وَانءُ وَڃِي وَائُٺِ، هِنئَڙَا ! مَاڳُ پِرِيُن جَو
چُمِيَو چُمُ چَائُٺِ، هُوءَ جَا سَندِي سَڄَڻَين
سُرُ سَامُونڊي
وَانءُ = وَنئُه، وَڃُ
وَائُٺ = جاچ ڪر، ڳول، تلاش ڪر، واءُ سواءُ لهه
هنئَڙَا = او مَنَ، او دل
مَاڳُ = جڳهه، هنڌ، رهڻ جي جاءِ
چَائُٺ = چانئُٺ
سَڄَڻَين = پرين جي، محبوبن جي، ساجن جي
بيت جو پس منظر
~ او دل !! وڃ وڃي ڳول ته محبوب ڪهڙي جاءِ تي ٿا رهن.
~ جڏهين ڳولي لهين ته چائٺ کي چميون ڏئي اچجان.
سمجهاڻي
ٻاهرئين ملڪ ڪمائڻ لاءِ ويل هڪ پورهيت واپس اچڻ ۾ وڏي دير لڳائي آهي. کيس ڪيئي سال لنگهي ويا آهن، هو اڃان نه موٽيو آهي.سندس وني، محبوبه ڏاڍي بي چين ۽ بي قرار آهي. هوءَ رويو پنهنجيءَ دل کي پئي چئي ته ڪيڏو پريشان آهين پاڻ به ۽ منهنجو جيءُ به جهوريوڌو اٿئي. ڀلا هينئن ڪر جو وڃ وڃي محبوب کي ڳولهه ته ڪهڙي جاءِ تي ٿو رهي؟
جڏهين ڳولهي لهين ته نهايت ادب سان پاڻ به، ۽ منهنجي طرفان به سندس چائٺ کي چميون ڏئي اچجان.
____
محترم مظفر منگي صاحب جي ٿورن سان سندس فيسبوڪ وال تان ورتل
انتظامي رڪن طرفان آخري ترميم:
