ڪراچي کان پنجاھ ڪلوميٽر اتر-اولھ طرف سون مياڻي جو سامونڊي علائقو واقع آهي. هتي قديم زماني کان وٺي بندرگاھ موجود آهي. سنڌ جي تاريخ ۾ هي بندرگاھ نهايت اهميت وارو رهيو هو. 1805ع ۾ پورچوگيزن هن بندرگاھ کي لٽي ڦري آخر ۾ باھ لڳائي ڇڏي هئي. عربن جڏهن سنڌ تي حملو ڪيو هو، تڏهن سون مياڻي جي بندر تي سندن فوجي جهازن جي لنگر انداز ٿيڻ جو ذڪر ملي ٿو. ترڪي ۽ سڄي عربستان جي رياستن جو سنڌ سان ڏيتي ليتي وارو رستو به هنن بندرگاھ ذريعي رهيو هو. گهوڙن ۽ ڍورن جا اعلي نسل هن بندرگاھ جي ڀر پاسي ۾ پاليا ويندا هئا. عربن جي اٺن جا واڙا به هتي قائم هئا. سون مياڻي هن وقت بلوچستان جي لسٻيلي واري علائقي ۾ آهي. جڏهن ته اصل هي سنڌ جو علائقو هو. جيڪو انگريزن سنڌ کان ڌار ڪري بلوچستان ۾ آندو. سون مياڻي لاء مشهور هو ته هن مقام تان سون جون کاڻيون ۽ ذخيرامليا هئا. موجوده دور ۾ سون مياڻي سياحت جو اهم مرڪز هجڻ سان گڏ مڇي جي ڪاروبار جي ڪري مشهور آهي. هتان جو ابي شڪار پرڏيھ وڪرو ٿيندو آهي. جنهن ۾ جهينگا، گانگٽ، وڏيون سامونڊي مڇيون، کيکڙا، گوج مڇي، شارڪ، سونهري مڇي ۽ جيلي فش شامل آهي. سپارڪو فلڪياتي اداري جي هڪ اسٽيشن قائم آهي. جتي مختلف طرز جي راڪيٽ لانچرن جي (اسمبل) تيار ڪرڻ جو ورڪشاپ موجود آهي. هتي مختلف سائنسي تجربا ڪيا ويندا آهن. "انسائيڪلو پيڊيا سنڌيانا جلد 8"
مهرباني سائين منهنجا لک قرب توهان جو مان سوچيم ته آهي سنڌ جي معلومات پوء ڇو نه سنڌ سلامت تي پيش ڪيان.
