فخر آهي ته پٽ ڌرتي ماءُ لاءِ شهيد ٿيو، حوصلا بلندا ٿيندا: لطف پيرزادو ڄام شورو: شهيد سرويچ پيرزادي جو پيءُ لطف پيرزادو اسپتال ۾ ميڊيا کي تفصيل ٻڌائي رهيو آهي حيدرآباد (عوامي آواز نيوز) شهيد ڪيل سرويچ پيرزادو جي پيءُ ۽ ضياءَ جي آمريتي دور ۾ جيل ۽ ٽارچر جون سختيون سهندڙ لطيف جي پارکو لطف پيرزادو سول اسپتال حيدرآباد ۾ پٽ جو لاش وصول ڪرڻ وقت صحافين سان ڳالهائيندي چيو ته منهنجو پٽ خوش نصيب آهي جو ان کي شهادت نصيب ٿي آهي، شهادتون ته خوش نصيب ماڻهن کي ملنديون آهن. هن چيو ته سرويچ کي شهادت نصيب ٿي آهي ۽ اسان کي ڳوڙها نصيب ٿيا آهن. هن چيو ته ڪيترائي نوجوان ڪرمنل ڪيسن ۾ ماريا وڃن ٿا پر مون کي فخر آهي ته منهنجو پٽ قوم ۽ ڌرتي لاءِ شهيد ٿيو آهي، جيڪي سمجهن ٿا ته هو سنڌ جي نوجوانن کي کنڀي تشدد ڪري کين گوليون هڻي ماري دهشت پکيڙيندا ته اها سندن ڀل آهي، نوجوانن جي شهادتن سان دهشت نه پر اتساهه پيدا ٿيندو. هن چيو ته هي هڪ عالمي سامراجي سازش آهي، ڪالهه بنگالين سان اهڙو حشر ڪيو ويو، اڄ سنڌين سان اهڙو سلوڪ ڪيو پيو وڃي.
تون جي وڙهندين، ماريو ويندين، هِـن ڌرتـيءَ تـان واريـو ويـنـديـن، دودا تــنهـنجــو ســاه ته ويــندو، پـر مـاڻهـن جـو ويـساه نه ويـندو!
