اوهان اهو ته ڏٺو هوندو ته ڳوٺن ۾ اڪثر مرگھيءَ جي مريض کي پادر سُنگهائي هوش ۾ آندو ويندو آهي ۽ پڻ ٻڌو هوندو ته پيسو پيسي کي ڇڪيندو آهي پر اوهان ڪڏهن ڪنهن ماڻهوءَ کي نوٽن جي طاقت سان بيهوشيءَ مان هوش ۾ ايندي نه ڏٺو هوندو، اوهان کي اهو پڙهي تمام حيرت ٿيندي ته چين ۾ هڪ سال کان ڪوما واري حالت ۾ پيل شخص نوٽن جي خوشبو سُنگھي هوش ۾ اچي ويو، اتر چين جي علائقي ”شين زن“ ۾ هڪ شخص آگسٽ 2013ع تي پنهنجي ڪاروباري سلسلي ۾ ايترو ته پريشان ٿي ويو جو هڪ هفتي تائين سمهي نه سگھيو ۽ ان دوران هو حوش وڃائي ويٺو ۽ ڪوما ۾ هليو ويو، ڊاڪٽرن کيس ڪوما واري حالت کان ٻاهر آڻڻ لاءِ اڻ ڳڻيان جتن ڪيا پر اهي سڀ بيڪار ويا، جڏهن سڀ ٿڪجي ويهي رهيا ته ان دوران مريض جي خاندان وارن مان هڪ ڊاڪٽرن کي ٻڌايو ته مريض کي دولت سان تمام گھڻي محبت هئي، جنهن کان پوءِ ڊاڪٽرن جي ٽيم هڪ تجربو ڪرڻ جو فيصلو ڪيو ۽ مريض کي نون ڪڙڪ نوٽن جي خوشبو سُنگھايائون، بس پوءِ ڇا ٿيو اهو ڏسي سڀ دنگ رهجي ويا، نوٽن جي خوشبوءَ سبب نه رڳو مريض جي جسم ۾ حرڪت پيدا ٿي پر هو ٿوري ئي دير ۾ اکيون کولي نوٽن کي گھورڻ لڳو. ڊاڪٽرن جو چوڻ هو ته طبي تاريخ جو هي نرالو واقعو آهي، جو ڪو شخص علاج کان سواءِ ڪنهن ٻئي طريقي سان ڪوما جي حالت مان ٻاهر آيو هجي، سندن چوڻ هو ته مريض تيزيءَ سان صحتياب ٿي رهيو آهي، جلد کيس اسپتال کان موڪل ڏني ويندي.
