صوفي راڳي فقير عبدالمجيد سيال سان سچل ڳوٺ ۾ هڪ شام
ڪجهه ڏينهن اڳ سچل ڳوٺ جي ئي دوست سيد ارشاد شاهه ۽ اسان جي علائقي جي مشهور واڍي پنهل لاکي فرمائش ڪئي ته صوفياڻي راڳ جي ڪا محفل مچائجي پر ان ۾ مختصر دوست ئي شامل هجن جيئن محفل ۽ موسيقي جو لطف ماڻي سگهجي. ٻئي ڏينهن سائين حزب الله شاهه سان رابطو ڪري کيس ساڳيو عرض رکيم. پاڻ ان ئي وقت فون تي ڪنهن سان ڳالهائي چيائون ته بس سڀاڻي رات محفل آهي. هن ٻڌايو ته فقير عبدالمجيد سيال جهوڪ شريف آيل آهي ۽ اتان سڌو هتي سچل ڳوٺ ايندو دوستن کي اطلاع ڪيو. فقير عبدالمجيد سيال ان کان اڳ به سچل ڳوٺ ۾ صوفياڻي راڳ جون محفلون ڪري چڪو آهي ۽ سندس مشهور ڪلام آهي صوفيءَ جي سوز ساز کي سمجهڻ ته ڏکيو آ.
وقت صفا گهٽ هيو پوء به دوستن کي موبائل ميسيج ۽ ڪال ڪري ٻڌايوسين، پر ڪافي دوست رهجي ويا، جنهن جو ڏک اٿم. رات ڏهين بجي روشن تارا اسڪول سچل ڳوٺ ۾ صوفياڻي راڳ جي من کي موهيندڙ محفل رات هڪ بجي تائين جاري رهي، جنهن ۾ فقير عبدالمجيد سيال ۽ وڌيي فقير صوفي شاعرن شاهه لطيف، سچل سرمست، پير اعجاز شاهه، جانڻ چن، غمدل فقير، چيزل شاهه، حمل فقير، امام الدين ڍڪڻ ۽ حافظ نظاماڻي سميت ڪيترن ئي شاعرن جا ڪلام ڳائي محفل کي جهومايو. ڳليان پريم نگر ديان، جڏهن ٿا پيئون پيئون تڏهن ٿا جيئون جيئون، گهنڊ کول ديدار دکائو، صوفي جي سوز ساز کي سمجهڻ ته ڏکيو آهي، ڪو آ رحمان جي پاسي ڪو آ ڀڳوان جي پاسي، اوهان جا عاشق هزار آهن سميت ڪيترائي ڪلام ڳايا. سچ اهو آهي منهنجي زندگي جي بهترين موسيقي جي محفلن مان هي به هڪ محفل هئي.
