهيون ڄاڻن به خوب ٿا ته وري سمجهن به خوب ٿا... بس کين ڪرڻو صرف اهو پوندو جو هُو ڪجهه نه ڪن... جنهن کين پڪ هوندي ته جهول به ڀربو ۽ منٿون ڪندڙ به ملندا.. وڌيڪ همتِ مردان مددِ خدا...
اسان جي ايم پي اي چيو آهي ته پئسن کان سوا ڪم ڪونه ٿيندو، پر اهي پيسا ڀريندس آئون!!!!! اسان جون اکيون ٿڌيون پيسا اسان کان نه ورتائون واپڊا جو به پيٽ ڀربو ۽ اسان جي به عزت رهجي ايندي پر اهو سڀ ڪجهه ان لا ڪونه ڪيو هو!! سمجهه ۾ نه آيو ته پيسا نه ڏيڻ ۾ اسين ڪامياب پيا وڃون يا وپڊا وارا هميشه جيان پيسا وٺڻ ۾ ڪامياب پيا ٿين؟؟
ادا آواز اٿارڻ ۾ تون ڪامياب وئين. پئسا وٺڻ ۾ واپڊا ڪامياب ويو خلاصو اهو ٿيو جو واپڊ وارن کي وري به هڏي ملي رهي ڳالهه اسان جي ڳوٺ تي ڦوڙي جي سو ان کان بچي ويا سين . پر ان مان اها ظاهر ٿيو ته حڪمران بي ڄاڻين ٿا ته واپڊا ڪني مخلوق آهي انهن جي به ڪانه رکندي. جيڪو اسان سڀ چئون پيا ٿا. بهرحال ڪجهه فائدو ٿيو اهو به بهتر ٿيو. ناڪامي ادا يونس توکي به ڪانه ٿي. سٺوڪيئو.
جتي ايم پي اي (سو به جهڙو تهڙو نه ڊاڪٽر ذوالفقار مرزا جو فرزند) به واپڊا کي رشوت ڏيڻ تي مجبور هُجي اُتي ٻيو ڇا چئجي؟؟؟؟ دوستو يقين ڪندؤ ته يونس ملڪاڻي جي عزم اڳيان نيٺ ايم پي اي صاحب اهو چئي معاملو ختم ڪرايو ته رشوت جا پئسا آئون ٿو ڏيان معاملو ختم ڪريو.
الله پاڪ ادا يونس ملڪاڻي کي تندرستي ۽ صحت سلامتي عطا فرمائي ، سندن جي همت تي اسين انکي داد ڏئي رهيا آهيون
