مقبول ترين موبائيل ميسينجنگ ايپ واٽس ايپ جي استعمال ڪندڙن جو هاڻي وصول ٿيندڙ پيغامن کان بچڻ ناممڪن ٿي چڪو آهي.. ڇو ته اڄ صبح کان واٽس ايپ پيغامن سان نيري رنگ جا ٻه ٽڪ مارڪس ڏيکارڻ شروع ڪيا آهن.. جن جو مطلب اهو آهي ته هي پيغام پڙهجي چڪا آهن.. ان کان اڳ رڳو ٻن طرحن جا ٽڪ مارڪس موجود هئا.. هڪ ٽڪ مارڪ جو مطلب هوندو هو ته پيغام موڪلجي چڪو آهي.. جڏهن ته ٻن ٽڪ مارڪس جو مطلب هو ته پيغام وصول ڪندڙ جي موبائيل تي ڊليور ٿي چڪو آهي..
پر هاڻي نئين فيچر تحت جڏهن پيغام پڙهجي چڪندو ته ٻئي ٽڪ مارڪس نيري رنگ جا ٿي ويندا.. ان طرح گروپ چيٽ ۾ جڏهن سمورن ميمبرز کي پيغام وصول ٿي وڃي ته هاڻي ٻه ٽڪ مارڪس نظر ايندا آهن ۽ جڏهن سمورا ميمبرز پيغام کي پڙهي وٺن ته انهن جو رنگ نيرو ٿي ويندو آهي.. ان کان علاوه هاڻي ايپ استعمال ڪندڙ ڪنهن به پيغام تي آڱر دٻائي رکندا ته اهي ڏسي سگهندا ته مختلف ميمبرز اهو پيغام ڪنهن وقت پڙهيو ...
خير انهن سمورين تبديلين کي ڏسڻ لاءِ واٽس ايپ ميسينجر کي اپڊيٽ ڪرڻو پوندو...
انهن تبديلين اچڻ تي سوشل ميڊيا تي مليل جليل ردِ عمل ڏسڻ وٽان مليو... گهڻن جو خيال هو ته ڪڏهن ڪڏهن ڪنهن پيغام جو جواب ڏيڻ تي دل نه چوندي هئي.. اهڙي صورت ۾ جڏهن اڳئين ماڻهونءَ کي خبر پئجي ويندي ته سندس پيغام پڙهيو ته ويو آ پر جواب نه ڏنو ويو آهي ته خواه مخواه غلط فهمي پيدا ٿي سگهجي ٿي..
ياد هجي ته واٽس ايپ ميسينجر ڪجهه مهينا اڳ فيس بوڪ خريد ڪيو هو...
