هو نوجوان هو ۽ انقلاب سان هن جي عشق جي شروعات هئي. مان حيدرآباد ۾ هوٽل ”اورئينٽ“ ويٿو هوس ته هو اوچتو مون ڏانهن آيو ۽ مون کي کيڪر ڪري منهنجي ڀرسان ڪرسيءَ تي ويهي رهيو. ڪرسي تي ويهڻ کان اڳ هن نٽ هئمس جو ڪتاب ” هنگر“ (بک) شاپر مان ڪڌي ميز تي رکيو ۽ انهيءَ اداڪار جيان جنهن کي پوري ناٽڪ ۾ فقط هڪ جملو ياد هوندو آهي يڪدم چيائين اڄ ئي خريد ڪيو اٿم اڃان پڙهيو ڪو نه اٿم. جنهن تي مون کيس ٻڌايو ته لينن ۽ ان جي زال ڪروپسڪيا شادي کان پوءِ ٻيڙي تي سير ڪري رهيا هئا ڳالهون ڪندي لينن چيو ”نٽ هئمس جو ناول ”بک“ مون کي ڏاڌو وڻندو آهي“. ان تي ڪروپسڪيا چيو ”پر نٽ هئمسن تي ڪيترائي ناول لکيل آهن، توکي فقط بُک ڇو وڻندو آهي؟ جنهن تي لينن چڙي جواب ڏنو ”ائين ڇو آهي ته توکي نٽ هئمسن جا ٻيا سڀ ناول وڻندا آهن. رڳو ”بُک“ ئي نه وڻندو آهي؟” هن مٿيون ٽوٽڪو ٻڌي، وڏي زور سان سان ٽهڪ ڏنو ۽ چيائين، ”اڇا، ڪامريڊ لينن ائين چيو؟“ هن لفظ ”ڪامريڊ“ ايتري تيزيءَ اُڪير ۽ گهرائپ سان چيو ڄڻ ڪالهه هو لينن سان گڏ ساڳئي سماوار مان چائي پي آيو هو.... شيخ اياز
