حضرت پير سائين سورهيه بادشاه قدس سره پاڻ 13 صفرالظفر 1327 هجري ۾ تولد ٿيا، سندن والد ماجد جي انتقال بعد ٻارنهن سالن جي عمر ۾ سجاده نشين ٿيا، پاڻ پنهنجي دور ۾ انگريز جي خلاف تحريڪ کي اڳتي وڌايو، مريدن جي تربيت لاءِ دورا ۽ سفر شروع ڪيائون ، حضرت پير سائين سورهيه سائين تحريڪ آزادي جي پاداش ۾ گرفتار رهيا، سندن خاندان ، جماعت ۽ درگاه جي مٿان آزمائش جو دور هو، سمورا سلسلا منقطع ٿي ويا، جماعت روپوش ته ٻي لوڙهن ۾ ، هوڏانهن کين 20 مارچ 1943 ع تي فرنگي سامراج شهيد ڪيو، سندن خاندان کي نظر بند ڪري ، صاحبزادن کي جلاوطن ڪيو ويو ، درگاه جي مٿان بمباري جي ذريعي سواءِ مزارن ۽ مسجد جي ٻيو ڪجهه نه ڇڏيو ويو. انهن ڏکين حالتن ۾ جماعت ۽ درگاه 1952 تائين رهي ، پوءِ مرشد زادن جي واپسي سان ڏک لٿا، حضرت پير سائين شاه مردان شاه ساڳيون رونقون بحال ڪيون..
