نعره فنڊ جبار آزاد منگي تنطيم جي جڏهن به گڏجاڻي ٿيندي هئي تڏهن ڪامريڊ فنڊ جي اهميت تي وڏيون ڳالهيون ڪندو هو ته تنظيم اندر فنڊ تمام اهم آهي ڇوته قوم جي نجات ٿيندي ئي تڏهن، جڏهن اسان فنڊ ڏيئي تنظيم کي مضبوط ڪنداسين.ڪنهن پروگرام لاءِ ڪنهن پمفليٽ وغيره لاءِ پرنٽنگ جو ڪم ڪُڏي کڻندو هو،اها بعد ۾ خبر پئي ته هو انهيءَ فنڊ کي پنهنجي کيسي جي ڪَڙڪي ختم ڪرڻ لاءِ استعمال ڪندو هو.تنظيمي فنڊ نه تعلقي نه ضلعي ۽ نه ئي مرڪز کي ملندو هو، اهو فنڊ ئي هيو جنهن ڪري گهڻا تنظيم جا ميمبر گڏجاڻي ۾ شرڪت کان لنوائيندا هيا،نتيجي ۾ ڪامريڊ انهن تي رپورٽون ڪندو. اوچتو هڪ ڏينهن فنڊ بابت سوال ڪرڻ وارن کي تنظيم مان خارج ڪيو ويو.ڪامريڊ جي خوشي جي حد نه رهي.ڪجھ وقت کان پوءِ ان ڪامريڊ هڪ اهڙو انساني شڪل ۾ بيوقوف مرغو هٿ ڪيو جنهن سان ڪامريڊ جي کيسي جي ڪڙڪي ڪوھين ڏور ڀڄي ويئي.اڄ ڪلھ اهو ڪامريڊ هر مهيني ڪو نه ڪو سنڌ جي عشق جي نالي ۾ پروگرام ڪري پنهنجي خالي کيسي کي گرم رکڻ لاءِ جدوجھد ڪري “کيسائي انقلاب” آڻيندو رهي ٿو.
